某天我脫毒了，走上了情聖之路: 第二十一章 - 好朋友
卓芝帶左我去太古城行街。
又係太古城，東區人真係無乜地方好去。
我一路跟住佢行，無乜點講野。
「其實你同柔柔真係純兄妹關係?」卓芝突然轉身過黎問我。
「當然。」
「其實你有無諗過佢中意你?」
「點會呢? 我大佢兩年，佢充其量只係當我哥哥。」
「所以話你一啲都唔明女仔諗乜。」
「我係不折不扣既男仔，唔知都好正常姐。」
「呢個年齡既女仔對拍拖、愛情充滿左一種幻想。特別對啲大哥哥，猶其你呢啲成日扮到好識照顧人既”大哥哥”。」
其實又真係得我單方面認為柔柔當我係一個大哥哥。
如果一個女仔唔中意你，對你無野，又點會成日搵你?
仲要特登去圖書館撞我，一齊溫書。
「係喎，你地就踢學界啦喎，準備成點。」卓芝再問我。
「應該無咩問題，分組賽應該出到線，不過去淘汰就難講啲。」
「咁柔柔會唔會黎睇你?」卓芝總係將所有同柔柔掛勾。
「佢話過想去睇。」
「其實點解你好似對我同柔柔既野好好奇咁既?」我繼續問卓芝。
「八掛下姐。」我無再問落去，咩原因都好，我都相信卓芝唔會傷我既。
畢竟佢係我其中一個最好既朋友。
我地係太古行完街食完晚飯之後，卓芝話想食糖水。
我就陪左佢去柴灣食糖水，順便去佢番屋企。
「我地都好似好耐無咁一齊傾過計出過街。」卓芝講。
「緊係啦，你個家楓點會比你同男仔出街呢?」
「唉，有時都覺得幾辛苦。」卓芝又開始呻佢同家楓既野。
「咪咁負面啦，你地一定有好多開心既時光，唔好淨係逗留係負面既回憶入面啦。」
「有既，不過唔係而家囉，而家既佢好似變左咁。」卓芝無理會我既說話，不斷向我吐糟。
「咁你地中間發生左咩事呀?」算啦，我都係比機會佢講下。
「唉，你唔明嫁啦。」
小你喇叭，至尊你個漢堡呀!!!!
我無出聲，淨係無奈咁望住佢 =_=
「我.......」計芝欲言又止咁。
「你唔想講就遲下先講啦。」我都無謂強逼佢，更何況佢地既事又唔關我事。
「其實家楓佢都知佢對你好衰，佢其實有嘗試同你傾多啲計。」
「哈哈。」我淨係笑左下，你肯定佢果啲係傾計?
食完之後我就送佢番去，送到大廈門口，卓芝突然令轉身望住我。
「其實你介唔介意自己女朋友唔係處女?」卓芝永遠都唔會轉灣抹角。
我feel到我下巴跌左落地。
你地唔好以為卓芝係細細聲講。
佢係大大聲咁問!!!!
「小姐，你有無諗過我感受?」
「Sor呀!咁你番去先答我啦。」卓芝突然醒悟佢既行為好惹人注意。
「嗯- -」我淨係想盡快離開。
番到屋企準備訓果陣，卓芝竟然打黎。
「喂............」我好不爽咁接聽。
「喂! 答我問題!」
「得啦。都唔介意既。」
「噢，我以為多數男仔都介意tim。」
「咁你拍拖係愛佢個人，唔係因為愛佢係處丫嘛。咁你同對方一諂果陣都唔知佢係咪處嫁啦。」
「咩有啲咁既人嫁咩?」
「我囉。」我口快快答左。
「白痴自大仔。」
「咁你同家楓咩事姐?」佢問完我果條問題之後令我更加好奇佢同家楓既事。
佢支吾以對一陣。
「你唔講就收線啦。」我恐佢。
「好啦，我講啦。」
「我係同佢一齊之前我有同之前果個都有做，佢知道左就好唔開心，好接受唔到。」卓芝終於講出原因。
「一齊之前你無同佢講?」我問卓芝。
「佢都無問，你會唔會食食下飯突然同人講你唔係處?」
「咁又係，正常人都唔會無啦啦用呢啲野黎做話題。」除左我地之外。
其實卓芝係中一既時候同第二間學校既中三賤男拍過拖。
中二同佢同坐既時候都有聽佢講過下。
個男仔對女朋友好衰，脾氣臭到核爆，郁下就鬧人，仲試過打卓芝。
最後個男仔好似拍厭左就同卓芝分左手。
「咁家楓有無話點處理呢單野?」我問卓芝。
「佢話需要啲時間黎接受。」
「希望佢過完年會無事啦。」
「小狼，你對我真係好。」
「傻啦，朋友黎嫁嘛，講埋呢啲野。」好彩好快就收左線，差啲以為有排講。
老子琴晚先通頂黎，要好好休息。家楓係一個近乎完美既存在，正因為自己既完美而接受唔到身邊人既不完美嗎?
老老豆豆，家楓真係好錫卓芝，只係管得太嚴。
如果當初係我同卓芝一齊，唔知會點呢?
下? 我有無中意過卓芝?
開初既時候真係覺得佢幾好。
可惜我無把握時機，加上家楓既出現，我好快就放棄左。
佢有家楓呢個男朋友我更加唔會越界。
我對佢既感覺慢慢由愛情，變左做友情。
也許就係錯過的愛情只能淪為友情吧。
有一個無所不談既朋友都幾好。
如果佢同我拍拖，可能我地而家已經分左手，阻口阻面tim。
第二日番到學校，我果然變左條乾屍。
通頂之後第二晚仲要訓唔夠八個鐘，好那辛苦。
我成面撻左係將枱到望住卓芝個位。
咁岩卓芝都同我做緊同一個動作。
我地望住對方係到傻笑。
「好攰丫!」卓芝口裡抱怨，心裡卻帶一絲既甜蜜。
「抵你死，琴晚咁夜訓屋企仲要捉我傾電話丫啦。」
「你唔攰咩?」
「你覺得呢-_-?」
呢種感覺令我回想起佢同家楓未一齊既時候。
卓芝無一副傾國傾城既女神樣，又無仙氣護身，更加無柔柔果種可見若憐既可愛。
但佢有一雙大眼，佢笑起上黎總係好甜，好想陪佢一齊笑。
起碼我係咁覺得。
假若能回到過去，也許我會全力愛上你。