自殺以後，進入了RPG的世界: 你與我

呢一刻嘅我，唔係代表住RPG世界嘅神明。
我就只係阿撒托斯。
僅僅係呢一個身份。

海龍王咆哮，張開嘴巴。
一道蒼藍的冰極吐息從天而降。
我好唔容易先避過呢一擊，但身後準備嘅蜘蛛網都一一被冰焰燃燒殆盡。

無攻擊手段。
基本上我無任何嘅手段正面打得低海龍王。




我有嘅，就只有空間魔法。

1.用空間魔法將佢傳送到RPG世界
2.用空間魔法傳送物體到佢嘅體內

但佢好似有備而來。
佢預讀到我嘅動作。
唔俾我用空間魔法強攻過去。
亦都一一猛攻我，攻勢從來未停過，唔俾我有發動空間魔法嘅空閒。





佢嘅幾段人生，都係為咗打低我而存在。
佢應該模擬過無數次戰鬥。
不斷鑽研我嘅弱點，幾千年生命只係為咗呢一刻。

但當佢復仇完之後，又諗住點做呢？
失去咗人生意義嘅佢，會好似燈泡咁，放棄自己嘅生命？

佢不斷轉換人形同龍形，攻擊連攜性實在教人驚訝。
時而龍息，時而揮劍。
我完全無還手嘅機會。





一瞬間嚟到我嘅面前，一劍破開我嘅下半身，巨大蜘蛛嘅頭部。
下方八隻眼立時破裂，下半身失去咗視覺，差啲平衡唔到。
佢嘅劍轉為龍爪，巨大嘅身驅一下子就將我上半身，人形嘅肚皮撕開。
我幾經困難先至錯開要害，總算保住性命。

咳。
內臟四裂。
如果我只係普通人類嘅話，應該一早就死咗。
作為蜘蛛女王嘅我，人形上半身同蜘蛛形下半身都係我嘅半體。
即使人形嘅內臟、蜘蛛頭部遭到破壞，只要人類頭部、蜘蛛內臟得到保存亦可以生存落去。
而我要確切咁殺死海龍王，就必須破壞人形時嘅要害，或者喺佢龍形時破壞佢嘅腦部或者心臟。
但佢龍形時嘅巨大身體，配以如精鋼般堅硬嘅皮膚，幾乎係處於無敵狀態。
同樣，人形態嘅敏捷性亦超出人類，甚至係蜘蛛女王嘅極限。
以我身體嘅靈敏，基本上係捕捉唔到海龍王。





簡而言之，海龍王處於不敗之地。

強力嘅殺手鐧，無。
逆轉嘅方式，無。
要點樣做，先可以打得贏佢？

我腦內演算過無數次，都搵唔到有打贏嘅可能性。

那就意味住我會死喺呢一道。

我能否接受呢一個結局？
如果係以前嘅我，絕對唔會接受。
無論係點樣嘅逆境都要搵到逆轉嘅方法。
但依家嘅我，變得無咁執著。





儘管如此，我仍然想活下去。
放棄生命係件多麼愚蠢嘅事。
即使保留記憶轉生到另一個世界，但已經係另一個人。
一旦放棄就咩都無，只係異地嘅其他人得到了你嘅記憶，誤以為佢係你咁解。
所謂嘅靈魂，不過就係呢一回事。
可以係執念。
靈魂相同，肉體唔同，都足以構成唔同嘅存在。
自以為同一個人，重複相同嘅事，靈魂嘅存在反而變成咗詛咒，將另一個人嘅人生破壞。

我唔想，就咁放棄作為小蛛蛛嘅我。
就算世界係點都好，都應該掙扎落去。
喺地獄之中掙扎落去。

活著多好——