我要寫出一個好好好好甜既好故事: 第十九章 平凡是福
「阿哥,我地點算好?」阿妹望住門口既一灘紅油,似乎對於依家既情況十分之無助,
唉,其實你問我,我問邊個呢?嗰無品老豆尋日夜晚靜靜雞咁拎走哂啊媽留比我地既錢,
當時其實我醒左,但係我冇講太多嘢,亦都冇阻止佢,
「一筆勾銷,以後你唔再喺我同阿婷既老豆。」我好冷酷咁講,
而佢,望都冇望過我一眼,就咁走咗去,而確定佢走遠之後,
我嘅情緒再控制唔住,獨自一個人,坐喺大廳,眼淚不斷咁流出黎,
但係我唔可以比阿妹咁快知道呢件事,或者,
我暫時要獨自承受呢個事實,其實我由細到大都唔明,
點解電視機入面既情節,永遠同現實情況唔同,
溫馨感人既場景,可能只有阿媽好耐之前幫阿婷慶祝生日時,
我地三個人,圍住細細個蛋糕,阿婷眼仔碌碌咁望住支蠟燭,
我地同阿婷唱生日歌,一齊開開心心咁食蛋糕......
雖然呢件事唔太特別,亦唔起眼,但唔知點解,
每次我想放棄既時候,正正係呢個回憶,
令我可以繼續堅持落去,依家諗返起,都有少少感嘆,
生活中,可能有啲事,係唔起眼,平淡如水,
但原來有時候,正正係呢啲事件,
令到我地可以繼續喺世界上,堅強咁活著。
「唔駛驚,我地盡量唔好出去,過一排,佢地就會放棄唔再搞我地架啦......」
我講出黎自己都唔信,更何況係阿妹,
但係阿妹情緒已經好唔穩定,我再唔做啲野,我驚佢會支撐唔住,
「係咪真架......」阿妹半信半疑咁望住我,
「當...當然啦,哈哈!」我故作鎖定咁講,我呢世人最假就係今次,
亦可能係夠假,阿妹終於肯信我(咁都信阿妹真係蠢...啊唔係,係天真!)
「咁好啦,我返房繼續升呢先~」講完就衝入房,
快速按下F9,佢個角色就行左去左邊,右邊成班傻仔就冇得入場...哈哈!!
我望住個鐘,已經十二點,肚亦都有少少餓,所以我就行去廚房,是但煮左兩個公仔麵,
放喺同一個碗,乜唔係兩個人咩?我只能說,少年,你太年輕了......
真係唔好話,人肚餓嗰陣,真係食咩都好味啲,除左屎之外,
不過我真係唔明,啲人話肚餓食屎都好味,其實佢地係咪餓壞腦,
先至講出呢啲咁無腦既言論,但我知道依家唔應該糾結喺呢種事情上,
於是我捧住兩碗麵,好無奈咁行入阿妹間房,
「大小姐,食野啦......」
但係佢依然不斷按個Ctrl 鍵,好似跳會快過正常跑咁,
雖然我好耐之前已經同佢講左如果佢唔識DJ,
跳同唔跳既速度係一九樣既,不過佢好似冇理到我,
繼續沈澱於跳躍既快感當中,而加速鍵,只有佢踏到加速板時,
先至會禁實,然後幾秒之後又無氣,角色企喺原地,喘哂大氣,真係睇到都辛苦,
「得啦,你等我一陣,我好快衝線......」阿妹仍然望住屏幕,同埋,係咁禁Ctrl 鍵!!!
我被迫要睇佢玩,果然過左一陣,佢既角色頭上出現一個戴眼鏡,好樣衰既阿伯,
然後變得越黎越大,最後阿妹既角色坐低咗,然後頒獎台上照舊冇佢既角色,呵呵......
「都叫你唔好嘈架啦,你搞到我輸左啦!」
哇驚到我即刻衝咗出廳,拎出身份證,確定自己係姓陳,而唔係姓賴,
咦唔係啵,邊個話我姓陳阿妹就一定姓陳既姐,唔比同母異父啊(?)
但咁樣講又好似唔太尊重阿媽喎,無錯,一定係同父異母,
最衰都係個老豆,唔識從一而終,始亂終棄......
「喂小姐你好似姓陳架喎......」我擺出一如以住既「Who fuxking care」表情,
再配以手勢,簡直完美!可惜阿妹唔受落, 搣住我隻左耳,
大家唔好誤會,
唔係由蘇有朋執導，改編自青春文學作家饒雪漫同名著作的一部2015年中國愛情電影,
只係我隻左耳,點解係左耳,因為我習慣側向左邊訓,跟住耳仔長期受壓既情況,
導致變形,即係柔韌度訓練,所以隻耳仔就特別軟啦,亦都特別好搣囉......
「好好好好好,你叫陳雅婷,陳年老酒個陳,優雅個雅,婷...雅芳婷個婷!」
我就好似恐懼鬥室被困住既人咁,係最危急既關頭找到解題方法,
佢地就犧牲身體既部分,甚至同伴......而我,就犧牲左唔少腦細胞,同埋我誠實既人格,
邊忽優雅啊!!!!!!我內心在吶喊,不過我表面不動聲色,演技簡直可以媲美摩根●費里曼,
佢係邊個?衰鬼上帝個上帝囉,知嗱掛?
正當我沉溺於自己既幻想中,阿妹已經大啖大啖咁食緊啲麵,
我望住閃閃發光既麵條,韌度,香味都正值極致,
唔知我有冇講過,阿妹既廚藝十分高超,
不過講到煮公仔麵喎......哈哈,天真!
所以我其實係想食下啲麵,
唔知係咪因為我既眼神太痴漢定一副欲求不滿既樣,
阿妹好唔情願咁夾起麵條伸向我,
「快啲食啦,你呢個變態......」
我當場震驚了十三億......腦細胞,究竟發生咩事,
點解阿妹會肯賜食物俾我呢個下人嘅?
不過我既本性蓋過咗我既理性,我一口咬住對筷子,
將上面既麵,同埋當中包含住既湯汁,仲有味精,
全部收納到嘴巴入面,
「咦,你唔好咁核突啦~」不過阿妹唔知點解心情好好,似乎冇怪責既意味,
阿妹一副懷念既樣子,似乎喺到回憶緊啲乜咁,
「喂,係喎,你記唔記得細細個呢,阿媽咪買左個蛋糕返黎既?跟住你又勁衰,同我搶蛋糕食,最後搞到大家成臉都係cream,haha~」
原來阿妹都記得呢件小事,睇黎我地都係一擔擔架啦,我望住阿妹,佢瞇埋雙眼,笑得好開心,
不過......亦同時流緊眼淚。
有喜有悲的,人生都一樣嗎?
____________________________________________________________________________________________________________________________________
(圖文不符)(唔好意思各位讀者破壞你地既情緒,不過我真係忍唔住= = )
太嚴肅既風格唔太岩我,至少依家既自己都未Carry到,
所以,文筆上可能會平俗啲,但我私心認為,咁樣既風格,先至係依家既我可以帶比大家,最好故事既方法,
其實,多唔多人睇又點,最緊要既係,你地,即係我既讀者,可以睇得開心之餘,又可以得到啲野,
於我而言,就夠哂啦,我會繼續將呢個故事寫落去,曾經喺Youtube 留言:
「再美好的藝術也需要知音,表演的本質是只要有一個觀眾,也會傾力演出。」
希望我可以莫忘初衷,亦都希望大家可以喺自己有熱情既事情上堅持落去,多謝。