Week34 Thu 

係我選擇咗Janet之後,我知道我終有一日要同Kit講清楚。但係點開口呢?我知道無論點都好,我都唔可以再拖,我要講清楚,如果唔係Kit只會更傷。於是我打俾佢,諗住今晚約佢食飯順便同佢解釋。點知,我一打過去,竟然打唔通,仲要同上次Nancy嗰次一樣,已經停止服務。點解會咁?唔通我打錯,冇理由架,之後打咗幾次,結果都係一樣。 

我真係好擔心,唔知佢會唔會發生咩事,所以打咗去佢公司到問,點知佢公司回覆話佢已經辭咗職,仲要自己補錢走。到底發生咗咩事,wtapp再見唔到最後上線時間,佢個部又唔係iphone,咁只有一個可能…佢封咗我。 

我擔心到Janet約我出街我都用唔舒服為理由推咗佢。Eric見到我咁頹都忍唔住問我做咩事。 

「你唔係攪掂咗你啲感情煩惱啦咩,仲頹咩?」 



「我搵唔到阿Kit,佢職又辭咗,電話又cut咗,wtapp都封埋我,我完全搵唔到佢。」 

「客觀嚟講,咁係一件好事丫,起碼佢自動退出。」 

「佢點會無啦啦咁呀,佢又未知我揀咗Janet,我正想今晚同佢講。」 

點知Eric突然好惡咁講:「屌你條死仆街,好心你放過人啦,人哋都自動退出咗,你仲咁大費周章去搵返佢出嚟有乜作為呀?想再hurt多佢一次呀?仲要話俾佢知你揀咗第二個?人哋或者想走得有尊嚴啲啫,點解你係都要迫佢知道你最後點揀。佢都係人嚟,你有冇諗過可能佢唔想知呢?做兄弟嘅唔會話你有冇揀錯,但你而家仲走去關心人就大錯特錯!」 

我識佢咁耐都未見過佢發咁大脾氣,我都不過想至少俾返個交代阿Kit啫,唔通咁都有錯?