約翰帶埋我同王瞬間轉移左—
本應如此。
作為大賢者,同時被稱為次元之魔女既約翰,理論上精通住瞬間轉移既術式。
然而,佢今次失敗左。
從來未試過咁樣既情景。
算係⋯⋯失敗。
唔係,正確黎講,空間魔法係成功發動左。
約翰同埋王成功咁轉移走左。
惟獨我自己一個,被遺留左係到。





山洞入面,得返黑騎士、蜘蛛女王、迦具土、天照以及我。
迦具土仲未知發生緊咩事。
而蜘蛛女王正好相反,瞬間明白到係轉移既法術。
蜘蛛女王依然抱實住我唔放。

重點唔係約翰同王轉移走左。
而係點解我仲留係到。
好明顯地,約翰使用空間魔法既時候,係諗住帶走埋我。
問題係,佢點解成功帶走左王同佢自己,但係帶唔走我?
成件事好奇怪。





「走左?算。咁,你又係咩人?」
迦具土劍指天照。

「迦具土,好撤退啦,佢唔係你可以應付到⋯⋯」
蜘蛛女王話中未完,迦具土已經展開攻擊。
蒼銀既劍影撲向天照。
同頭先一樣,只需兩隻手指,天照足以擋下呢記疾如閃電既刺擊。
「烈焰吐息」
迦具土零距離噴火。





噴火。
噢,燒死左。
吓,堂堂天照,咁就死左。
得番條燒焦左既屍,跌左落地。

「我話之佢係勇者定邊個,就算係龍王黎到,我都未驚過。」
「吓⋯⋯龍王?唔係,佢比起龍王⋯⋯」蜘蛛女王不知所措。

【風的元素使】暴風龍-希爾芙 LV70

HP:122580/122580
MP:143211/143211

力量:4711 敏捷:9015




防禦:6023 魔力:8255

颶風。
成個山洞吹散左。
龍降臨。
壓倒性既status、風元素使稱號。
毫無疑問,呢一位同之前既地龍王係同等既存在。
風龍王。

一講曹操,曹操就到。
迦具土、蜘蛛女王、黑騎士同時準備迎擊。
「風龍王?閣下來臨,所謂何事?」
迦具土企左出黎,睇黎佢話唔怕龍王,唔係得個講字。
「蜘蛛⋯⋯?呢個世界居然仲有蜘蛛類型既魔物。」





風龍王嘯叫一聲,風暴昇起。
上肢兩對手已經演化成羽翼,但不失龍臂既威力,係地上留下爪痕。
下肢雙腿強而有力,進一步逼近迦具土。
全身既羽毛隨住風暴飄起,好強既壓逼感。
就算唔係龍王,佢都一定唔係閒角!

「你仲有咩說話要講?」風龍王問。
「哼,我仲有咩可以講?」話口未完,迦具土變返做龍型態,撲上去同風龍王互咬。

「你可以講sorry,蜘蛛結界」蜘蛛女王用蜘蛛絲綁住左魯莽既烈焰龍。
「你傻架?佢係龍王啊!龍王直接隸屬於神明,係世界既代理管理員,係絕對贏唔到既對手。而且⋯⋯你頭先殺左既果一個人⋯⋯天照,佢唔係勇者,亦唔係魔王,天照係貨真價實既神明,係聯盟一直信奉既女神。」

咩話?
係神明?
係女神?




願女神與你同在既果一位女神?
即刻解釋到點解佢status明明咁廢都可以屌打大蜘蛛,仲可以隨時坐係地龍王頭頂上面。

「超!唔拿好玩既。」
天照⋯⋯果d焦黑既屍體爬返起身。

「無你個錯!我就係人見人愛、車見車撞既女神大人是也!」