《唔係啩！我間房幅牆有個窿》: Chapter 17
「Raymond，今日得你嘅? 阿靜呢? 」
這個星期天，水靈見只有我一個人出現，走過來問我。
「佢話要幫同事頂更，今日嚟唔到。」
「哦，原來係咁。」
「呀仁仔！仁仔呀！」楊伯母在旁叫嚷。
「Raymond，楊伯母叫你啦。」水靈拍一拍我。
我邊走過去邊抱怨道﹕「我係恒仔呀！唔係仁仔呀！」
楊伯母笑道﹕「哎呀我有老人痴呆㗎，成日都記錯嘢嘅，哈哈~」
真的嗎? 我看你鬼頭鬼腦的模樣一點都不像有病啊！不過算了，誰說你是Carmen媽媽呢......
不知不覺又完成了照顧和娛樂老人家的工作，我正想回家時，水靈拍一拍我﹕「喂你一陣得唔得閒呀? 陪我買嘢呀。」
「買嘢? 」
水靈點點頭道﹕「Ron就嚟生日，我想買嘢比佢，又唔識揀喎，咪諗住搵你幫吓手囉。」
我笑道﹕「你係佢未婚妻都唔知佢鍾意啲咩? 」
水靈有點尷尬﹕「咩啫！呔呀，錶呀，裇衫呀我就識揀啫！呢啲男人嘢我點識喎！」
我奇道﹕「男人嘢? 」
水靈拿出電話，打開了Ron的facebook指給我看﹕「呢啲呀。」
我道是甚麼東西，原來是高達。
我失笑道﹕「估唔到你會送玩具比佢喎，乜你哋啲女人唔係覺得咁大個男人仲玩玩具好幼稚咩? 」
「都係興趣嚟啫，咁我覺得砌吓模型又無乜嘢嘅。」
「哈！你又幾通情達理喎！幫你都得，不過一陣要請我食飯喎！」
「係啦係啦！快啲行啦！」
我們到了旺角，很快就買了一盒高達模型，然後到了一間餐廳吃飯。
水靈用疑惑的眼光看著我﹕「你咁快就揀好嘅? 啱唔啱㗎? 」
「而家你係男人定我係男人吖? 」「你......」「咁阿Ron係咪都係男人吖? 」「係......」「咁我認得佢鍾意邊款高達定係你認得吖? 」「............」「無嘢講喇嘛? 」「無......」「無就得啦，不要問，只要信。」「............」
哈！沒想到她和死妹釘的反應也是一模一樣的。
我得意洋洋的看了看她，然後喝了一口水，沒料到她突然問我﹕「喂你係咪想追阿靜呀? 」
我給她嚇得被水嗆著，害得我咳嗽連連，她蠱惑的看著我﹕「你咁嘅反應即係係啦。」
我喘順了一口氣，抱怨道﹕「喂你就算睇得出都唔駛咁直接講出嚟㗎? 」
「唓！男人之家怕咩認啫！」
這個水靈，性格還真是跟死妹釘一模一樣，跟我混熟以後說話也不客氣起來。看來她的溫柔只有Ron才能看到。
我白了她一眼﹕「係呀！我係想追佢呀！你係咪有意見吖? 」
水靈噗哧一笑﹕「唔駛咁大反應嘅，我唔係要阻止你。」她頓了頓，正色道﹕「不過意見呢，就真係有啲。」
哦? 沒想到有死妹釘幫我之餘，還有這個水靈幫我。
我聞言馬上乖乖坐好，擺出一副好學生留心聽課的神態。
她見我一臉認真的模樣，忍不住又笑了笑，才開始道﹕「我中四嗰陣識阿靜，嗰陣佢係中一，個人好開朗活潑。咁之後我又會考又轉咗校，根本就無見過佢。到咗前幾年喺老人院做義工，先知原來楊伯母係阿靜媽咪，而阿靜就已經變到好似而家咁，我諗係佢屋企發生咗啲事。我有關心過佢，不過佢都唔係好肯講出嚟，我剩係知道佢有個家姐，但幾年前因為一啲事唔喺度，但至於係咩事我就唔知喇。」
我點點頭道﹕「其實佢都有話過我知，不過講到佢家姐過咗身佢就喊咗出嚟，我之後都唔敢再問佢。」
「仲有一件事，我覺得佢好似特別抗拒同男人接觸。」她喝了一口茶，又道﹕「之前我見佢悶悶不樂，成日自己一個，咁靚女但又無男朋友，就拉埋佢一齊去朋友聚會，諗住介紹多啲朋友佢識囉。點知去到佢剩係自己坐埋一邊，女仔撩佢講嘢都剩係講一兩句，同男仔就完全零交流。人哋主動同佢講嘢，佢都係一句起兩句止，完全唔比機會人囉，搞到我啲男仔friend勁無癮。」
噢！這種心情，我懂的。
「不過我見你係唯一一個佢願意接觸嘅男人，你都幾有機嘅。你比多啲耐性啦，我諗佢會feel到你係真心關心佢嘅。」
「嗯...希望係咁啦......」這個時候，我們點的菜也來了。
之後我們邊吃邊談著其他無聊事，說著說著就說起她和Ron的婚事。
「你同阿Ron諗住幾時結婚呀? 」
「下年年中呀。」
「記得派帖比我喎。」
「緊記得啦！我仲等你比封大人情我㗎！」
嘖！這個水靈還是跟死妹釘一樣斤斤計較。
「係啦係啦，前世欠咗你咩? 」
「話時話，我覺得同你都幾夾，好似識咗好多年咁嘅。」
咦? 難道是因為我跟死妹釘的關係，令到身處這一個平行宇宙的水靈也跟我一見如故?
「嘿！話唔定我真係前世欠咗你呢。」應該說是我欠了另一個世界的你吧。
「呵呵~可能真係。」
這個時候我有點興趣知道沒有我的幫助，她是怎樣跟Ron在一起的，於是我問﹕「其實你同阿Ron點樣開始㗎? 佢點睇都唔似係會鍾意你呢啲女仔喎。」
水靈杏眼圓瞪﹕「咩叫『你呢啲女仔』呀? 唔好以為我話同你夾就可以恃熟賣熟喎！」
我連忙道﹕「sorry，我講錯嘢，你同佢襯到絕！」
她「哼」了一聲，徐徐道﹕「我同佢係中學同學，嗰陣佢好受歡迎，而我只係一個普通女仔......」我很想說其實你十六歲的時候也很有吸引力的，一點也不普通。
我試探道﹕「你嗰陣暗戀佢? 」
她瞪大眼看著我﹕「你又估到? 」
我聳聳肩﹕「咁你講到佢咁好，你又咁卑微，咁應該係咁啦。」我當然不會說是因為另一個你告訴我的。
她續道﹕「我哋會考嗰年，即係2003年。嗰年咪有SARS嘅，佢好唔好彩有屋企人感染而過咗身，而佢都染咗SARS病咗幾個月，雖然最後都好返，但係佢就miss咗會考要留級，而以前啲朋友又因為驚比佢傳染而疏遠佢......」
我打趣的接下去﹕「於是你就乘虛而入，成功奪取咗佢嘅芳心喇。」
水靈白了我一眼，然後又嘆了一口氣﹕「其實都可以咁講嘅。佢嗰陣無哂信心，又唔開心，咁我咪陪多咗佢，又幫佢溫習準備會考，咁之後嗰年佢終於考到好好成績，仲比大學拔尖，計返佢仲早我一年入大學。」
「跟住你哋就一齊咗? 」
水靈的臉頰泛起了一抹紅暈，她輕輕的點一點頭。
我沉默起來。若果這個宇宙的水靈是這樣子跟Ron在一起的話，那麼另一邊的水靈會怎樣發展? 因為我的關係，那邊的Ron已經逃過了SARS一劫，即是說他的家人會安然無佯，而他也不會染病而導致留級，水靈亦沒有機會幫助和關心他，那麼他們還會在一起嗎? 雖然按死妹釘說，他們現在發展得很好，但我總覺得有點隱憂。
「做咩靜哂唔出聲呀? 」
我裝模作樣的抹一下眼睛﹕「無...你個故事太感人，聽到我好滾動......」
她笑駡﹕「死啦你去！人哋咁認真你就當笑話嚟聽。」
我笑道﹕「做人輕鬆啲啦！咁沉重做咩? 而且你哋最後都happy ending啦！」
水靈笑了一下﹕「咁又係............不過好心你就唔好成日嘻皮笑臉啦，盞令到阿靜覺得你份人唔認真咋。」
我懶洋洋道﹕「放心啦，我應該認真時就會認真，應該搞笑時就會搞笑。」
「哼！係先好呀。」