《唔係啩！我間房幅牆有個窿》: Chapter 15
我回家後洗了個熱水澡，才一回到房中就看到那個洞了。
我馬上搖一搖繩子，水靈那邊傳來隱隱約約的啷噹聲。
頃刻，我又聽到水靈的聲音了，不過這把聲音比剛才那一把稚嫩一點。
「喂大叔，好耐無見囉喎。」她的聲音聽起來還是很調皮。
我有點不知從那裏說起才好的感覺，但我還是道﹕「我噚晚見到『你』啦，不過......」
她的聲音聽來很興奮﹕「係喎係喎！你噚晚約咗『我』喎！點呀點呀? 我哋傾咗啲咩呀? 我係咪變得好靚呢！」
我吸了一口氣道﹕「不過你唔認得我。」
「吓? 點會呀? 我將你個死人樣記咗入腦囉喎！而且又有暗號，點會唔認得呀? 」
「其實我諗......我同你應該係身處喺一個平行宇宙......」
「咩係平行宇宙呀? 」
於是我將我分析所得，慢慢解釋給她聽，幸好她頗聰明的，聽一遍就明白我說甚麼了。
「咁即係話...你嗰邊嘅水靈，根本就唔係未來嘅我，因為佢無識得你嘅記憶? 」
「嗯...又唔可以咁講，佢都算係未來嘅你，因為你哋應該都係經歷緊同一段人生，但只係無咗有關我嘅記憶啫。」
「但係點解佢又會喺約定時間咁啱去咗嗰間餐廳嘅? 」
「其實我都諗唔明呢一點，可能只係純粹巧合，亦都可能係因為你做嘅嘢影響到我呢邊嘅佢。」我頓了一頓見她沒有回應，看來她不太明白，於是我繼續解釋﹕「我嘅意思係，你同我約定咗12年後見面，但我呢邊嘅水靈都比你影響到。到咗噚日約定嘅日子，佢都因為某啲原因而去咗嗰間餐廳。不過當然啦，我都係估啫，實際係點真係唔知。」
「哦...咁呀......哈！咁你同『我』say hi講暗號『我』咪以為你白撞囉！你咪好鬼瘀? 哈哈......」
不知道甚麼原因，我沒有將她有未婚夫的事告訴她，於是我陪笑道﹕「係呀......唯有話認錯人囉......哈哈......」
「咦！唔係噃！咁你咪請唔到我食飯！搞錯呀！」她開始埋怨起來。
「點呀你，成日掛住食！因住食肥你呀！」
「哼！我係天生麗質，食極都唔肥，你少擔心......我唔理呀！你一定要請我食飯呀！如果唔係我去煩住我呢邊嘅『你』㗎！」
這個死妹釘！怎麼現在的性格跟長大後差那麼遠? 她們真的是同一個人嗎?
雖然按推測她那邊的『我』跟我沒有太大的關聯，但天知道『我』被她影響的話我會變成怎麽樣? 還是不要讓她接觸『我』比較好。
於是我道﹕「怕咗你啦，我比幾百蚊你自己去食buffet啦。」然後從銀包拿了幾張紙幣，捲起來塞進洞裏。
水靈接過後道﹕「咦呢幾張一百蚊個樣好以怪怪哋咁嘅? ......喂你玩嘢呀！啲銀紙發行年份係2012年嘅！你想人哋以為我用假銀紙呀? 」
「哈哈！係咩? 我都無留意呢樣嘢添......」我將銀包裏的紙幣拿出來逐張查看，發現發行年份不是二零一零年就是二零一二年。
「喂我得啲2010同2012年版嘅銀紙咋，唯有有拖無欠啦。」
水靈將那幾張紙幣塞回來給我，然後忿忿不平道﹕「都唔知你係咪特登㗎......」
「幾舊水你驚我欠咗你咩? 下次有舊銀紙咪比你囉。」
「哼！都唔知係咪㗎，聽住先啦。」她沉默了一會兒，突然道﹕「係喎係喎！前幾日威爾斯親王醫院真係有醫護人員感染呀！仲有今日新聞就報導話世衞將呢個傳染病命名做SARS喇！佢晏晝打過電話比我，話我個表哥好犀利，佢話會同佢爹地媽咪傾吓，睇下要唔要去第二度住住先。」
她的世界發生的事果然跟我的世界一樣。這樣說來，根本不用我幫忙，她最後也會跟Ron結婚吧。那麼現在我這樣子加了一腳進去，會不會影響到她的未來?
「係呀......咁咪好囉，你應該唔駛咁擔心啦。」
「嗯，係呀。而家我哋好似close咗好多咁，佢頭先仲約咗我聽日放學一齊去溫書呀！」
「咁咪好囉......」現在看來，水靈和Ron的關係還是向好的那邊發展的。
「總之都多謝你啦，嗯......既然你都幫咗我，我唔駛你請我食飯啦，當無數啦。」
想不到她為人也挺公道的，不過我也不介意請她吃一餐半餐，反正我另外有事要拜託她﹕「咁我又唔介意請你食飯，不過我有件事想你幫幫我。」
「咩事呀? 講啦。」
「係咁嘅，我發現原來Carmen同你讀同一間中學，佢係你師妹，你應該識佢喎。」
「係咩? 但我唔識一個叫Carmen嘅女仔喎。」
嗯......或許當年Carmen還未改英文名吧。
於是我將與Carmen的合照放在洞口前方道﹕「可能佢嗰陣仲未叫Carmen，佢細你三年，姓楊，叫阿靜。我有佢張相，你過嚟望吓個窿。」
一會兒後，我聽到她驚呼﹕「啊！佢大個咗都係一樣咁可愛！但係點解佢個樣好似有啲唔開心嘅? 」她又道﹕「我識佢呀。佢叫楊靜呀嘛，我上年喺學校幫佢補過習呀，佢又活潑又多嘢講。不過而家都好少撞到佢，就算撞到，佢都剩係同我打聲招呼咋。」
活潑又多說話? 怎麼跟我認識的Carmen差那麼遠? 難道就是因為她的家裏發生了甚麼事嗎?
「我想你幫我查吓佢屋企有咩事。」
「佢屋企? 佢屋企會有事呀? 」
我深呼吸一口氣道﹕「原來佢之前去安老院就係探佢阿媽，佢阿媽而家有老人痴呆，搞到佢成日都好唔開心咁。仲有我咪同你講過佢好cool嘅，但係你話佢活潑又多嘢講，可能就係因為佢屋企發生咗啲嘢令佢變成而家咁。」我沒有將Carmen姊姊已去世的事情告訴她，一來怕嚇著了她，二來也怕將事情弄得太複雜。
「咁我即管幫你查吓啦。」
「唔該哂你啦。」