[定時更新 - 記得追稿啊] 《弼街以南》: 三個Sam哥
「哈哈哈哈哈！唔喇係啊嘛？」
阿敏聽畢菠菜蓮的故事，感到難以置信，在沙發上笑翻了。
「笑咩呢笑？係你叫我開心見誠咁同你講架。係你叫我講既。」
正希說著又喝了一口生力啤酒。
「我點知你初戀情人係街市婆來既啫？」
「喂！」坐在旁邊的正希怒視著阿敏。「尊重啲好喎。」
「做咩喎？做咩發爛渣啫？仲掛住人地啊？」
正希不語，望著天花板的吊燈。
「你唔係啊嘛？條八婆『昆』你喎！」
「你識咩啫？你都唔係當事人！」
二人尷尬地寂靜了一會。客廳內就只有剝花生和開啤酒的聲音。
「喂，咁你呢？」
「我咩啊？」
「你啲前男友ssss啊。」
「我啊….」
「拿，係你頭先叫我坦白架。本來明明講緊我食煙，你就要我講情史。好啦，而家我講咗啦，你又呢樣個樣九十幾野樣。」
「妖，好煩啊！得啦，我講啦！」
*
那年，中大學生會上了因為迎新營過分淫蕩上了報紙頭版。這些「O Camp」經常會發生誘人犯罪的身體接觸，在主流傳媒被批得體無完膚。某個晚上，阿敏正在參與其中一個「淫蕩O Camp」的迎新派對，碰巧被安排跟這位阿Sam一組。
「Hi，我叫阿Sam。」
「我叫阿敏啊。」
「你唔使咁驚喎。我唔會好似佢地咁抽水。」
「我… 我唔係咁既意思。對唔住，令你誤會左。其實… 你坐埋啲都ok架。」
「哦，哈哈。咁好啊。」
Sam果真坐近了，阿敏害羞得不敢直視。
「你其實係唔係唔鍾意O Camp？」
「嗯。」敏點了點頭。
「嗯，我都唔鍾意。有時佢地玩得太過火。」
「係啊，我都係咁諗！尋日個個Year3擺明係非禮隔離team個女仔啦，都無人出聲，仲贊個條仆街好野！」
阿Sam笑了笑，點頭附和。
「Sorry，我平時唔講粗口。」
「唔緊要，」Sam四看周圍，然後問到：「你如果唔想玩，不如我地一齊去食飯啊。」
「吓？真係架？I mean好啊！」
就這樣，身材健碩的阿Sam在眾人面前抱起了阿敏，慢條斯理地離開活動會場。在旁的學生首先是呼喝，問他們為什麼要破壞活動的團隊精神。未幾，當大家看到阿敏甜美的笑容時，呼喝聲漸漸變成歡呼聲，這一對壁人也成了學園裡的熱話。
阿Sam是富家子弟，爸爸退休前是房地產富豪。Sam的哥哥姊姊分佈世界各地，唯獨他想要留在香港照顧年老的父母。阿敏和這位貴族談戀愛，感覺就像活在童話故事裡一樣，也像連續劇的女主角。當其他同學都在飯堂捱A、B、C餐的時候，阿Sam總會帶阿敏到最有名的西餐廳。當知道原來阿敏偏愛中菜時，Sam又帶她到有「名人飯堂」之稱的酒家吃飯。
那年，阿敏的生活不可能更幸福。直到學年完結的時候，一切都得終結。Sam改變主意，要到美國升學，頭也不回地甩掉阿敏。阿敏成績則每下愈況，到Year 2的時候被迫退學。那是阿敏人生的最低點。
*
一年後，阿敏遇上了另一位男生。碰巧他也叫作Sam。為了與她的前度分辦，又或者是力求人生有個新開始，阿敏要他改名作Sammy。Sammy為了抱得美人歸也無奈地接受了這無理的要求。
Sammy是汽車維修員，收入不高，但勝在對阿敏一心一意。他造型MK，偶像是《活著Viva》年代的謝霆鋒。阿敏和Sammy一起，感覺上回到了中學時代，重拾那種初戀的曖昧。可是，當熱情退卻，Sammy和阿敏的世界便越來越遠。就在情人節前幾天，阿敏由於不想拖泥帶水，便打算跟Sammy和他分手。
某夜，當阿敏在酒吧和同事消遣的時候，竟然迎面跟Sammy碰個正著。當時，Sammy的手拉著另一位女子。最令阿敏吃驚的，是Sammy外遇的對象，竟然是她的好友DD。阿敏本來就想跟Sammy分手，所以不在意他如何風流。不過，DD對她的背叛卻是不可原諒。雖然她們後來冰釋前嫌，但從前的友情已經無以復加。
*
又過了一年，阿敏再遇見愛情。沒錯，這位男生也叫Sam，在阿敏屢次強調下，改名叫作Sampson。
Sampson 是個平實的男人，認識阿敏的時候都差不多四十歲了。當時，他剛剛跟前妻離了婚，決定重拾青春。在阿敏身上，他找到了他前妻年輕時的影子，那種了無牽掛的輕快。未幾，阿敏便決定和Sampson同居。他們過著快樂而平淡的生活。阿敏放棄了正職，只是久不久去安娜當時打理的店舖幫忙。其餘的時間，阿敏就處理家務，和花盡心思、每天給Sampson驚喜。就這樣，他們在一起三年。
直到某年聖誕，就在平安夜那晚，阿敏在Sampson的書房找到安娜的內衣。餘下的，也不必多說了。
*
「安娜後尾同我道過歉，話佢個晚係佢飲大咗。我當時無接受，但係後來都同佢好返，因為知道Sampson同佢老婆系返埋一齊，證明安娜無講大話，Sampson本身亦都唔幫得落。咁點解唔搵返個不過一時諗歪既姊妹呢？係，佢係錯。 但係起碼佢知錯。我就當無發生過，救返段友情。」
正希呆在客廳的另一邊，細聽著阿敏若無其事地淺談傷事，眉頭深鎖。
「唯一無背叛過我既係Suki。但係佢係個種重色輕友既人。好似最近咁，佢溝咗條新仔之後，就無乜點覆我機。咁又唔係話完全唔理既，只不過係佢會俾好多時間個男人，寧願犧牲同班姊姊既時間。所以，有時我都真係幾down。」
「我頂住當先囉。以後有咩心事，同我講。」
阿敏對正希報以微笑，心想：你條仆街，如果我地真係一齊，麻煩你對我好少少，千祈唔好好似佢地咁。
阿敏見她的故事也說得差不多了，就找了三位Sam哥的Facebook，讓正希看看他們的廬山真面目。果然，阿敏喜歡的男孩都是魔鬼身材、陽光笑容，身邊總有一群女伴。
「嘩，你啲仔，個個都咁好身材既。」
「你而家知我點解叫你減肥啦。不過算啦，個個都咁賤格，對我咁PK。 只要我既男人唔係叫阿Sam就得架啦 。呢個名真係黑都爆。」
阿敏笑著，喝了幾口啤酒，手接著正希的肩上。
「喂，姚生。」
「點啊？」
「其實，你有無英文名既啫？」
正希喝了口啤酒，眼睛凝視著手機，不發一語。
阿敏把手緩緩放開，臉色瞬間由紅潤變為慘白，心道：Oh shit!