我叫呀源,大大話話做左廿幾年人,你問我暫時覺得自己做得最成功嘅事係咩?大概係趕時間個陣對人講左句「唔該借借」。 

由細到大我係班上面嘅存在感就好天上面啲雲咁,多一舊唔多,少一舊唔少,真係唔講都唔知原來有我嘅存在。 

成日聽人講,拍拖嘅感覺好甜好開心,個陣我仲以為拍拖係食得嘅添。 

由小學到中學,唔好話溝女,連同女同學傾計嘅機會都冇。至於朋友,我諗我最好朋友應該係我張床,無論我點對佢,佢都唔會有咩怨言嘅。 

或者你會問,你冇電腦電視漫畫書架咩? 有,一部有垃圾站執返黎嘅電視;隔離屋搬屋唔要嘅一部window98;人地睇到爛哂先送俾我嘅叮噹漫畫。 





部電視仲要每晚播cctvb嘅師奶劇個陣先開得兩粒鐘;電腦冇上網冇彈珠台;都唔知係咪當左我屋企係垃圾站先拎黎俾我;本叮噹就仲新奇有趣,明明黑白嘅漫畫點解變左彩色嘅,仲要彩色左係個對話到架喎,唔緊要,咁樣我就可以發揮我嘅創作力量同幻想啦。 

咩呀?我有冇咁窮?我呢啲,碎料黎啦,對面屋呀大雄窮到條底褲穿窿穿到得返條橡筋都要日日著住佢呀。 

我呢啲身世當然冇人肯埋我身啦,連男同學平時對住我都避之則吉。久而久之我開始慢慢喪失左我嘅社交能力,不過由於小學去邊都有人帶住,我當然唔多洗出聲啦。

但升到上中學問題就黎啦,間學校要搭小巴上山架喎,仲要係中途站黎,點開口叫有落呢?真係唔明,點解啲小巴唔可以學下巴士公司咁整返個鐘係到,萬一有啲語言障礙(啞)嘅都落到車丫麻。當然,我內向姐,我唔係蠢架麻,我諗到條絕世好「橋」。每朝早半個鐘出門口,係小巴站到等到見到有同校嘅再上車,咁嘅話,我自然唔洗開口叫落車啦,幾醒,唔洗羡慕我。 

終於,捱到中五之後,我又自知冇咩能力讀上去,咪諗住出去打工囉。問題又黎啦,見工要講野架喎,係經過5年嘅中學生涯入面,我嘅自閉能力亦都升級到另一個層次,我連買支水都要寫紙仔。而我唔開口嘅主要目的當然唔係因為講唔到野啦,而係為左大家著想,我怕我講野仲慢過寫字,影響後面排緊隊嘅人就唔係幾好啦係咪先。 





連工都冇得搵,咁點算,唔驚,係呢12年入面,我屋企由嚴重赤貧變做一個收入正常嘅家庭,有時我仲有得過下上流社會嘅生活。點解?因為我得閒會去碟鋪租返隻法國電影,再去買盒3合1咖啡,間中有得過上流社會嘅生活都幾過癮架。又由於我屋企收入正常左,我又唔洗再要買教科書,交乜費物費,屋企自然多左少少錢周轉,養住隻寄生蟲啦。 

就係咁,我每日過住鍵盤戰士嘅生活,睇邊條友唔順超嘅就同佢炮過。由於打字可以慢慢諗,唔洗經過把口,所以網上嘅我可以稱得上妙語連珠,字字珠璣,人稱網路鬼見愁。就係咁,我變成左一個不折不扣嘅隱青。 

有一日,由於屋企冇哂營多,連少少食得嘅野都冇嘅時候,我迫住要落街買老麥啦。一打開個鞋櫃個陣,諗起原來真係好耐都冇出過門口,有幾耐?大概幾個暑假咁啦。落到老麥先驚覺自己冇帶紙筆,真係今翅仆街鳥,我點叫餐呢?好彩我天生聰明,到我個陣,我舉起左三隻手指,代表3號餐。之後個問題先大獲,飲咩?我明明想飲芬達,但又唔知應該點做,最後唯有做左個最易做嘅飲品,冇錯,就係7up。係我以為可以俾錢等攞餐個陣,終極大佬先出場:先生,係到食定拎走?真係奧雪木瓜露(oh shit my god no),你做收銀做到好藉寞咩,係咁問我問題你有咩企圖呀,想識我,你憑咩呀。係我諗緊應該點去做拎走呢個動作之際,後面啲人已經等到開始鼓噪

「快啲啦,係咪買架」「唔買走開啦阻住哂」 

由於我已經習慣左呢種聲音,所以我直接無視左,但正當我以為我百毒不侵之際,我聽到一把好天真嘅聲音係到問: 





「個哥哥點解唔出聲嘅,佢係咪啞架」 

我崩潰,頓時跑左出去,一路跑,一邊感受到旁人投向我嘅奇異目光。 

毒又有罪咩?唔敢講野都要俾人歧視,咩世界黎? 係我一路行返屋企嘅途中,我見到個打扮mk 嘅女仔係到自己行緊,我行前啲睇,佢相貌尚算清秀,冇化妝,帶點氣質美女feel。簡單啲講就係好pure好ture,正當我幻想緊問佢拎電話,加深認識嘅時間,唔知邊到閃出黎嘅一個死mk仔行左去佢隔離,大模斯樣咁問佢攞電話。跟住個mk仔係mk妹旁邊耳語左幾句之後,個mk妹忽然用打量嘅眼神掃一掃我然後望一望條mk仔,跟住爆出一陣大笑。 

我唔知條死mk仔同mk妹講過啲咩,但應該都唔係好野,而且仲可能關於我嘅添,於是我又開始跑返屋企。 

點解,點解毒就連識女仔嘅權利都要俾人剝削?點解毒就要淪為他人嘅笑抦?唔得,唔可以再係咁,我要脫毒!!!!!!

當我立定決心脫毒個陣,我冇學其他巴打咁開post求教,又或者去cheap之堡置過哂啲戰衣。我只係打開個電視睇住廣告,佢講一句,我跟住講一句,由開始個陣佢播哂成個廣告我先講得兩三句,到而家我終算可以同個廣告同步完成。 第二步就梗係搵工啦,由於我咁內向嘅性格,加上學歷又唔高,搵得嘅都係搬貨跟車,唉, 是但啦,做住先囉。

開始做份工冇幾耐,我同啲同事都總算講到幾句野,唔會再俾人問都仲係口啞啞。好啦,而家話哂都叫有份工,又好似脫左毒,不如試下識返個女仔啦,總好過日日係屋對住「這邊的成人影片」黎自我安慰。 

但係搬運公司基本上清一色麻甩佬,而我個人本身並冇煲老藕嘅習慣,所以我都唔知應該由咩途徑去識女仔。聽講智能手機好似好多交友apps架喎,早排先爆出幾單wechat呃蝦條嘅新聞,睇落wechat識女仔應該幾易,於是我就問老媽子拎左幾千蚊話想出部新電話,出糧俾返錢佢。你地而家肯定好奇怪,點解咁大個人,都冇部智能手機跟身,咁我用咩架,梗係用電話界嘅傳奇,nokia3310啦當時出1000幾蚊用到成10年喎,圍返100蚊1年,幾抵玩呀。 





言歸正傳,既然出新手機,我梗係諗都唔諗出左部iphone5啦,拎住部名牌係手,自信心返哂黎。叉完電之後就開始左我嘅獵食之旅,之前我都講過,網絡上因為打字嘅關係,我可以完全表現出我嘅風趣幽默,氹到啲女周不時主動搵我。由於我都係一個正常嘅男人,梗係睇樣做人架啦,於是我就慢慢將打獵範圍收窄到 一個同之前提到嘅mk妹有幾分相似嘅女仔身上。係言談間發現,原來佢都係住我附近,仲要係單身,心諗,今次實冇死啦掛,於是膽粗粗約左佢出黎。由於我呢刻已經俾下半身控制左上半身,已經唔記得左自己嘅外型同溝通能力係致命傷。我約左佢係屋企附近嘅餐廳食晚飯,由於冇任何同女出街嘅經驗,所以我乜都冇執過個樣,純天然咁應約,發來先後悔咁嘅做法真係大錯特錯。 

由於我唔去第一次約會就遲到,我提早左15分鐘係約定地點等佢,個陣我滿心歡喜咁期待跟住落黎嘅約會,我地一見傾心,有傾唔完嘅話題,佢因為怕食唔哂而想同我共享一個餐,之後海邊談心,最後送佢返屋企,大家依依不捨,最後上埋佢屋企過夜…… 就係我正ff得興起個陣,係遠處我見到一個同張相咁上下嘅女仔,問題係佢身邊有另外兩個女仔同行。唔係掛,一黎就4p,啊唔係,一黎就見埋佢朋友,當佢地愈行愈近,我就愈緊張,於是諗住扮玩下電話諗住放鬆啲啦。佢地終於到左,我都唔知幾耐冇試過同女仔咁近距離(對上個次已經係中五排隊個陣),由於我冇send過相俾佢,所以地並冇同我打招呼,而係係到打牙較。

「喂 send個信息去問下佢落黎未啦」「唔知靚唔靚仔嘅呢 睇佢講野咁叻 應該都唔差掛」「我唔理呀 一間如果毒矮柒肥是但中樣我都走架」「嘩 好似係係釣人落黎咋喎」 
佢地好似當我冇到咁係到傾計,仲要俾我聽到哂佢地講咩。心諗,我好似樣樣中齊哂喎,而家走黎唔黎得切呢?係我爭扎緊嘅同時,佢打俾我,係呢刻我同佢地有過一下眼神接觸,雖然只有一下,佢地嘅眼神充滿住震驚同卑視。我都未黎得切say hi,打俾我個個已經話:「死毒撚學人溝女,你冇鏡就搵盤水照下自己個樣先啦,屌,哂我地啲時間,咪撚再煩住我添呀,唔係報警話你騷擾我添呀」 

就係咁,現場只係留低仲未識反應嘅我。唔請呢啲就係毒撚嘅命運?真係一世都擺脫唔到? 係呢刻,無力感佔據左我全身,我成個人坐左落地到,流下男兒淚。 

過左唔知幾耐,我諗大概3分鐘至30分鐘左右,突然有人拍一拍我,當我滿心歡喜以為係佢 地良心發現而折返個陣,一擰轉頭,「嗚…呀…屌」由於我個人好有教養嘅關係,呢啲反應都係由心到叫出黎姐。我見到一個小儀嘅身高細細粒嘅身型,魯芬嘅相貌,加埋佢一開口「先生你冇事丫麻」嘅個把周獸拿嘅聲線,真係冇事都俾佢嚇到變有事,本身有事嘅應該都可以辦得身後事。 

「冇」「見你喊成咁,有咩可以同我講架喎」 

真係唔係話想歧視你,但對住你點講呀。但諗深一層,岩岩先俾人歧視完嘅我又有咩資格歧視人呢。於是,我將我頭先發生嘅事完完本本咁講左次俾佢聽,點知佢竟然係同一刻有相同嘅遭遇。我按耐住捉佢一齊買六合彩嘅衝動,慢慢同佢月下交心,亦都順理成章咁一齊去食飯。由於我俾人歧視開嘅關係,就算隔離係邊個,再多嘅歧視眼光,係我呢個百毒不侵嘅毒撚身上都起唔到作用。晚飯過後交換電話,繼而wtapp到深宵,日復如是。 





劇情發展就好似cctvb咁,我同佢經過幾個月嘅相處,終於走埋一齊。雖然偶爾係條街到見到一個個神級美女我仍然會暗自慨嘆一句 

「這些機會不是屬於我的」