浮生若夢 · 改寫夢境的事: 1

我系啊永，一個異於常人嘅人類。
 
「永啊」我阿媽係客廳大嗌，「你肯去穩工未啊。」又係呢種嘮叨嘅聲音，我真系聽到厭曬。
 
佢之所以咁嘈，系因為我呢個無業嘅啃老族，係屋匿左幾年無出過去做野，但我知道我唔適合出去做野，況且我有更加多好玩嘅野可以做。
 
自細我就無發夢呢樣野嘅存在，八歲個陣同學講起我先知道有夢呢樣野嘅存在。阿媽帶左我去左睇醫生，個醫生就隨便比堆精神病嘅藥我，話我食下就無事，但至今我仲未發過夢，屬於自己嘅夢。
 
大概係十二歲個陣，我人生第一次發左夢，個夢好奇怪，好有真實感，但卻奇幻得唔太現實。個夢嘅內容，大概就係我阿媽係一個純白嘅領域散步，而我係一邊旁觀，距仿佛察覺唔到我嘅存在，一直一直咁向住無盡嘅白前進嘅。
 




隔日，我同我阿媽講起我終於發左第一個夢，仲詳述我夢裏面嘅內容，令我詫異嘅係，佢同我發嘅夢嘅內容竟然一樣，但唯一唔同嘅係，佢由始至終都見唔到我嘅出現。個次之後我兩年無再發夢。
 
十四歲個年，我中三，如常地趴係書臺訓教，突然又發左個夢，今次個夢同上次一模一樣，只係行個個人轉左做我同班同學啊明，我坐左係度好耐，好唔耐煩。突然夢裏面嘅場地就如同我腦裏面所想嘅野一樣不停轉換，先有地獄，後有遊樂場，再有我屋企樓頂，千變萬化只要我想就可以變到，但唔知點解個夢突然變左做黑色一片，一片虛無。隨後，我就比老師敲醒左，望左望阿明，佢神情呆滞咁坐左係度。我諗我大概都知道咩事。
 
直至二十歲嘅今日，我終於明白我嘅能力。我深知我係個唔會有夢嘅人，我只會進入人地嘅夢，並且主宰一切，可以譬喻我做希臘神話嘅夢神摩耳甫斯，神不知鬼不覺地幻化出現於人嘅夢境，但我比距更強大，皆因我就能夠操控夢裏面嘅一切，佢？只有出現呢個戲份而已。