面對miki決定自殺,我又做倒啲咩野?作為阿金,愛佢嘅人,咩都做唔倒

真係諷刺到極點

作為遺書代筆,唔愛佢嘅人,反而可以完成佢最後嘅心願

既然係咁,係時候捨棄附帶無謂感情嘅身分

「你肯定要寫遺書?」





miki直望我對眼,點點頭:「肯定。」

我聽完,合埋眼,深吸左好長嘅一口氣,慢慢呼出黎

打開眼

「簡單咁講,呢封遺書,亦係你寫比男朋友嘅最後一封情書,啱嗎?」

miki好似由我嘅眼神同語氣之中察覺倒我已經下定決心,所以欣慰咁笑左一下





「嗯。寫得情深啲呀,我想我男朋友知我真係好愛佢,唔情深唔收貨架。」

「可以同我講下,你地兩個嘅經歷嗎?」

miki就開始講,話同男朋友因為工作認識,一齊見證過好幾個客人嘅生死,又話喺過程之中慢慢感覺倒自己嘅心意,又話男朋友接受左佢嘅過去,又話了解倒男朋友嘅痛苦,又話雖然佢地唔係拍左好耐,但係就覺得,慶祝生日、一齊煮飯、一齊住,好開心,好開心

開心到好似預支哂今世人嘅幸福限額咁

用一個月,體會哂一世人嘅幸福,就算以後都唔再快樂,只要可以諗翻起呢一個月就夠





已經連死都唔怕,只要死之前,仲可以回味拍拖嗰一個月,就可以帶住微笑去死喇

miki學我合埋眼,吸一口氣,可能係諗翻同我一齊嘅點點滴滴,呼氣嘅時候,嘴角微微上勾

就好似萬里無雲嘅夜空中間,純淨無瑕嘅一輪下弦月咁靚