雖然想要去支援黃蜂,但係情況比想像中麻煩。
黃蜂一見到我就會攻擊,而且四人組比想像中強,一路遇神殺神。
暫時形勢黎睇,果隊人有極大既優勢。

神官同法師後面支援,弓手同戰士負責輸出。
真係天衣無縫既組合。
黃蜂完全唔係對手。
我睇定D局勢先,唔敢貿然出手。

都係算啦,一直匿埋算,完全搵唔到插手既機會。


一直匿埋可能仲好,等到佢地清哂D黃蜂,我再穿過呢片森林。
呢個時候同冒險者為敵實在太不智啦。

但係,我有D好奇,冒險者佢地要做咩任務呢?
[討伐區域BOSS]
情報掌握睇黎真係咩都查到……
區域BOSS,咦,BOSS?
咁既話,聯同BOSS一齊會唔會打得贏冒險者呢?
咪啦,BOSS一定會打鳩我。
不過我都係想知BOSS係咩樣,又會勁到咩程度?



我一路跟住冒險者尾,唔比佢地發現。
佢地打到入森林深處,同時受到兩隊黃蜂攻擊。
六打四,不過STATUS同LV上黃蜂都係比唔上冒險者。
戰士走上去,攻擊一隊黃蜂,黃蜂小隊即刻施展麻醉攻勢,但係神官即刻解除負面狀態。
好狗……點解可以咁!
弓手射左一支箭出去,爆開,係麻醉攻擊……以其人之道還其人之身。
話咁快已經收拾左一隊黃蜂。
另一隊黃蜂都係廢既,都比佢地秒殺。



點解我打得咁辛苦?
佢地兩下就搞惦,可惡呀!

黎到啦,一個洞穴面前。
BOSS就係洞穴入面,好似係。
佢地清哂附近既黃蜂,就走入去洞穴入面。
哇,好大隻!
好巨型既黃蜂!
腹部係個蜂巢,胸部有三對生哂毛既巨爪,頭部面目可憎,張開血盆大口咆哮。

蜂后 LV39

HP:4388
MP:4625



力量:440  敏捷:106
防禦:406  魔力:393

好強!
已經去到暴風龍個島既小怪程度!
即使係咁,冒險者都唔會輸掛。

戰士都係衝上前做坦,之不過蜂后一揮手,一D粉飛左落黎。
[麻醉(3秒)]
全場麻醉仲要唔使埋身!
好變態既技能!
只要神官都麻醉埋既話,就解唔到麻醉!
大黃蜂彎低身,一拳就轟開左隻戰士。
戰士得番1300血左右,然後神官即刻幫佢補血。
弓手試圖有麻醉箭攻擊,不過好明顯蜂后對麻醉有抗性。



蜂后又再大叫,然後隻手又FING過黎,麻醉粉又黎啦!
神官即刻跳去後面,避開麻醉粉,先幫戰士解麻醉。
戰士即刻走番上前線,怒叫一擊,之後用劍斬蜂巢。
都蜂巢唔扣血,好明顯係要打胸部或者頭部先得。
法師對準頭部,用大火球轟炸!
直接命中!
一口氣扣左成500幾血!

勝負已分啦,蜂后唔係對手。
不過,蜂后臨死都唔肯放棄,口入面眾集光束,係吐息!
你係龍咩!口入面點解會放到光束炮出黎架!
比突如其來既舉動嚇到,全場都扣左1000血。
哇,好變態既技能。
不過拖放時間其實高達三秒,只不過班人未見過先會比佢嚇親姐。


1000血雖然算係多,但係只要秒唔到,攻擊力再高都係無用。

藥。
戰士飲左樽紅色既水,即刻回左500血,再走上前攻擊。
佢把巨劍連揮幾刀,令到蜂后受到重傷。
坦哂大部份攻擊,然後可以靠神官同食藥補血,人類真係夠哂變態。

得番200幾血,蜂后都係咁大。
39LV既生物居然會比4個十幾LV冒險者打低,真係恐怖。
蜂后張開口,又係吐息,做最後既掙扎。
其他人即刻退後,但係戰士已經走唔切,硬食佢一炮。

呢一炮都已經無意義啦,咪住!
蜂后再用麻醉粉!
戰士得番400幾血左右,麻醉左,食唔到藥!


神官開技回血。
但係呢個時候,蜂后再用多次吐息。
咁高攻既技能居然咁低冷卻時間?
唔係,或者39LV黎講,呢招並唔係勁既技能。
不過,已經太遲啦。
戰士出局。
死左。
冒險者實在太大意啦。

臨死前都殺左個戰士,呢個蜂后都算係咁啦。
咦?
咁既?
蜂后升LV?
居然因為殺左戰士而升LV回滿血?
仲要……仲要進化?

毫無預兆地,蜂后脫離左蜂巢,然後變成人形。
應該話係,一隻黃蜂但係頭部變成左人類既頭部,留住金色長髮,三對腳變成人類四肢。
變到好細隻,然後係天上面飛。

心寒。

不過,原來怪物都可以變成人形?
咦?仲可以講野?

女王蜂 LV40

HP:3788
MP:4625

力量:390  敏捷:454
防禦:389  魔力:428

不過咁樣都未必殺到呢外三個人啦……
咦?STATUS突然之間變左?

女王蜂-拉斯維加斯 LV40

HP:6288
MP:6435

力量:480  敏捷:638
防禦:478  魔力:614

發生左咩事……突然之間上升左咁多?
多左個名?
女王蜂係到笑,唔知講緊咩。
班人想逃走,但係女王蜂飛到去佢地後面,擋住佢地去路。
笑,係微笑,係奸笑,係淫笑。
女王蜂飛到佢地頭上面,然後放麻醉粉。
全場麻醉狀態,然後一個飛踢正中神官,附加猛毒狀態!
弓手拎起小刀想攻擊,但係比女王蜂捉住隻手,然後一腳踢埋過去,重傷,仲要猛毒。
想拖放法術既法師比女王蜂攻擊,射左幾支針,中左毒。

唔得,STATUS差太遠啦。
神官同弓手都係女仔黎,受到重傷之後就爬唔到起身。
法師想企係身,但係女王蜂一拳打過去,再次跌番落地。

點解要咁做呢?
我自己都唔知。
然後,我行左上前,係眾人既目光之下走左上去。

鬼靈殺戮者 LV15

HP:2543/2543
MP:2519/2519

力量:247  敏捷:286
防禦:226  魔力:248

數值不過係我既3倍姐。
戰場上面,STATUS並唔係決定一切!

女王蜂無理我,繼續攻擊法師,但係我衝左上去,撞開女王蜂。
女王蜂望住我,然後開口。

「你係邊個?」

似乎,怪物係有怪物既語言,而我識聽怪物既語言。
咦?我唔識講野?
算啦,我望住女王蜂,然後,開始挑戰眼前既敵人!
已有 0 人追稿