恒: 
20:03「圖片」 
20:03「你睇下,佢地幾幸福,咁老都仲會手拖手行街」 
20:06「做緊咩呀?」 
20:07「食左飯未呀?唔好掛住玩呀!」 

詠: 
21:27「哈哈,係喎」 
21:27「食左啦,忙緊,遲啲搵你」 





恒: 
21:27「ok…」 

望住螢幕上嘅回復,心情既喜且悲。詠終於復我,但只係得淡淡數字,你真係有咁忙咩?你又會唔會明我嘅「算啦」同「ok…」,當中又代表住我係幾咁無奈? 其實由你話「忙」嘅一刻開始,一直都見到你上線時間不停咁更新。忙緊啲咩?明明忙緊又會不停上落線?你到應緊邊個?你知唔知我一路係螢幕嘅另一邊等你?係漫長嘅等待入面,我不停咁望住你上落線,終於等到你搵我嘅一刻。

詠: 
23:56「得閒了」 
23:56「有咩歌好聽架?」 

恒: 




23:56「嘩大忙人終於得閒啦」 
23:57「um…不如我將我嘅play list sd哂俾你丫」 

詠: 
00:03「好丫,唔該哂你呀,你真係好人啦」 

恆: 
00:27「圖片」 
00:27「圖片」 
00:27「圖片」 




00:28「wtapp sd唔到咁多嘅檔,所以我將啲歌名打哂出黎俾你揀,你聽完鍾意我再sd俾你啦」 
00:29「明知自己易病就早啲瞓啦」 

再一次回到沉默。終於我都係要面對一個一直逃避嘅殘酷問題,其實…你只係唔想回我?一諗到呢到,腦海一片空白,鼻頭一酸,眼淚唔爭氣咁流左出黎。即使知道呢一個係事實,但我偏偏選擇逃避,死心不息咁繼續發送信息,希望所送出嘅信息會得返一個tak,寧願搵籍口令自己相信,佢已經瞓左。其實我都知自己好煩,不停咁去send信息俾你。其實「文字上嘅試探其實都係因為出自內心嘅不安,就算明知我同你只係普通朋友…甚至連朋友都講唔上嘅時候,我仍然會抱住一絲期盼,希望你終於留意到我……」

恒: 
00:47「早啲瞓啦,仲玩,第二日起身再玩都得架姐」 

其實我好眼瞓,第二日仲要返工,而呢一刻仲係到漫無止境咁等,等一個冷冰冰嘅回應。我其實只係想等到確認你瞓,我先可以瞓得安心。雖然呢個做法好白痴,但無論係等到你話要瞓抑或等到你回復嘅心情都覺得一切都值得嘅。只要見到你回我,就算係幾攰嘅感覺都一掃而空。

詠:
00:58「唔該哂呀」

恆:
00:58「唔洗,仲唔瞓,好夜啦喎」




00:58「又話夜瞓易病,早啲瞓啦」

終於,我都係敵唔過睡魔既入侵……

恆:
01:47「我瞓先啦,你都唔好咁夜瞓啦」

係有左智能手機之後,起身就留意wtapp或其他通訊app會唔會有通知已經成為現代都市人每日嘅生活習慣。而我同大家都係差唔多,唔同嘅係,我留意嘅只係佢嘅最後上線時間,或者你地會覺得好變態,但我都不過係想確定一下佢大約幾點先瞓。
「上次上線 於今天上午02:44」以上嘅對話每日都不停咁重複,唯一興幸嘅係,至少佢想搵人「 攝時間」個陣都會諗起我,直至一日我連唯一「攝時間」嘅功能都失去……

===================================

===詠===
三年前,我暗戀左一個學長......唔係,其實係明戀先岩,始終當鐘意一個人既時侯,真係好難掩蓋住對佢既心,無時無刻都想係佢身邊,好想了解對方更多,好想係佢心目中存有一定嘅地位,可能就係因為咁,攪到身邊所有人都知道我鐘意左佢,緋聞多左,學長終於有一日頂唔順,間接咁比左張好人卡比我。
雖然我收到個刻,個心好似比十幾把刀插住咁,我都無表白就收左卡,依種出師末捷身先死嘅感覺令我好唔甘心,同時間又令我好沮喪。不過都好,由於收卡過程都好順利,都無咩好難睇既畫面同尷尬,我地都仲可以保持住朋友既關係,就係因為我嘅唔甘心,我覺得學長仲未了解到我,仲未真正感受過我對佢既愛,佢只係頂唔順身邊嘅流言先逼住派卡,我相信總有一日,我一定用我嘅誠意感動到佢!!!!





詠:
10:46「我起身啦,你又咁早嘅﹖」

K:
11:01「係呀,約左人麻」

詠:
11:02「約左女朋友呀﹖」

K:
11:08「約左fd咋麻」

詠:
11:08「今日星期日喎,都唔陪女朋友,佢唔炸你型咩﹖」





K:
11:13「我都冇女朋友」

詠:
11:13「下,你咁好都冇女朋友,你呃人嘅」
11:13「係呢,你鍾意邊類嘅女仔架﹖」
11:14「好似我呢類呢,你覺得點呀﹖」

K:
11:27「真係冇呀」
11:27「um…合眼緣就得架啦,有feel最緊要」
11:28「你幾好丫,不過我鍾意啲成熟啲嘅多」
11:28「唔講住啦,就遲到」






我幾好﹖幾即係幾多呀﹖唔通我唔夠成熟咩﹖唔通我唔合佢眼緣咩﹖唔通佢對我冇feel咩﹖咩係眼緣,咩係feel﹖我google左成個星期,得出嘅結果都係同我搵「比自己更靚嘅女仔」嘅結果一樣,沒有符合你的搜尋。K係我嘅學長,我足足暗戀……好好好,明戀左佢三年,點解咁都冇俾我嘅誠意所打動﹖冇俾我嘅堅持所感動﹖我真係有咁差咩﹖

詠:
11:45「好悶呀」

恆:
11;45「咁早起身嘅你」
11:45「冇約人咩」
11:45「見你咁可憐,等本大少陪下你啦」

『…………』一段持續左大約45分鐘嘅對話

詠:
12:34「唔講住,出街」

恆:
12:34「好啦,咁得閒搵我啦,88」

點解有人可以咁自大,明明係俾我用黎攝時間,竟然講得出可憐我先陪我,擺明就係本小姐可憐你先俾你幫我解悶啦!Fine,本小姐大方就唔同你計。放心,我的確會係「得閒」(攝時間)個陣先搵你,嘻嘻。

恆:
13:26「唔好掛住玩呀,記住食飯呀」
13:26「得閒搵我啦」

點解會有人煩成咁,你冇其他野做架啦咩,成日係到煩住哂!!!

K:
19:48「做緊咩呢」
19:48「好肚餓呀,你食左野未」

詠:
19:49「同FD行緊街咋麻,我都好肚餓!!!!!!!」

K:
19:50「我而家係MK,你係邊呀,,不如過黎一齊食丫」

詠:
19:51「好喎,我係附近咋,等我一陣,而家過黎」

「我有啲事走先呀,sorry呀,下次再出黎啦」我對我班姐妹講。係「附近」嘅我即刻由荃灣飛的到旺角,點知又收到煩人嘅信息,到底呢個人有冇自知之明架,唔回佢仲繼續send黎。

恒: 
20:03「圖片」 
20:03「你睇下,佢地幾幸福,咁老都仲會手拖手行街」 
20:06「做緊咩呀?」 
20:07「食左飯未呀?唔好掛住玩呀!」

詠: 
21:27「哈哈,係喎」 
21:27「食左啦,忙緊,遲啲搵你」

恒: 
21:27「ok…」

為左唔俾佢繼續搔擾,我決定打發左佢先,以免俾佢破壞呢個難得嘅飯局。應句ok都要加個「…」應得咁委屈咪唔好應囉,最憎人扮哂無奈咁扮埋啲咁既符號,真係黑人憎!

K:
23:00「返到屋企啦,多謝你陪我食飯呀」

詠:
23:01「唔洗,反正我都肚餓麻」
23:01「係呢,平時你係屋企做咩,我成日屈係屋企好悶呀」

望住不停更新嘅上線時間,點解都仲係唔回我嘅﹖頭先食飯都好地地架,點解無啦啦會咁架…﹖反正要等,都係沖涼先啦。
──半小時後──
點解仲未回架……,或者佢有野做,忙緊姐……
搵人解下悶先

詠: 
23:56「得閒了」 
23:56「有咩歌好聽架?」 

恒: 
23:56「嘩大忙人終於得閒啦」 
23:57「um…不如我將我嘅play list sd哂俾你丫」 

詠: 
00:03「好丫,唔該哂你呀,你真係好人啦」 

恆: 
00:27「圖片」 
00:27「圖片」 
00:27「圖片」 
00:28「wtapp sd唔到咁多嘅檔,所以我將啲歌名打哂出黎俾你揀,你聽完鍾意我再sd俾你啦」 
00:29「明知自己易病就早啲瞓啦」

乜而家啲人咁鍾意管人架﹖幫我做個少少野就管呢樣管個樣,你要瞓自己唔識去瞓咩,係到管住哂。算數,都係一路睇書一路等K回我算啦。唉……點解K咁耐都唔回我架,你知唔知我等得你好苦呀……你到底忙緊咩﹖你又知唔知我等緊你架……我好怕會煩到你…不過我真係好在意你呀!
恆:
01:47「我瞓先啦,你都唔好咁夜瞓啦」

麻煩人終於瞓左,我自由啦!唔洗怕俾人煩住,呢刻先係我嘅自由時間呀,心情都得別輕鬆。望住K嘅最後上線時間停留左係「01:35」,係咪瞓左呢﹖點都瞓都唔話聲我知﹖我都係send多個信息俾佢,睇下佢瞓左未都好。唉……你明唔明,對我黎講「文字上嘅試探其實都係因為出自內心嘅不安,就算明知我同你只係普通朋友…甚至連朋友都講唔上嘅時候,我仍然會抱住一絲期盼,希望你終於留意到我……」
佢都仲係唔應,算啦,我都係瞓先,聽日再搵佢啦……或者等佢記得再搵我啦……

===================================

呢一個故事並唔罕見,其實每一日都會發生係我哋身邊,大家各自守候係鍾意嘅人身邊,期盼有一日,佢會留意到自己,從而忽略左守候係自己身邊嘅人。可惜事與願違,我哋最後嘅結果可能只係親眼睇住佢同第二個人開始,而自己永遠都只可以做旁觀者。故事中嘅男主角睇落好可憐,但又有人迫佢向住一個冇可以嘅人付出咩﹖今時今日係香港當兵嘅雖然唔洗上場殺敵,但要有比上戰殺有更好嘅精力(精神加體力),oncall時間比醫生更長,比搬運工人更好嘅體力先可以守得住呢個咁卑微嘅位置。而女主角呢,旁人睇落好似好絕情,但唔通又有錯咩﹖我諗冇一個人會想俾個自己唔鍾意,而且仲煩到爆廠嘅人所纏掛。而女主角所受嘅待遇,其實已經遠比男主角好,女主角所鍾意嘅對象雖稱不上有問必答,長時間陪住佢,但至少回應都不至於冰冷無味。在於男性角度,應該所有人都希望成為文中嘅K吧,俾女性鍾意且主動追求,應該係大部分男性夢寐以求嘅人生。

做兵嘅,唔好抱怨,冇人迫你
而被神化嘅,不妨對兵仔好啲,始終
「我不過是個人 都會難堪 不想充當他替身」

===================================

後記

瑩:
18:45「做緊咩呀,好悶呀」

恆:
19:04「冇呀」

瑩:
19:05「做咩呀,你好似唔開心喎,女神唔理你﹖」
19:05「等我陪你傾下計啦」
19:06「喂喂」
19:06「我唔阻你啦,得閒搵我啦……」

『… …』

我哋只喺將心思都放哂自己最重視嘅人,然後呢種單向付出嘅遊戲就會不停循環不息,你等佢,佢又等佢,直到一日連等嘅機會都冇。

終於有一日,呀恆發現自己發出嘅wtapp已經變成得返一個tick,詠嘅上線時間亦都冇再顯示。恆嘅內心雖然有無限嘅唏噓、感慨,明明好想喊一場,但就欲哭無淚,佢知道,終於連「攝時間」嘅作用都冇埋。

有人話過,習慣可以用21日去改變,如果詠曾經習慣有我嘅,點解可以做得咁決絕﹖我唔知,或者佢從來都冇習慣過我喺佢身邊,或者佢只係等緊一個機會,一個同我斷絕來往嘅機會,或者……其實呢個世界冇或者,亦都冇如果,只有結果。結果如今就擺係眼前……

21日後,信息仍然處於一個tick嘅狀態,應該要習慣冇左詠嘅呀恆仍然無止境咁等待……

記住,你眼中的瑰寶,可能只是別人眼中的「微‧不‧足‧道」

完……