自殺以後，進入了RPG的世界: ☣諷刺

無法理解但哋既說話，甚至連佢哋既存在我亦一樣無法理解。
恰如蜘蛛一樣既灰色女人，被稱之為「神」之所在，來至異境之至高管理者打從基本上與我們相異，根源卻又同我哋無盡相同。
似是人，亦似是蟲，本質為神，身卻是人。

潛水艇内部。
UNCLE SAM最先進潛水艇。
自從見過天使之後，科學家幾乎無再講過任何既嘢。
佢只係得出一個結論，蜘妹女人，係同天使同等既存在。
異界既同等存在。





我大概都明白到科學家諗緊咩。
佢哋既目的係弑神。
天使同蜘妹女人，應該就係佢哋既目標。
號稱藍鯨都會直接殺死既子彈，居然唔夠膽將佢哋打入蜘妹女人或者天使既體内。
當真正既神明企喺佢哋既面前，佢哋居然如此既無用。
呢個已經唔係有無能力挑戰神明嘅問題。
而係根本無咁既膽量——講到尾一切都只係空談。

諷刺嘅係，科學家同子彈蟻繼續跟隨原本既計劃，經水路潛入意國再奇襲宗教之國。
四人特攻，佢哋相信四個人就足夠。





銀鑰匙。
據聞就存在於伊莉沙白既鐵盒入面。
無論係UNCLE SAM定係蜘蛛女，都跟隨著伊莉沙白而行動。
佢哋要既只係伊莉沙白，以及佢手上既鐵盒。
我理解唔到點解佢哋唔將我、其他村民殺死。
反正我哋就不過係銀鑰匙既附屬品。

窗外不時有巨大既生物游過。
無論係我哋認知既生物，抑或係未知既怪形生命體，只要對我哋有敵意，都會死於潛水艇既武器之下。




能夠殺死藍鯨既強烈毒素，似乎名副其實。

我喺到諗，如果能夠將子彈蟻手上既步槍搶到手，我係咪一樣擁有同非人魔物一戰既能力呢？
但係，子彈蟻可謂精英中既精英。
我一生縱橫戰場數十載，亦未曾見過如此精銳特種部隊。
呢個就係UNCLE SAM既秘密武器。

垃圾。
到頭嚟咪一樣，唔敢對神開槍？
我反而真係好想知，就算比你地殺到入去宗教之國，咁又如何？
明明真正既神都唔敢殺死，殺死區區一個教皇有何意義？

明明身處於深海之中，卻又感受到巨大既震動。
如同地震海嘯，但水流亦無巨大既變化。





「唔使擔心，只係核彈姐。」
就好似講緊「樓上整碎隻碗」姐，一樣平凡既語氣。
科學家終於打破咗沉默，輕描淡寫咁陳述呢個事實。

「上岸。」
潛水艇浮左上水面。
只見眼前本應為城市既存在變為烈焰之地。
「你哋就留喺度，不過要上岸我都唔會阻止你，船有保護衣，請自便。」

四個子彈蟻帶同伊莉沙白上岸，逼於無奈之下，我都只可以掉低村民喺潛水艇，同蜘蛛女一齊上岸。

佢哋係班痴線佬。
乜嘢奇襲，錯曬。
但哋係用核彈，由沿岸城市一路炸到宗教國。
用核彈嚟開路，簡直匪夷所思。





正因為咁，前嚟迎戰既唔係人類。
無數既惡魔喺天空上面。
核彈無法直接殺死既存在。

身為宗教之皇，居然號令惡魔還擊。
真係諷刺。