短篇散文集: 《顧慮太多，最後得到嘅只係白頭髮》

「我覺得你成日諗得太多 太遠啦 好似每行一步 每做一樣野都有好多 不必要既想法同顧慮出哂黎 ! 其實你想做就去做 唔需要諗太多，我有句名言 :唔柒就唔係青春! 諗咁多只會後悔」

今日再一次有人指出我呢個缺點。 

不過做人唔係應該要有周全嘅計劃架咩？ 

買野先睇價錢，再係既定嘅價錢入面考慮喜好；租屋先睇地區，再係入面選擇岩心水嘅單位；追人先睇成功率，再係成功率高嘅眾人入面揀質素。 

生活迫人，梗係錢字行頭啦；返工怕遲到，梗係就腳最緊要啦；梗係溝啲成功率高嘅人啦明知衰緊仲自掘墳墓咩。 





係現實社會就係有呢一大堆嘅潛規則，慢慢變左人屈服生活嘅籍口。 

如果買嘅野並唔係最想要嘅，咁會唔會變相哂左錢呢？租屋近公司係唔係只係俾個籍口自己瞓得晏啲呢？追成功率高嘅人而唔向高難度挑戰，其實係咪只係因為怕失敗呢？ 

你可能會話，挑，你識條春咩。我點會唔識，我正正係呢類人嘅其中一分子。 

但當你買完件野返到去先發現真係唔係咁鍾意嘅，你就會話，早之俾多幾十蚊買另一件啦； 到租到間屋係正公司對面啦，點知一個唔該冇較鬧鐘，又要遲到，早知買幾個鬧鐘咪算囉，搬乜鬼屋丫；好啦，你不廢吹灰之力溝左個各方面都平庸到你跟本唔知點形容嘅人返黎，你又係到諗，早知溝呀邊個邊個啦，反正咁多人鍾意佢，溝到嘅我就係winner，溝唔到嘅又唔止我一個loser。 

人往往係件事發生左之後先識後悔，講到尾可能就係因為諗得太多，怕痛，怕失敗，但有邊個唔係靠跌倒黎學識行路？ 





當你嘅財產唔會因為多幾十蚊或少幾十蚊而令生活有所影響，點解唔以心頭好行先呢？當你咁緊張份工，緊張到要個人搬黎就間公司，點解唔索性早啲起身呢？當你睇愛情睇到唔理好醜，但求就手，就算隔離個件係排都照受個陣，睇怕你都唔會介意旁人白眼架啦，既然係咁，點解唔放手一搏，全力追求佢呢？衰左俾人笑，同拖住件異形俾人笑，前者可能仲好受啲添喎。 

呢個社會上，當你有太多顧慮，所得到嘅未必係你想要嘅野，而個啲你想要嘅，想做嘅，想講嘅，你收收埋埋，隨住時間慢慢咁淡忘，失去。到最後，顧慮咁多，唯一得到嘅，可能只有白頭髮。