某天我脫毒了，走上了情聖之路: 第一章－重生

我努力做左大量research，搵一個適合自己既髮型同著衫style。
最後我揀左小豬頭同簡單既休閒服飾黎作參考。
首先，我要去搵我髮型師，之後再去買衫
「Marco，因間3點得唔得閒？」我wts app髮型師

「得呀，一陣見！」

大約4點鐘，佢就幫我搞點晒所有野。
「你睇下得唔得？」Marco剪完示意我有無野需要修改



「掂呀！無得輸！我直頭可以cosplay佢！！」
我從未見過自己咁靚仔！（同柒頭既我比，算叫靚仔既….）

剪完頭髮，跟手去U記買條直腳牛仔褲，U記又平cutting又唔差，岩晒我呢啲毒撚。
之後就由銅鑼灣去左旺角波鞋。我始終覺得，作為一個有品味既男仔，一定要有番對似樣既波鞋先夠型。
行左個幾鐘，啲款都差唔多咁，完全揸唔到主意。
行到見肚餓就搵間茶記坐低食飯，一路食一路search下牛仔褲著咩鞋好睇。
食完埋單，就向目標出發。因為唔知買咩好，所以買左Nike全白air force，夠晒穩陣！著咩褲都襯到！
行成日街仲攰過踢幾個鐘波。一入到屋，我呀媽：「嘩！做咩事呀？做咩剪個咁既頭？」



我個花生家姐即刻走出黎「嘩！發姣呀你？梳到個頭咁，實係準備溝女。」

「下？你唔係丫嘛，記住要安全呀！」我呀媽高左幾個八度咁對我作出勸勉

我攰到一個唔想理佢既點，狗衝左入房。集一集氣，就 “喳喳林“換件恤衫自拍兩張靚相做wts app同FB profile pic。今個暑假我黃少朗誓破A0！！！