【還我心願】- 與二家姐一段不可告人的關係 (續篇): 【第一章】：最終節
（二十一）
“佢精神病又發作... ”
Christie喺芷悠耳仔邊輕聲說
“係呢，家姐你口唔口渴啊？想飲咩？ 茶定水？”
“定咖啡？我沖咖啡都好叻架~ 阿b佢試過都話唔錯~ 要唔要試下？”
Christie表情充滿自信
芷悠輕輕搖頭：“嗯... 唔駛喇，我飲茶得喇~ 飲咖啡個肚會唔舒服”
“多謝你一番好意先，敏怡”
從芷悠眼神睇得出佢幾鍾意Christie。
Christie扁一扁嘴，不過都相當樂意：“好啦，我即刻沖比你”
“等等我啊”
Christie經過我身邊細細聲：“你仲企喺到，快d過去傾下計啦，咁耐無見兩姐弟一定好多嘢想講”
“喔... 都係嘅” 我摸一摸腦後，佢向我發個單眼就入左廚房。
為左唔想太靜，又可能我太緊張，
於是我走入房拎左個喇叭出廳
諗住播下歌緩和下氣氛。
果然
憑藉音樂既緩和，
氣氛亦變得放鬆。
我地坐係梳化，似曾相識嘅畫面再浮現腦海。
只係無諗過仲有機會發生。
其實，我有好多說話想同你講，但偏偏坐埋一齊
我竟然講唔出口。
（二十二）
芷悠先開口：“係呢... 阿b係咪返緊工喇？”
“係啊... 做緊Graphic Design，不過今日星期六放假。”
“嗯... 咁辛唔辛苦啊？返左好耐喇？”
“之前果份返左兩年，依家呢份都返左一年，都ok嘅...叫做升左職加左人工咁囉”
“哦...你要加油呀阿b”
芷悠望住我微笑，我含蓄地點頭：“喔…”
當年對我關懷備至，今日依然體貼入微
“爹哋媽咪呢？返緊工？”
“係喔~ 不過老豆果邊搞緊租約，媽咪又跟緊單官司。
佢地呢排都好忙呀… 不過放心啦，
佢地一知你返左黎應該頭也不回狗衝返黎見你~ 哈哈”
“哈哈~ 誇張~ 好心你咁大個人正經d啦~”
芷悠輕輕一拍我肩膀，美麗嘅笑容淺顯迷人酒窩
無錯，
其實我真係好鍾意睇到你笑。
（二十三）
“係呢，大家姐有冇收到我寄黎嘅康乃馨頭飾啊？”
芷悠流露出既興奮又緊張嘅表情
我抱一抱臂故作嘆息：
“唉...收唔到啊...我地仲諗緊點解大家姐結婚
你都無送野過黎...”
芷悠鎖起眉頭極之失望：“點會咁架...我喺果邊真係搵左好耐先搵到......點會...”
“哈哈~ ”
我已經忍唔住笑出聲
“我真係忍唔住喇家姐... 你個樣... 真係好好笑~ 哈哈”
我鬆一鬆膊：“緊係收到啦，大家姐仲話你眼光幾好，一定會搵到個好老公”
芷悠帶點生氣地送我一拳，我嬉皮笑臉
如果將時光倒帶的話...
我地都曾經有過呢個畫面
你記起嘛？
抱歉了
嚇得你花容失色
因為我仍然唔敢相信你已經返左黎
因為我已經勾起種種回憶...
我...
我唔敢望住芷悠，偷偷拭走眼淚。
突然芷悠捉住我隻手
（二十四）
“我都未同你講~ 東京果邊嘅演奏樂隊請左我做一級鋼琴手啊~ 你知唔知佢地……”
芷悠表現得異常雀躍、手舞足蹈
你終於完成你嘅夢想，芷悠
恭喜你。
我托起腮望住佢，其實我根本無留心聽佢講咩
因為我只係再一次望住佢嘅容貌
然後再一次，喺我腦內重新塑造一個你
直到那一句
“果邊我識左個小提琴家，佢都係香港人黎…”
我突然回過神
“係咩… 你地一齊左？”
“……”
芷悠低一低頭，表情不再雀躍
我向佢手臂輕輕地補佢一拳：
“咁咪幾好~ 有個人照顧你，咁做細佬嘅我就放心哂”
笑得好燦爛，因為我已經好盡力地笑，
因為我唔想你發現...
其實笑得好失敗，其實笑得好勉強...
芷悠稍稍望向天花
“... 你同Christie一齊左好耐喇？”
“... 都唔算嘅，差唔多三年啦，佢啱啱先回流返黎香港”
“嗯... 佢係好女仔黎㗎，你要好好珍惜佢啊”
“嗯，我會...”
唔知點解有種心疼嘅感覺；
有種一切已經終結嘅無力感。
（二十五）
“ I'm not a perfect person.
there are many things i wish i didn't do ”
Hoobastank 嘅 The Reason
呢隻歌，
喺你走左之後嘅一年，我差唔多日日反覆聽呢隻歌，
亦都係呢隻歌令我振作。
咁啱播到呢隻歌，我隨著拍子哼左幾句
盡可能放鬆...
因為我個腦入面已經開始湧現無數畫面；
佢應該對芷悠好好，
佢地應該好投契，
佢應該視芷悠為己出，
然後每年冬天，
佢都會攬住芷悠渡過...
手牽手一齊睇淒美嘅雪景...
當然少不了相擁、擁吻...
然後同芷悠...
（二十六）
“呢首喺Hoobastank嘅The Reason係咪？”
我瞪一瞪眼：“你點知嘅？你唔係唔聽呢類歌架咩？”
芷悠輕輕搖頭微笑
“我喺唔聽架... 不過呢隻歌我唔知點解成日聽...”
“係咩...”
我有d 感觸...
會否每個晚上，
我們都望向同一片夜空，
然後哼著拍子，
想念著對方
“其實我返黎一個月左右... 就要飛返去果邊喇... ”
芷悠低著頭輕聲說，然後對我笑
“嗯... 等我帶你吃喝玩樂，食到佢唔認得你，哈哈”
我都報以微笑
“茶沖好喇~”
Christie提住杯小心翼翼地走出黎
芷悠立即企起身：“多謝你喔Christie，我想拎入房飲啊，你地慢慢吖~”
然後輕力接過Christie手中嘅茶杯，點一點頭，就輕閉房門
Christie走過黎撓住我手，眼神帶點挑逗：“咁...我地都入房咯~”
“行囉~ 驚你有牙啊？哈哈”
Christie咬一咬我手臀再拉我入房
我望向門嘅隙縫，
隱約間睇到芷悠佢戴起耳機望住notebook
笑得挺開懷。
而我，
擁抱住Christie，
輕輕關閉最後嘅隙縫。
輕輕哼：
“ a reason for all that i do
and the reson is you ”
－ 第一章 完 －