魔王城入面,魔王既房間。
好耐都無番過黎屋企。
屋企(笑)。
同之前一樣,四圍都係塵同蜘蛛,同我走果陣無分別。
四圍都黑蚊蚊,關哂窗簾布,不過唔知點解我仲睇到野。
應該係因為我係蟲掛。

細心一睇,呢間房都幾有格調。
有一張大床,兩邊都擺左幾個櫃。
牆上面有個古式掛鐘,顯示緊依家既時間。


九點十二分。
計時方式同以前既世界一樣,都係十二個鐘為之半日。
唔講我仲以為自己仲係現實世界。
講起上黎,我黎左呢到已經一日半。
唔知,果邊個世界果到D人點呢?

呢間房其實都無乜特別,係大D姐。
果邊既世界,因為土地問題,好似係,跟本就唔容納到咁大間房。
不過,諗深一層,我係魔王,係土豪階級,有咁大間房都係理所當然。
而呢間房最大既特別就係黑色既盔甲,係張床隔離放左副黑色盔甲。


唔通就係比魔王用既特殊武裝?

[黑騎士盔甲:魔王專屬護衛道具。擁有【魔王】稱號者可以自由借予盔甲給任何人使用,使用者暫時獲得【黑騎士】稱號。]

[【黑騎士】稱號:可以遮蔽自己的STATUS,除魔王外任何人皆不能查閱其STATUS。]

唔,有D微妙。
大致上應該係比魔王既心腹用。
但係,我依個魔王邊有心腹呀,唉。
自己著又得唔得呢?


盔甲好明顯唔係比蟲著架囉。
得物無所用。
等我仲以為番黎魔王城可以搵到D有用既野添。

除左想搵有用既道具之外,我黎呢到基本上係想查探魔族。
雖然話用情報掌握技能可以知道一切,但係自己親手查一下會比較好D。

咦?腳步聲?
又有人黎?
唔係掛?
空間魔法冷卻時間仲未到喎!
點算?
死啦!
匿埋啦,唔理啦,匿埋先!



門比人打開左。
走入黎既,係一個女僕。
魔王既專屬女僕?
我既專屬女僕?
正啊喂!不過,我係隻蟲。
蟲。
搞錯呀!
點解會係咁架!

女僕好似係想打掃間房。
都唔怪得既,話哂間房咁多蜘蛛。
不過……
咦?
佢放低掃把,然後……
佢係我上面。


呀,唔係,正確黎講係佢瞓左係床上面,而我匿左係床下底。
……
蛇王?偷懶?唔怪得咁多蜘蛛!
我恢復番身份第一時間一定炒左你!
唔係喎,如果唔係佢偷懶,間房就無蜘蛛,咁我就無得升LV,咁我就無空間魔法,咁我仲以人困住緊。
多謝啦!女僕姐姐!無左你就無今日既我啦!
遲下一定要升你官先!

咕……
唔係下話?瞓著左?
偷懶都咁,魔王城搞乜?

算啦,唔好理啦,我都係偷走出去先。
走出房門,係個好長既黑色走廊。
之前行過,我保守估計魔王城真係座城堡。


無咩特別,魔王間房應該就係係魔王城最上面,所以我依家搵路走番落去。
魔王城雖然大,但係構造好簡單,最頂層只有一間房。
然後就係一條好長既樓梯。
中間唔知點解有個監獄,就係我出世果到。
咦?
有人?
唔係掛,最上面應該係得魔王間房咋喎。

唔惦,匿埋先!
求求其其匿係天花板……無錯就係天花板啦!
鐮刀同蜘蛛絲比想像中有用,居然吊到我上天花板。

行過黎既係一個藍色既男人,留住藍色既長髮,著哂果D咩古式西裝,總之係果D啦,我唔知叫咩。
睇個款又真係幾型既……
如果話佢係魔王我都信。


應該話,比起我,佢更加似魔王。
有魔王既氣息。

【人類的惡夢】吸血鬼-德古拉 戰士 LV98

HP:9756
MP:11066

力量:963  敏捷:972
防禦:952  魔力:999

好強。

感覺上,呢個人好有問題。
有咩問題,我又講唔出。
佢走左上樓,然後女僕就好快比佢趕左出去。

佢去我間房究竟想點?
雖然我好想知,但係我其實都好驚……
淨係知此地不宜久留。

行下行下,就行哂成個魔王城。
首先講一下外面既野先,魔王城座落響個小島上,包圍住小島既係一個湖。
魔王城比想像中大,大約有成個獅子山咁大。
不過,入面非常之單調,除左魔王房同中間、最低層有監獄之外,層層都係大大小小既房間啊,宴會廳呀咁。
最特別既一樣野就係,四圍都無人。

點解會咁?情報掌握?
[魔王日前宣佈動員全國兵力攻打人類聯盟]

咩話?
我無講過喎!
邊條友冒認我呀!
攻打人類聯盟?
人類聯盟……

[世界分為兩大勢力,人類聯盟和魔界。人類聯盟估據了大陸的西部,由精靈、人類、矮人三個種族的國家組成。魔界為東部大陸的勢力,由魔王獨自統治,由惡魔、不死族、龍人、獸人、哥布林、巨人等的種族所組成的勢力,魔王大多都為惡魔。]

魔王侵略人類,真係好老土既設定。
其實,都同我無關係。
我係魔王,又係勇者,但係同我無關係。
講咁多,我都只係隻蟲姐。

黎到最低層,入面都係咩都無。
監獄都可以無人。
算點喎。

然後,我發現左一個地下室。
魔王城地底仲有野。

鎖左。
咦,密碼鎖?
1、2、3、4、5、6、7、8、9、0
輸入密碼就開到?
好奇怪。
好想入去睇下。
但係唔知密碼。

[密碼是1234567890]
咦?
掌報掌握連密碼都查到?
莫非你係外掛黎?
最令人驚訝既係呢D懶人密碼……
佢係咪真係想鎖住架。

唔好理啦,入左去先啦。
黑媽媽,前面又係監獄。

有條龍比人吊住左,困住左響監獄入面。

【世界的破壞者】黑龍-尼德霍格 LV99

HP:987523
MP:999999

力量:8685  敏捷:8647
防禦:9234  魔力:9999

好恐怖既STATUS。
咁多條9,係指果項能力去到上限?
仲惡過之前果條龍。
之前果條龍,連劍聖都打唔到,何況呢條龍?
有咁強既怪物,魔界應該可以一下秒殺所有人類啦……
佢地究竟想點?

又係腳步聲?
比人發現左?
唔係掛?

係一把女仔聲。
[她說你是說?]
我又匿埋左。
點解我今日成日都要匿埋咁唔見得光呢?

惡魔-赫爾 LV99

HP:10011
MP:13124

力量:1001  敏捷:1102
防禦:1044  魔力:1304

我淨係知,再留係到,我會心臟病發。
總結一下我所知先,魔界出兵攻打人類,然後有條最終兵器收埋左。
人類,係無可能有勝算,始終最勁果個人都打唔嬴之前條暴風龍。
唔理啦,走左,空間魔法。
已有 0 人追稿