[有沙入眼]是咁的，我嘅職業係幫想自殺嘅人寫遺書: 433.凶殺現場

距離獨立屋一小段距離外，係另一間細啲嘅屋

聽講嗰家人就係miki唯一嘅鄰居，但係自從佢地發現miki父母嘅屍體之後，就好少再同miki有來往

「其實住呢度都幾危險，死左都無人知。」

無保安唔洗講，連閉路電視都無裝到

「不過好就好在無人知，做賊嘅都唔會咁麻煩過黎偷野啦。」咁偏僻嘅地方，無人知，某程度上都係安全嘅





停車場有一條走廊通向大屋，所以我地唔駛再淋雨

miki帶住我行到雜物房，再開門，就到客廳

「唔撚係掛⋯⋯」

miki間屋大我一早就知，佢都話過我間屋仲細過佢廁所，所以我唔係讚嘆間屋大

而係比客廳嘅黑紅血跡嚇左一跳





雖然由血跡嘅紋路睇得出有馬馬虎虎咁清潔過，但係大致上仍然保留左死亡現場嘅慘狀

比如地板有攤模模糊糊，類似人形嘅血跡

仲有滲入牆內，少少化開嘅紅花

「阿金？」

「吓？咩？」





「做咩呆左咁？」

「正常人都會嚇一嚇啦下話？你做乜唔整乾淨佢呀？」

miki聳一聳搏頭：「啲血滲左入地板同牆度，蝕得太深整唔乾淨，我咪費事搞。」

停留喺屋企長達十年嘅血，連腥紅都已經腐成黑紫色，深深植根於牆身同地板嘅空隙

佢拍一拍我：「唔駛驚喎，血跡黎姐。」

嗰一刻，一陣令大腦麻痺嘅寒意由miki嘅手掌衝入我體內