「嗰陣就係咁,所以我去左社工姐姐屋企住囉。」

原來當年,9年前超人哥哥,即係阿志救左miki之後,因為唔放心,就交左比當時仲讀緊社工嘅阿文照顧miki一段時間

「咁我始終男人嘛,你女人方便啲,幫我睇住miki先啦。」

「佢啲親戚呢?」

「有錢人去哂外國嘛,我搞完啲手續就送佢去收容機構,呢一兩日住喺你度先。交比你我最放心。」





miki一路聽佢地講,個頭就左搖右擺,阿志講野就搖去阿志度,阿文講野就擺去阿文度

「唔知係咪因為我可愛,社工姐姐真係收留左我喎。」你嗰陣都16歲,應該唔係貪你可愛,係怕你on9得滯唔識照顧自己

我叫阿文,讀緊社工,你可以叫我文姐姐

miki笑下:「社工姐姐!」

後來miki又轉轉折折入過一啲收容所,又見心理醫生又見社工,最後先翻自己屋企住





而成個過程,阿文一直同miki keep住聯絡,miki得閒又會上阿文屋企住一陣咁,總之就係變左好朋友

「超人哥哥救左我個身,社工姐姐救左我個心。」佢好得戚咁講

我反而有啲好奇當時阿文做左啲咩咁巴閉

「無喎,陪住我囉。」

「就係咁?」





「就係咁炸。」

我以為佢會用咩特別嘅輔導技巧,但係當時嘅阿文仲未讀完社工,應該有啲野學左都未敢用

所以就咩都無,淨係一直,陪住miki