自殺以後，進入了RPG的世界: ❆白雪與女神

「去死，不知人心為何物嘅怪物！」

我嘅每一擊都係殺著，下下直取佢嘅性命。
蜘蛛無法避過，一下就被擊至重傷。

「我話哂都擁有管理員權限，係真正嘅女神，唔係怪物。」

我唔比佢有任何嘅喘息機會，再以人型埋身斬佢。
佢用蜘蛛網招架住。
但我立刻以冰附魔劍，將佢凍傷。





「喺你眼中，有無過我嘅存在？知唔知咩係朋友？」

「點會唔知，唔知嘅人係你。」

佢再拉開距離，大概隨時用空間魔法突擊。
佢唯一有效嘅攻擊方法，應該就係用空間魔法將異物送入我嘅體內。
但空間魔法發動之前，我必定會感到先兆。
如果係時間暫停再發動空間魔法嘅連擊就麻煩。
所以我唔可以比佢有發動時間暫停嘅機會。




我要不斷攻擊佢，直至確實咁將佢殺死。

「咁你嘅一生之中，究竟有邊個人係你朋友？係你同伴？無，完全無。無論係我定係蝴蝶女王，全部人都只係你嘅棋子！」

「咁你呢，存活咗數千年，三段人生，不過都係孤獨之人。」

佢以辛辣嘅語言刺激住我。
我唔會比佢嘅語言迷惑。
我要殺死佢嘅，幾千年執念係唔會咁易比佢花言巧語干擾到。





「無論係阿蓮=燈泡=所羅門王，抑或係Alice=愛麗斯=阿斯塔錄，以至Miss Chan=白兔，終無一人能夠理解你。」

「你想講咩？」

「你係孤獨嘅。」

「所以你想講，我地每一個人都係孤獨嘅存在，無任何人能夠成為另一個人嘅同伴？」

佢笑一笑，說：「你形成咗自己嘅孤獨？」

「你幾時變得咁多廢話？」

「你好了解我？」

「當然。我為咗殺死你，我鑽研咗幾千年，我不斷不斷咁變強，不斷咁去了解你嘅思維，目的就係徹底咁殺死你，唔再比你有復活嘅機會！」





「但，你唔了解我。你所謂嘅了解我，不過只係你腦內幻想嘅存在。係你腦補出嚟嘅假想敵，你能夠打得贏腦內假想嘅敵人，但唔會打贏真正嘅我。」

「放肆。你已經摸清你嘅脾性，你嘅攻擊方式，你嘅生存之道。理解另一個人係可能嘅事，呢點係你絕對唔會明白嘅事，因為你從來都唔會了解其他人嘅心情！」

「係，人係可以互相理解，只係你唔理解我，最少我係有同伴嘅。」

「哼，今次又捉咗邊個做棋？」

「我。我自己本身，就係小蛛蛛嘅同伴。」

我停咗手。

究竟由幾時開始，呢個披住蜘蛛外皮嘅人，並唔係梁同學。





「我係佢唯一嘅同伴，真正意義上，能㥤互相理解嘅存在。妒忌？」
佢笑一笑，邪惡女神嘅微笑。