「你好。先自我介紹一下,我係天照,係人類聯盟入面,專門鑽研魔法既人。雖然唔係話好勁,但係我都算係宮廷御用大魔法師,對於魔法都略有研究。一個月之前我觀察到有奇怪既生命體誕生,所以一直尾隨住你。呢一個月跟蹤住你真係唔好意思呀!」

眼前呢個十二、三歲既女仔突然之間出現。佢把聲仲要有少少嗲,係專登整出黎,呢種人真係好煩。

「真係失禮,我已經八十幾歲架啦,雖然睇落仲係一個細路女。呀,唔係呀,年齡係女人最大既祕密!其實我只不過得八歲架咋,哈哈。」

哇!讀心神棍?不過,我覺得呢個女人好危險。
大魔法師,仲察覺到我既存在。
呢個女人真係唔簡單。雖然佢救過我幾次,但係依家係咪要先下手為強,殺左佢先?
依家既我黎講,佢無可能係我既對手。


勝算好大,就殺左佢啦。

「喂喂,做乜唔講野呀!出句聲啦!搞到我好似自言自語咁。」

殺左佢?真係要咁做?

「喂喂,唔好扮唔識講野喎!我之前見到你同地龍傾計架!」

佢塊臉靠到過黎,好⋯⋯好近⋯⋯
等等,佢入到去第9層?


地龍王察覺唔到佢?
冷靜少少先,話唔定呢個大賢者,仲強過地龍王。
貿然出手只會對我不利。

「唔,做乜披頭散髮咁呀!你係蛛女,當住你係女仔先啦,雖然魔物無性別姐。」

佢笑一笑,然後搞我D頭髮。
衰人,咪搞我D頭髮呀!

「完成!束起佢咪幾好睇!」



喂呀⋯⋯放過我啦⋯⋯呢個人某程度上係我目前為止見過既最麻煩既敵人⋯⋯

「好啦喎你!好同我出聲啦喎!」

佢用力搣我塊臉,好痛⋯⋯好痛呀⋯⋯好啦好啦
算,都係發火屌走佢先,我都忍左呢個女人好耐啦,當我玩具?
唔發火當我病貓?

我吸左一口氣,然後⋯⋯

「Hi⋯⋯你⋯⋯你⋯⋯好⋯⋯」

呀呀呀呀呀!
搞乜呀我!


做乜會咁架?
唔係話要屌佢架咩?
做乜我會⋯⋯我會⋯⋯我會緊張架⋯⋯
死啦,我有幾耐無同過人講野呢?(怪物唔係人)

佢滿意咁點點頭,然後繼續問我叫咩名。

「梁⋯⋯蛛⋯⋯我叫⋯⋯叫我做蛛女就得⋯⋯」

「吓?咁隨使架!蛛女個名咁唔好聽!不如我叫你做小蛛蛛啦。好唔好呀小蛛蛛?」

不如一槍打死我.JPG。

算啦,一切都隨緣啦⋯⋯
仲有你啊⋯⋯咪靠咁埋呀!


我受夠啦⋯⋯我受夠啦,點解要咁樣折磨我?
好想搵窿捐。
好想死。
好想死多次。
⋯⋯
真係不如死左佢算。

「你⋯⋯你⋯⋯你想點?」
我問。

「無點。只係想跟住你姐。你想去邊我就跟到去邊。」
佢笑呀!佢對住我笑呀!心寒呀!
「咁無依家想去邊呀?小蛛蛛?」

算啦,睇化左。


咪理個煩膠住,決定我依定要做咩先。
打外星人?咪啦,呢個任難度太高。
但係依家既我真係無咩好做。

我望一望遠處,係個城鎮。
我諗,去一去城鎮,了解下人類仲好。

「等等?你想入城?」

我點頭。

「你諗住咁樣去?」

我望一望自己,自己成個身得個人頭同四隻腳。
然後,我點點頭。



佢托住頭,然後嘆左口氣。

是咁的,依家既我入左城。
當然唔係就咁入去啦。
我用左幻像魔法,令到四圍既人以為我係一個40LV既法師。
當然,實際上,我仲係LV80既蛛女。
幻像魔法消耗好高,但係似乎天照有技能可以減少消耗同埋分擔MP消耗,真係幫大忙。
不過,條件係,要令其他人產生幻像,以為天照係40LV既神官。
咁又係,大賢者無啦啦走出街,真係得人驚。

呢到似乎係邊境城市。
不過,講真,真係無咩特別。
同打機成日見到既城市一樣,真係無特別。
不過,睇黎呢個世界升LV係一件好難既事(我係特例),周圍既人LV都唔高,40LV既我地已經算係好高LV。

於是,無聊無野做既我,就左入去一間屋入面。
唔係普通既屋,係冒險者登記所。
似乎,要去登記所做過正式登記既先係真正既冒險者。

好,接下任黎解下先。
天照繼續望住我笑,令我心裡發寒。

「你叫咩名?睇下先,STATUS上面寫住⋯⋯小蛛蛛?哈?無,我無野,無笑。」登記所條友真係欠打。

人類-小蛛蛛 法師 LV40

HP:3784
MP:4201

力量:363  敏捷:417
防禦:383  魔力:449

精靈-天照 神官 LV40

HP:4019
MP:4102

力量:371  敏捷:391
防禦:402  魔力:425

係呢個時候,我仲未知道危機已經逼近。
已有 0 人追稿