或者係見倒我個表情唔同左,阿心有啲擔心咁問:「阿金⋯⋯係咪有咩事困擾緊你?」

阿心話,我個樣,有一種就黎會自殺嘅感覺

嘉儀都有同一種感覺

平時我唔會對客人講任何有關自己嘅問題,不過今日同佢兩個只係偶遇,我地唔係交易關係,於是我就講左發生咩事

「我遇到嗰個最重要嘅人,但係我就係佢要自殺嘅原因。」





我都唔知點解會咁樣講,自己都唔太理解成句野咩意思,但係阿心同嘉儀竟然微微耷低頭

「你地明我講乜咩?」

「其實唔係好明。」

不過唔知點解

覺得呢句說話好悲傷





老實講,阿心同嘉儀根本幫唔倒我啲乜


實際上我亦無詳細交代同miki嘅經歷

一切都係徒勞無功

我地枱一陣沈默,佢地都唔知講咩好

直到老闆擺低一籠蝦餃為止





相比交叉酒家,呢度嘅蝦餃皮薄餡靚、晶瑩剔透

「阿金,你記唔記得蝦餃?」以蝦餃為契機,阿心再一次開口

「記得。」

「雖然已經講過,但係我仍然想親口再講一次。」

多謝你救左我

我聽完,自嘲咁無力一笑:「哼,我只係個寫遺書嘅人,根本無能力救任何人。我無救你。」

阿心側側頭,問:「嗰陣籠蝦餃,係你叫架喎。」

見我無回應,阿心補多一刀:「媽咪封遺書,都係你幫佢寫架喎。」





如果唔係你幫我媽咪寫嗰封遺書,傳達佢嘅心意我知,我而家已經自殺死左

嘉儀接落去:「如果阿心死左,我而家都已經自殺死左。」

「我⋯⋯只係幫你地寫⋯⋯」

「唔係。」

唔止架

你就係救我地嘅人

我一啲都唔同意,我一直都只係冷眼旁觀,明明任何人都救唔倒





我唔係天使,亦唔係超人

但點解,當我聽倒阿心同嘉儀咁真心咁認為我救左佢地嘅時候

會咁感動?