[有沙入眼]是咁的，我嘅職業係幫想自殺嘅人寫遺書: 213.月經

「做乜無啦啦要拜我媽咪？」miki一路揸車一路問

個問題其實應該係，點解你唔拜

「等你體驗下清明節氣氛。」

我唔會逼miki拜佢老竇同後母，比著我都唔會拜

「你平時都唔會咁多事架喎。」





「你咪當我今日m到。」鬼叫我睇唔過眼你唔拜山咩

「男人都會黎m架咩？」

「精神上會架，雖然條巨龍唔會流血。」

「黎m會流血架咩？」

我轉頭，望向miki，我啱啱係咪⋯⋯聽倒啲奇怪嘅發言？





「你知黎m係咩黎架可？」我確認下miki係咪又真心膠過龍

「知呀，月經丫嘛。」

「咁你唔知黎m會流血？我係男人都知喎！」

「以前中學生物堂有話會⋯⋯咩⋯子宮內膜脫落之嘛，我以為好似甩皮咁炸喎，原來會流血咁恐怖架咩？」

作為女人，絕對無可能唔知嘅生理現象，miki竟然唔知





車，停左落黎

「咁你知唔知m巾係咩？」

「吓？女人尿片囉，唔係咩？」

「你唔會奇怪點解個個要用，你唔洗用咩？」

「又無喎，你見個個戴口罩都唔一定要帶埋一份加嘛。」

我望住miki，開始了解到底係咩事

「你係咪，從來無黎過m？」