短篇散文集: 香城市民的悲歌----689政權

從前，有一個叫香城嘅地方，佢係一個特別行政區嚟嘅。隸屬於一個叫「強」嘅國家，簡稱強國。

雖然同一國家，但實行兩個制度架，所以香城要個特區首長管治。當年2012年，第四任行政長官係7月1日正式上任。

佢就勁囉，由香港1200個有票嘅人手上得到大拿拿689票，大比數當選。但佢上任之後，無論係佢抑或係佢嘅部下都爆出唔少醜聞，潛建呀，酒駕呀，劏房呀…真係估佢唔到呀。

當時選舉前佢仲理直氣壯咁指出佢嘅對手唐唐有潛建，唔應該俾呢啲知法犯法嘅人當選，係恥笑對手落選之際，俾人踢爆佢都有潛建。不過事後佢由死撐話冇潛建，到冇講過冇潛建，果然沒有最柒只有更柒。

唔記得話俾大家知佢個名，人哋有名架，佢叫狼陣鷹呀，咪再叫人689啦。啊，狼陣入面嘅鷹呀，咪啫係25仔？！





佢上任後自持有強國撐腰，施政都不計後果。先有推國民教育引萬人圍政總，施政報告又紙上談兵，再係7月1日引數十萬人上街遊行。

你以為佢識死會聽下民意？咁你就錯啦，係2010年8月23日發生嘅馬尼拉人質事件發生3年後，政府仍然闊佬懶理，指意政府要求菲律賓道歉？你瞓醒未？

你問，菲國唔肯道歉關香城政府咩事呀？

台灣漁民被菲國海防隊槍殺，台灣政府出面，不出三個月道歉兼賠償。

如果你話：「咁可能係因為海防隊係官方隊伍啫。」





咁都可能係689無能啫，連同人會談個陣都係以一個好「嚴肅」嘅「微笑」去對代菲國總統。

「咁可能係佢認為微笑代表尊重啫。」

的確微笑係尊重人，但我未見過有人講數個陣會對住敵人笑住咁講「屌你老母」囉。

係上任以後民意不停跌破新低嘅689眼見自己嘅民意插水，諗住爆出發牌事件嚟轉移大家對菲國人質事件嘅視線，以及挽回返少少民望啦。點知條白痴仔係三間申請發牌嘅電視台入面，除咗唔發俾眾望所歸嘅香港電視之外，其餘兩間都可獲發牌。

係外間話佢瞓醒戇鳩鳩嘅同時，其實佢都幾有勇氣，接二連三咁挑戰民眾嘅底線。





點解佢可以咁夠膽？講個秘密你知丫，佢黑白兩道都有人照架麻。

話說佢有次落區，有人到場示威，即時俾佢啲黑道支持者打啦。

「吓？啲警察唔做嘢架？」

就係！直頭視而不見，打正旗號撻朵都唔拉呀。

「嘩，咁政府咪即係又紅又黑，玩哂啦。」

不過正當所有人都以為689政權玩哂嘅時候，各大論壇都有人不約而同咁自發性發起遊行，甚至有人提議即時佔領中環。係經過一輪比起行政會議更有效率嘅論壇與論壇間之商討後，將遊行日子定為10月31日，萬聖節嘅上午11點。決定為689帶嚟一個比撞鬼更驚嚇嘅日子。

係日子確定後，大量網民紛紛表示會參與遊行。但基於咁多位攪手都見識過網民講就天下無敵嘅威力，對遊行人數都唔敢抱太大期望。但遊行前要提交嘅通知書，事前準備，佢哋都做好哂，寧願到時冇人總好過毫無準備咁俾人告非法集會。

話咁快，終於到咗約定當日。攪手們一大早係維園附近拉起遊行集結點嘅橫額，面面相覷咁等待時間一分一秒嘅來臨。





係約定時間前嘅半個鐘，終於有第一個人嚟到，但係大家都未敢鬆懈，生怕呢個人就係今日唯一嘅一個支持者。不過好快，佢哋擔心都變得多餘，隨住時間一分一秒咁流走，愈嚟愈多嘅人嚟到現場，以行動支持香港電視，踢689落台。

遊行當日，官方數字指出大約有10萬人上街，但民陣數據顯示是次上街人數足足達70多萬人，佔咗全城嘅十份之一。

「嘩，有冇咁誇張呀？」

遊行發起人表示香城人係積怨已久嘅情況底下，連想揀電視睇嘅自由都被剝削，擔心未來嘅自由度會被進一步收窄所以大眾比以前更加積極企出嚟發聲。

亦都有出席遊行嘅婦女表示：「攪錯呀，剩係發多兩個台，明明有三個台爭架麻，咁我之後咪少咗個台睇囉。」

唔理上街有咩原因都好，今次史無前例咁多人上街都引起強國方面嘅高度關注，強國最高領導人為咗平息民憤，暫時要求689休假，其職務由林鄭暫代。並承諾下一屇行政長官可由市民普選誕生。

係全香城市民熱烈地彈琴熱烈地唱嘅同時，另一邊廂嘅689同原本支持佢嘅黑道中人起咗爭執。





「你話照有你一日都會照住我哋啲場架喎，你一放假咋，啲皇氣日日嚟清場，條數點計先！」

「係計數與唔計數之間係有好大嘅討論空間嘅，希望大家抱住和平，理性嘅態度去處理事件。」

語音未落，一眾黑道中人已率領門生將689圍堵。

係689大宅入面嘅家人見狀即刻報警。但原來警方方面已經向各單位下達指示，之前689要求見到呢班人無論做咩事，只要唔涉及殺人放火都唔好插手，所以並冇任何警方接報到場。

係經過一輪虐打，同大宅被洗劫一空嘅情況低下，689就猶如過街老鼠咁，冇人施援手，連老婆都走埋佬，689政權就係2013年12月31號正式結束。新一年，

香城市民都期望可以有新嘅開始，不過又有冇可能實現呢……？