今日星期日,我一早起身就見到呀爸坐咗係到睇電視。本來呢個畫面並唔奇怪,一個打工仔放假係屋企睇電視,好合理丫。

不過佢睇緊嘅竟然係cctvb近呢十幾年嚟每個星期日上晝九點半例牌會播嘅「xx戰隊」。其實我都想講得出套嘢叫咩名而唔用xx代替,奈何呢類日本卡通好似死唔斷氣咁,每套完咗之後,改過個名換過套衫又有新一輯出街。唔信?咁多年嚟你聽過幾多套「xx超人」,「蒙面超人xxx」呢?真係集集差唔多內容,唔同嘅可能只係主角啲名,套衫,要做嘅嘢都係拯救世界。日本出咁多呢啲卡通,拯唔拯救到佢哋嘅電視世界我唔知啦,不過應該都拯救咗玩具反斗城嘅世界。每逢新一輯出街,各大玩具鋪都會擺放唔少呢啲劇嘅人物玩具,細至變身器,大至機械模型。

「媽咪,我要買呢個!」「呢個,你上個月咪買咗囉。」「唔係呀,呢個唔同架,都唔同人物!」

呢啲對白好熟口面咧!得閒行過啲尊櫃一定聽唔少。

其實我想講嘅並唔係呢啲劇集,而係一個中年男人放假竟然晨早流流起身睇卡通片,攪咩呀?





「你做咩無啦啦睇呢啲呀?」

「好睇咪睇囉。」

「吓?」

我呀爸應得好理所當然咁。的確,好睇咪睇係幾理所當然,但係套嘢好似已經唔係你呢個年齡層睇架喎。

記得細個嘅時候,個個星期日我都會起身追呢啲「xx戰隊」,而我呀爸亦都會陪係我身邊一齊睇。當時啲政府宣傳片成日都話:「家長應陪同子女收睇電視節目。」而我亦都係覺得當時嘅呀爸只係盡緊家長嘅責任。到之後我大咗愈嚟愈少追卡通片,寧願放假瞓耐啲都唔願起身。由以前邊個主角叫咩名都記得,到之後連播緊個套叫咩名都已經冇咩印象。





當人愈大,就愈難繼續幼稚。可能係個人經歷多咗,成熟咗,又或者只係怕被人標籤為幼稚。係呢個社會上經歷得愈多,遇過好多迫自己成長嘅人同事,到最後就會屈服係人愈大愈要成熟呢個社會嘅潛在設定上。

呢樣係普遍嘅人嘅諗法。

但今日望住呀爸,一個比我經歷更多嘅人,佢正正做緊啲會被標籤為幼稚嘅事。而我係旁邊望住,竟然唔覺得呢件係啲咩幼稚嘅事。反而好佩服呀爸佢呀有「童真」。

冇錯,係童真。一個看似唔會用嚟形容成人嘅字,甚至其實同幼稚同義嘅字。不過又係經過人與人之間嘅潛在設定,好少有人將童真形容成人。但咁唔代表成人唔可以擁有童真,就好似呀爸咁,成日都會因為打機打到俾呀媽鬧。其實一個人即使童心未泯,只要佢做到佢嘅身份上嘅角色,就已經足夠啦,唔係咩?

反之,成熟一詞就好似為一啲失去童真之心嘅人所涂上嘅保護色一樣,以指責他人幼稚嚟掩飾自己無辦法幼稚嘅事實。





到底被人話幼稚嘅人可悲啲,抑或話人幼稚嘅人可悲啲……