【還我心願】- 與二家姐一段不可告人的關係 (續篇): 【最終章】：第三節
（九）
“......”
大家都坐定定準備好，但無人拎起筷子。
你眼望我眼，大家都唔知點咁
“......”
“...不如我地食飯先啦，唔好再等喇，凍左唔好食。”
我率先開口。
反正餸煮好了，就起筷吧。
“...唔等埋你二家姐先呀？”
老豆嘅心意我點會唔明，不過芷悠係邊我真係唔知道
咁等落去都唔係辦法。
我用眼神回應老豆，佢默默回頭，似乎都明白了。
忽然Christie舉起酒杯：“我地... 咁難得同枱食飯，不如飲杯吖~ 開心d~”
“我祝大家身體健康，未來事事順景~”
大家亦和應著，一同舉起酒杯。
不消一會，
大家姐已經臉紅耳熱地說著公司的業務，如何在競爭市場上力壓群雄，表現起來手舞足蹈。
她身邊的那位也健談了很多，原來轉行做健身教練了。
怪不得
好奇的Christie問起了二人的將來，大家姐竟出現害羞的表情。
然後強壯的手臂搭著她肩膀：“已經有咗3 個月”
害羞的女強人立即轉身向身邊那位撒嬌
哈，
看來女人一嫁了，整個人就像脫胎換骨似的
雖然有點看不慣，但看見大家姐一臉的幸福，我亦放心了。
一輪吵鬧、熙熙攘攘，有如節日般的狂歡。
枱上嘅食物都被掃蕩得七七八八。
我亦喝得有點醉
我仔細地望住他們每一位，有點感觸...
爸媽的樣子蒼老了，即使臉上仍舊掛著那份歡愉，
但老了的皺紋卻縱橫交錯地刻印在每個位置。
以前那霸氣的大家姐，現在身旁亦多了一份保護，
回復了真正的女兒身
然後，一段段往時回憶也勾起了...
以前坐在我身旁的芷悠，原來不知不覺間已換上敏怡了。
我看著Christie，不知不覺間產生了內疚。
回想那天我對芷悠所做的事，
徹底地背叛了眼前這位最愛我的人...
“啊b？ 做咩事呀？做咩喊嘅？”
Christie右手撫著我胸口
“...呀... 打喊露啫... 眼訓掛哈哈，我無野呀...”
我攬住Christie親吻佢額堂，然後深情地望住佢
“敏怡... 我... 愛...”
“咔嚓─── ”
突然門被打開了
（十）
大家將注意力都放在門外
凝視住門被打開的一刻
門外那位，
換上碎花紋黑色恤衫、半身長裙
穿得清脫秀麗，散發出份外優雅的感覺。
能有如此氣質的，就只有一個人，就是我二家姐芷悠。
才剛收到喜訊的兩老，見到芷悠回來更是囍上加喜。
“去左邊呀芷悠？黎黎黎，快d 除鞋過黎坐低食飯~ 你大家姐有好消息宣佈呀~”
老豆已經開心到對眼連成一線
“嗯... 爹哋媽咪，我... 我帶咗男朋友黎呀”
芷悠的背後走出一位男士，
那人穿上一身深藍色間紋恤衫、簡約的修腳西裝褲。
配合梳理整齊的髮型及一身男士香水味，
看得出是經過悉心打扮。
他輕托一下黑色的粗框眼鏡，容貌帶點冷酷卻展露出沒有違和感的和藹笑容
“世伯、伯母，你地好。”
“我叫Wesker”
眼前呢個人...
就係果個小提琴家
然而在眾人歡呼下，
唯獨只有我目瞪口呆。
心臟跳得像要衰竭似的，而那份宿醉感
早已拋諸腦後...
（十一）
“哇~ 好靚仔啊！”
大家姐本來就係個直腸直肚嘅人，再加上依家飲到啤啤呼嘅關係。
佢大概已經將「說話過濾系統」正式關掉了。
Wesker面露尷尬，然後輕舉了一袋禮物
“世伯伯母，呢度小小心意。送比你地”
“點好意思呀~ 唔駛啦，咁客氣做咩~”
口裏說不，身體卻很誠實嘅老豆雙手接過禮物袋後，準備打開一看
大家姐失控尖叫：“哇！名牌黎架呢個！！”
“呢款牌子嘅手袋最平都要20 萬架...”
20萬呢個數，雖然以大家姐嘅收入黎講絕對負擔得黎，
但對於現實型嘅佢黎講，最多每日放工行過望兩眼然後就掉頭走，
絕對唔會花錢買。
“呀... 大家姐，呢個袋我係買黎送比你架。因為我聽芷悠講你幾鍾意買手袋，而且呢個款我覺得都幾靚，所以我擅自決定買黎當見面禮送比你。唔知你...”
“鍾意！好鍾意！超鍾意！多謝你呀Wesker！下次唔駛咁客氣啦哈哈”
大家姐兩眼發光，捉住個袋又錫又攬，完全忘記咗呀豪嘅存在
好似叫呀峰
Wesker 拎住其中兩份禮物：“大家都有份，呢度小小心意，希望你地會鍾意”
說罷，坐在我身旁嘅眾人都緩緩向住禮物袋出發
Christie望住我，我點一點頭
然而，
呢刻我嘅注意力，就只放在望住Wesker微笑嘅芷悠。
（十二）
芷悠，望住我。
這就是你的決定嗎
我唔想因為我，而令你隨便找個水泡就揹上。
就讓你的雙眼告訴我，你是否真的愛著他
芷悠的眼神離唔開Wesker，結果大家拿到了自己的禮物
而我們卻始終沒有對上眼。
“好心啊細佬你學人下人啦，又多才多藝又靚仔又好人，最緊要，係又有錢呀！”
興奮到語無論次嘅大家姐又黎hurt我
“吖係呀！細佬，我結婚果陣你好似接左二家姐個花球嘅係咪，係時候比返芷悠喇，佢搵到佢嘅白馬王子喇~”
大家姐再望望佢身上嘅恤衫：“吖唔係，黑馬王子先啱，哈哈~”
那個花球一直放在我的儲物櫃中。
每過一段時間，
我就會拿出黎掃除一下灰塵，為了有天能親自送到芷悠手上。
然後我就換上一身帥氣燕尾服
一直地希望...
只是沒想到...
我打開房門，沒有開燈。
就透過微弱的光級折射進來。
櫃門被打開，眼前嘅花球卻又不幸地染上了灰塵。
我用手輕撫著花瓣，但原來我從沒仔細看清楚
鮮花早已不再鮮，留下了一層灰白的顏色
凋謝了的一片從我手中掉下。
在暗處裏，
我讓眼淚放在仍在輕擺的花瓣上
芷悠，這已經是我最後能為你做的事。