某天我脫毒了，走上了情聖之路: 最終章 - 某天我脫毒了，走上情聖之路
「喂，柔柔! 你地係邊?」我電話問柔柔。
「係K，我地差唔多去離境啦，你快啲啦。」
我跑去K櫃位，
可惜身體唔太聽話….
應該係因扣喉所致….
去到K既時候，見唔到佢地。
我望望電話。
柔柔︰{我地已經行緊去閘口}
柔柔︰{到未?}
柔柔︰{快啲啦!!}
原來柔柔連send左幾個wts app我。
時間唔係隔好耐，
佢地應該岩岩行去閘口。
我向住閘口跑…
途經萬寧既時候，我順手買左盒朱古力，
送機無理由兩手fing fing嘛…
遠望閘口有一班人係到道別緊。
應該係嵐嵐佢地，唔會有錯。
「黎若嵐!!!!」我高呼。
範圍內既人都望住我。
我一步步行近去。
嵐嵐身邊既人都好自然散開左。
我地兩個人對望住。
「小……」嵐嵐既開口既一刻被我打斷左。
「你條友，粒聲唔出就走左，算點?」
「對唔住…..」
「呼……..你要去邊呀?」我嘆嘆氣。
「英國。」
明明郁下就吵吵鬧鬧既我地，
唔知點解呢刻從滿住尷尬。
「丫!....比你嫁。」我比我手上盒朱古力嵐嵐。
嵐嵐見到之後就不其然咁留下眼淚。
「我地好快會再見，係咪?」我安撫嵐嵐。
「嗯! 」
嵐嵐突然比左一個擁抱我。
我心入面充住一大堆既問題，
好想問佢，但根本開唔到口。
「你隨時都可以contact我。」我摸摸嵐嵐頭頂。
「嗯! 」嵐嵐仍然未收淚聲。
點解嵐嵐會突然出走?
點解明明佢當左我係佢哥哥但今日又要離開?
佢呢種哭聲令我無比既痛心。
「嵐嵐、小狼，差唔多啦。」嵐嵐媽媽提我地。
嵐嵐收起哭聲，
從我既懷抱走出來。
我地仍然望住對方。
「你有無咩想同我講?」
「你有無咩想同我講?」
我地異口同聲。
「過到唔好再咁惡，嚇走晒啲金髮靚仔。」
「你都唔好再咁on 9成日比人恰。」
「係得你恰我之嘛。」
「我都恰到你，你檢討下啦。」
「係啦，威啦，叻啦。」
我地都忍唔住笑左出黎。
因為我地好耐都未試過鬥嘴。
原來失去先知道有人同自己鬥嘴係幾咁幸福既事。
可惜….你要走。
嵐嵐逐一同朋友親人擁抱道別。
而我係最一個同佢擁抱道別既人，
最好要留到最後嗎?
「走之前可以同我自拍嗎?」嵐嵐問。
「好呀。」我溫柔地答。
嵐嵐繞實我手臂，
我拎出手機同佢自拍。
呢張係我地第一張既自拍合照。
望落去，真係有幾分似兄妹。
「你send番比我啦。」嵐嵐同我講。
「OK~你落機記得我wts app報平安。」
「知啦長氣。」
「再見啦，嵐嵐。」
「拜拜啦，小狼。」
嵐嵐轉身離去….
佢每行一步，就增加我鼻子既酸度。
離開既一刻我先發現，我有幾咁唔捨得。
我從來都無諗過我同嵐嵐會有咁樣分開既一日。
好多時啲野就係咁，係我地唔察覺既情況低下，不經意地離開，
當我地發現無左佢地既時候，我地先開始珍惜。
正如我而家先黎珍惜我同嵐嵐最後既對話時間。
「多謝你黎送嵐嵐機，多謝你地一路以黎對佢照顧。」嵐嵐爸爸向我地表示謝意。
「小狼，多謝你一直都咁照顧嵐嵐。」嵐嵐爸毤向我表示謝意。
「唔….唔係…佢都好叻，有時照顧番我轉頭。」
「真係謙虛，你番屋企? 我車埋你?」嵐嵐爸爸問。
「唔洗啦，我自己番去都可以。」
「好啦咁，我地再保持聯絡啦。」
正當我轉身準備走既時候我聽到柔柔同佢爸爸既對話。
「爸爸，我想同小狼一齊走。」柔柔聽佢爸爸。
「好呀，唔好太夜。」柔柔爸爸既允許。
「OK~。」柔柔答。
柔柔行過黎我呢邊。
「小狼，我地一齊番去?」柔柔問。
「好呀，但你唔洗同屋企人一齊咩?」
「可以唔洗，同埋你咁既樣咪陪下你。」
「哈哈，好呀。」
我同柔柔一齊行去巴士站。
我不其然都會望下柔柔。
原來不知不覺間，柔柔高左大個左。
突然就感慨呢幾年發生既事。
我同柔柔上左A12。
坐左係一個窗口位，
我就坐係佢隔離。
「嵐嵐真係走得好突然。」柔柔感慨。
「係…..」
係喎! 柔柔應該知佢走既原因。
「其實…嵐嵐點解會走既?」我問柔柔。
「你真唔知定假唔知?」柔柔反問我。
「我真係唔知。」我用外賣仔既口吻。
「你唔好扮外賣仔啦。」
好野喎……咁都接到。
「唔好玩住，咁原因係咩?」
「Umm……我應承過嵐嵐唔講得，不過你自己應該估到，係睇你肯唔肯去承認姐。」
柔柔講得岩，
我確實係估到嵐嵐走既原因。
我問柔柔既原因，並唔係因為我明知故問。
而係希望從佢口中聽到第二個答案。
「你個樣沉一沉，即係我無估錯啦，咁你自己又點諗?」
「我咩諗咩?」
「唉，係要人畫出腸….你中意嵐嵐嗎?」
我心戚左一戚。
「唔知呢~」我輕挑咁帶過。
「咁即係點?」
「即係唔知囉~」
「有得咁嫁咩?」
「點會無? 我就係法則，哈哈哈。」我奸笑。
「傻嫁你，成個變態佬咁。」
「無錯，我就係專攻可愛細路女既變態佬。」我中二病上身。
「你呢個係咪答案?」柔柔問。
我望住柔柔奸笑。
「唔答你。」奸笑…………………
「喂也…..」柔柔扭計。
「咪嬲啦。」
「咁你打算點?」
「咩打算點?」
「會追嵐嵐嗎?」
「唔會啦，佢永遠只係我既好朋友，更何況同親我一齊既女仔都唔會有好下場。
睇怕我同愛情係無咩緣份，同埋呢幾年我中意得太多女仔，個心好累，發覺都係做毒撚都幾好。」
「你想做毒撚? 問過我未?」柔柔挑機mode。
「小姐你搞點你男朋友先啦。」
「哈~邊個話我而家拍緊拖嫁?」
「雖然你單身姐….但我都想做毒撚….。」
「唔得喎，呢幾年我學識左一樣野，只係自己中意既，就要主動去爭取，去追佢番黎，不論係事定係人。」
感覺柔柔比以前堅強左好多。
「放過我啦，我想專心做番個毒撚……」
「慳啲啦，你中意少陣女仔都死啦情聖。」柔柔拍我個頭。
情聖?
我唔知我算唔算係，
但我好易就會中意一個女仔，呢樣係真。
由我脫毒開始，呢幾年的確發生左唔少事，
晴晴、樂瑤、卓芝、柔柔、小櫻.......
不過經歷左咁多野，
發覺其實做毒撚都幾好，
時間，錢，所有野都用係自己身上。
仲唔洗煩一啲好難解決既感情問題。
我咁係懦弱?
我其實真係幾細膽。
但你吹咩，
呢個就係我---黃少朗。
我既中學故事大概就到呢到。
如果要我總結呢幾年既故仔，也許應該係咁︰
某天我決意脫毒，走上左情聖之路，
今天我卻覺悟了，由情聖變回毒撚。
------------------------ 三年後 -------------------------
「本班航機已抵達香港，歡迎大家…….」
一番長篇既飛機廣播，意味住我終於番到黎香港。
就只有我隻身一人行走係呢個笑淚與共既香港機場上。
無任何親友黎接我，就只有我隻身一人
我番黎既目的就有一個!
黃少朗