[飢餓]
是咁的,頂……隻死人土元素一直守係我上面,一見到怪就打。
唔係問題,但係我點樣食野?
咩都比你一拳打到爆哂汁,我點食野呀大佬!
唔惦啦,再係咁落去,無野到肚會死架!

走又走唔甩,想同佢溝通又講唔到野……
唉屌!
走呀!
見到怪啦,係之前隻蜥蝪!


然後土元素一拳秒左,變左血水。
呀呀呀呀呀呀!唔好咁啦!

好肚餓呀……
我四圍遊蕩,睇下有咩可以醫肚,但係見到咩,都比土元素秒殺。
我受夠啦啦啦啦啦!
好煩呀你!
死開啦!唔該你!
當我求下你啦,咪阻住我搵食啦啦啦啦啦啦啦!



開始扣血啦啦啦啦啦!
蜘蛛鋼絲!
束縛住土元素先,再走佬!

但係走得唔遠,土元素好似知道我係邊咁,好快就追到上黎。
我受夠啦啦啦啦啦!
好煩呀頂你咩!
係咪想餓死我呀!
就黎行哂成個第4層啦,隻土元素仲係唔比機會我食野。



唔通,係新型既折磨人方法?
好邪惡,居然要我活生生餓死!
唔得!
一定要走得甩!
算啦,無可能架啦,餓死佢算啦。

行到第4層既盡頭,見到係一個人工石壁。
算啦,無希望架啦。
咦?唔係石壁黎?

【諾姆的僕從】 大地魔像-哥雷姆 LV92

HP:19635
MP:12435



力量:2052  敏捷:908
防禦:4035  魔力:1258

哇……
係一隻巨型既機械人類型既物體,以前打機成日見到既怪物。

痴線既數值,又係果個稱號……
然後,突然之間,佢開口講野。

「就係你,突破左第3層黎到呢到?」
係掛……我想開口講野,但係我根本就講唔到野。
「唔錯,居然,過到水棲暴龍同奈落蜈蚣,都唔知,幾耐無生物可以落到黎第4層。」
哦,關我咩事呀!我好肚餓呀,唔想聽你9UP呀!
「但係你,STATUS上,根本就,連第2層都,無可能過到。」
咁又點呀!我想走!好肚餓!PLEASE!


「你,好似,有D,奇怪。」
頂你個肺,9UP完未呀!
「諾姆,大人,想見一,見你。」
我唔想見你位大人呀!亦都無興趣聽你D世界觀呀!放過我啦!

我想走,但係果三隻土元素企左係到,唔比我走。
好煩呀屌!
「差D,唔記得左自我介紹,我係,大地魔像,個名叫,哥雷姆。」
我無興趣聽你D自我介紹呀!仲有呀,打開機都知魔像英文係Golem,音譯就係哥雷姆啦,設計你既人係咪咁懶呀!
最黑人憎既係,呢種杜O風既語調想煩死人咩!
夠啦!
我受夠啦!
走啦,比我走啦!

「請,跟著,土元素。」


唔跟呀吹咩!
必殺技!最終奧義!
逃走!

走呀!走呀!
五秒之後,比一隻土元素追左上去。
再過多五秒,比土元素捉番番去魔像前面。

就係餓死啦,不過,呢個STATUS其實都捉唔到咩怪黎食啦。
叫你位大人醫下我肚得唔得呀!
然後,土元素就捉左我落下一層。

唉……
咦?
咁既?


發生左咩事?

我比人轉移左去第二度?
無理由架,第4層應該用唔到大型魔法架喎!

我淨係見到有個森林,有隻1LV既山貓係到。
唔理啦,上呀,殺左佢,食左先!
[等級上升至LV27]
咦?殺1LV怪都有經?

又係果個人影。
我前面係一個著住白色袍既人,個人好細粒。
你係邊個?

然後,我就番番去第5層到。
完全唔知咩事。
果個人影係黎幫我既?
唔知呀,是但啦。
黎到第5層,土元素唔見左。

第5層好金……好黃金……
成層都係黃金做既,好閃呀呀呀呀呀!
 
已有 0 人追稿