Week34 Fri

琴晚我諗咗好多呢排所發生嘅事,諗點解Kit點解會粒聲唔出失左蹤,諗下我對Janet到底係唔係認真,仲諗咗一大堆假設性嘅問題,諗諗下,直到朝早先瞓著。我起身個陣已經係晏晝一點,我見到Janet send咗條wtapp嚟,約我今晚食飯,但我真係好煩,所以再一次推咗佢。

瞓到咁晏嘅我唔知有咩做,於是諗住落街行陣散下心。行咗個幾鐘之後,由於通街都係「強大的中國人」,又冇衛生又冇禮儀,攪到冇乜心機行。不過諗諗下,我女朋友Janet好似都算係大陸人喎…唉,不過點同呢,呢班低質素嘅人點同我嘅Janet比。我嘅Janet?係喎,而家我同咗佢一齊啦喎…我仲諗住第二個,好似都幾對佢唔住…

平時返屋企之前,我都會留意下個信箱,因為我老豆從來唔會拎信。今日如常咁睇有冇信個陣,我見到一封冇貼郵票嘅信,所以好肯定係有人親手放入去嘅。封信仲寫明俾我,呢一刻令我聯想到阿Kit。

返到屋企我急不及待咁打開封信。



「賓,當你見到呢封信嗰陣,你唔洗再搵我,因為我已經離開咗香港,我知道冇咗我,你可以活得更好。你一定好奇怪,點解我會不辭而別。你記唔記得你由廣州返嚟個晚,我哋嘈過嚟?我冷靜咗幾日,呢幾日你都冇搵過我,我好驚你會係呢次之後都唔再搵我。於是係今日我走左去你屋企樓下等你,我好想親口同你講對唔住,好想話俾你知我都不過係因為太害怕失去你。等咗好耐都未見你出現,正當我想打俾你個陣,我見到你係架私家車到走出黎,隔離仲係一個樣貌比我後生,比我更靚嘅女仔。初初我都不以為然,直到我見到佢走上前,而你亦都主動錫佢之後,我已經知道咩事。 

賓,其實你冇錯,但係我知道我真係冇辦法再以朋友身份去見你,所以請你原諒我嘅離開,你真係唔好再嘗試去搵我,就當留返半點尊嚴俾我,等我可以走得瀟灑啲。或者有一日我可以再一次以朋友身份出現係你面前,或者到時,大家可以好似見返一個舊朋友咁,只有喜悅,再無傷感。我同你今世注定有緣無份,個天俾我再一次遇返你,當時我都唔敢妄想可以同你再續前緣。但你之後對我嘅追求,我真係好開心,同時亦都好擔心,因為我好驚,好驚你知道我原來有個女之後,你會離開。你係一個好男人,絕對有資格作出更好嘅選擇,而我都不過係一個失婚嘅女人。雖然最後你真係選擇咗第二個,不過對你嚟講,呢個先喺一個明確嘅決定。你係第一個令我心動嘅男仔,亦都只有你到今日仍然令我感動,如果可以,我希望下一世陪伴你身邊嘅人係我,不過唔知我會唔會有咁嘅福氣呢。如果你睇呢封信嘅時候,有一點點嘅傷心,甚至內疚,咁你應承我一樣野,就係無論我哋將來點都好,你同佢都要過得幸福快樂,如果唔係我會嬲你一世架。

阿Kit」

睇到呢到,我喊咗出嚟,好大聲咁喊出嚟,望住呢封阿Kit對我最後嘅溫柔,腦海不斷浮現出我同佢一直以嚟嘅片段。我嘅初戀,一段曾經刻骨銘心嘅愛情,一個曾經最重要嘅人,我不知不覺間竟然對佢造成呢一個咁大嘅傷害,而且連最後一刻,佢都以我幸福為前題,我真係好內疚,好心痛…阿Kit,我地雖然冇機會一齊走到白頭,但你永遠都會係我心入面,佔一個好重要嘅位置,用個心好好咁珍惜。


愛若難以放進手裡,何不將這雙手放進心裡…