力量上既差距……比想像中之大。
唯一可以確定既係,佢唔係我可以正面打得贏既對手。

「蠍子毒尾」
受左重傷既我,已經確認唔到眼前既情況。
只可以胡亂攻擊。
隨便攻擊。
理所當然的,打唔中佢。

「你打緊邊啊?」



佢一腳踢落我個肚到。
普通攻擊。
已經唔係技能。
都足以打到我訓係地上面。

「哈哈哈哈,乜你咁渣GA?」
蝴蝶女王飛埋黎,圍黎我盤旋。

不得不承認,佢真係好強。



「順帶一提,我既LV又升左,已經去到LV241。隨住時間,我係會愈黎愈勁,不過啊,你依家對住我,勝算都係零啊!哈哈哈!」

可惡!
究竟……LV強化器係邊?
必須破壞佢個LV強化器,先至有得打。

佢一隻手捉住我個頭,帶我飛上天。

「哎喲喲,無聲出啊?你唔係好憎我架咩?」佢問。



……

「嘻嘻,我知架,你好憎我,因為我對果個女仔見死不救。但係點解我要救佢啊?」

佢放開手。
我由半空跌到落地面。

啊,今次真係……
實力差距好大。
本來以為佢同火龍差唔多,點知佢居然開外掛。

「對唔住啊,無計啦,我實在唔想比人知我既身份係一隻蝴蝶女王,無理由為左救佢而暴露自己既身份架,係咪先?唉,之不過之前果隻火龍,叫咩迦具土,無啦啦攻過黎,暴露左我既身份,真係麻鬼煩。」
蝴蝶女王蹲係我既面前,望住動彈唔到既我。



「你係蜘蛛女王派黎,定係自己想過黎打我啊?定係WHY NOT BOTH啊?」

LV強化器……究竟係邊?

「去死啦,究極光束」
蝴蝶女王零距離攻擊。
巨大既光束炮襲來。

好險。
雙鉗回防,攻擊蝴蝶女王,令佢打偏左。
我雖然全身都傷哂,但係條尾都仲勉強郁到,令用條尾拉開距離。
尾巴插落牆上面,借一借力,拉我個身過去。

我拍一拍身上既灰塵,望住佢。



「LV強化器究竟係邊?」
「白痴啊你,我點會講比你聽啊,都話我收埋左係一個完全隱蔽既地方到,你無可能搵到既位呀!」

無可能搵到既位?
究竟係邊?
可惡!
點解我無可能搵得到?
點解佢咁有自信?
冷靜細心去諗。
佢唔係放左係呢一到?
唔會,一定係我附近,唔係既話佢唔會講「完全隱蔽」而係講「好遠」既地方。
姐係話,我仲有機會搵到佢出黎,破壞佢,然後……

「而且,你覺得你有能力去破壞佢咩?聖光射擊」



避開。
腳中左攻擊。
腳上面開左個大窿,好痛。
我既身體真係不可思議。
明明受左咁重既傷,只要HP未歸零我就唔會死。

究竟係咩地方?
先會符合哂佢講既條件?
一個我絕對搵唔到既地方。
一個我破壞唔到既地方?
可惡!
究竟係邊到?

望住佢LV,確確實實寫住LV241。
明明無幾耐之前仲係LV240,咁快佢就升左1LV。


點解可以升得咁快?
點解個外掛可以咁OP?
莫非我真係打唔贏佢?

……
啊。
原來係咁。
我搵到啦。
已經搵到個強化器係邊。
已有 0 人追稿