[有沙入眼]是咁的，我嘅職業係幫想自殺嘅人寫遺書: 481.一齊承受

見完阿文同阿志，我就去拎訂左嗰樣野

估唔到咁重咁麻煩，攞到我成身汗

翻到屋企，沖完涼就開始做最後準備，拎出紙，開始寫字

我本來仲以為林伯會係我最後一個客人，點知最後原來係miki

都好嘅，對我黎講係一個完美嘅句號





上一代嘅罪孽同悲劇嘅連鎖，就由我黎斬斷

林伯話過，最痛苦嘅報應就係眼白白睇住最重要嘅人受苦

或者我同家姐承受嘅，就係老豆當年為錢出賣原則嘅代價

我相信，死左嘅老豆幾年黎都眼白白睇住我同金弦受苦

而佢透明無實嘅手，連安慰我地都做唔倒





納入虛空嘅聲音，連向我地道歉都傳遞唔倒

雖然你作嘅孽唔關我事，無理由要我承受

但係已經無所謂喇

老豆，無論你聽唔聽得倒都好，我話你知

「我會連你嘅痛苦都一齊承受。」





雖然無左你，而家嘅一切都唔會發生，但係我唔憎你

你煮嘅午餐肉仍然係最好食

如果有下一世，都請你繼續做我老豆

不過呢，你最好就咪再做醫生喇

我笑一笑，句字寫到最後一個字

「你嘅報應，到此為止喇。」

畫上句號

水滴落下嘅聲音，有啲似眼淚輕撞地面嘅微響





唔知係我屋企有野漏水，定係老豆嘅眼淚呢？