[有沙入眼]是咁的，我嘅職業係幫想自殺嘅人寫遺書: 397.林伯
我嘅客人，係個上左年紀嘅男人，睇落似70幾歲
頭戴畫家帽，大四方老花眼鏡，揸木拐杖
個樣有啲似姜大衛，睇黎後生應該都係一個美男子
「世侄，你信唔信呢個世界有報應？」
佢叫林伯，原來62歲，如果我老豆未死，應該同佢差唔多大，不過林伯睇起黎比佢實際年齡老好多
佢介紹完自己，我都未講我個名，佢已經用「世侄」稱呼我
「自己嘅孽，由最重要嘅人承受，就係報應。」
一個星期前，林伯個老婆阿娟因為子宮頸癌而死
「可惜最後，佢都記唔起我係邊個。」因為有老人痴呆嘅關係，直到死，阿娟都記唔起一直守喺身邊嘅林伯係咩人