[唔爛尾] 「搞笑] 「改編真人真事] 「愛情] 那個不能過海的男人: 第三章

星期三北角渣華道街市未到朝早十一點已經車水馬龍、熙來攘往。阿 Pat呷著一杯少冰少甜的凍檬茶，與雞粉坐在鋪著膠袋的圓形木枱上。 「你睇下呢個 Facebook post 呀，好搞笑，有人 post 咗出嚟，話有團體提供「一次性生活津貼」。啲網民話如果無嘅話會去遊行。如果真係有呢個遊行嘅話，我都會參加！」雞粉笑住說。 
「不如我同你睇精神科醫生啦？」阿 Pat 皺著眉頭認真地望著雞粉。 
 
「睇過十萬幾次啦，我屋企啲藥丸多過零食呀。」 
 
「咪係囉！你一粒都無食，仲係度講。一於咁啦，我陣間捉你去睇醫生。」 
 
「你俾呀？你睇我就睇。」 「你真係好 cheap 呀！我俾錢囉。」說罷，阿 Pat把手機放到雞粉面前，「嗱，呢個醫生網係我姑丈介紹㗎，佢話呢個女醫生醫術好勁架。」 雞粉一望，那女醫生的樣子其貌不揚，便皺起眉頭，「呢個好似醫術麻麻地喎 .....咦？呢個咪幾好樣！」 
「呢個係婦科咕喎。」 
 




「咁我就睇婦科啦。」 
 
「你可唔可以認真啲呀？你咁睇樣，就揀個同陳慧琳差唔多樣嘅，咁你滿意未？」 「呢個正！就呢個啦」說罷，雞粉把綠色的筷子啪到枱上，浮著雞翼骨的出前一丁湯底差點反起來。 
香港地各行各業有些喜歡聚在一起，經典的有旺角波鞋街，亦有灣仔柯布連道駱克道的室內裝修鋪，按經濟理論來說，可以減低宣傳成本。銅鑼灣的恒隆中心除了有各旅遊社聚集外，亦有很多醫生在這裹搵食，貌似陳慧琳的精神科醫生是其中一個。 那個女醫生聽罷雞粉的徵狀，只是一直笑，笑到雞粉都皺著眉頭說：  「你笑乜春呀？」 
「Sorry Sorry ，失禮晒。咁你第一次發現自己過唔到海係幾時？」 「其實我細個搭過飛機去紐約添，但可能係港島住，番學又係，無乜點跨區。去到十三四歲個陣發現自己有啲野同身邊嘅同學仔有少少唔同。」 「咩唔同呀？性取向？」阿 Pat 加口問。 「頂你呀！係我對空間嘅恐懼 ... 我發現自己一坐地鐵、坐過海巴士就會頭暈身㷫。坐唔到飛機不特止，仲唔可以係戲院坐咁耐。係街度見到人地嘅電話叉到 98%都想幫佢叉到 100% ….總之好亂！」 「睇嚟你除咗過唔到海之外，仲有空間恐懼症、密室恐懼症、叉電強迫症 ... 咁你知唔知點解你會有咁嘅轉變？會唔會有人侵犯過你？」 「你估真係有咁多「放學後的 Miss 屎」情節咩？我都唔知點解。」 「講真，我係呢行咁耐，我真係未聽過「過唔到海」呢個案例，我諗係心理作用姐，我開啲Panadol 同鎮靜劑俾你呀，你地可以出去搵姑娘㗎啦。」 「你老味呀，佢仲衰過我之前睇嘅醫生。」雞粉看著阿 Pat在前台交四千多元的醫藥費發牢騷。 
「你嘈咩嘈姐，又唔係你俾。」 
 
「姑娘，你拎錯藥呀，呢隻係興奮藥，醫生開個隻鎮靜劑應該係藍色㗎。」 
 
姑娘連聲道歉。 阿Pat 見狀，不發一言。她在想日後與雞粉結婚生子後，生出來的 BB長大後要學認顏色，是否由雞粉的藥丸開始？想到這裹，阿 Pat 不禁倒抽一口涼氣。