是咁的,因為我食霸王餐既關係,我被迫係到洗一個禮拜碗。
無論係呢個世界定係果個世界,錢is everything,我又再一次深刻咁體會到。
搞錯呀!無天理呀!比你搞到我食物中毒,你係咪應該要賠償我呀!
點解會變成咁,點解係我幫你洗番碗呀?
係咪我毒就好蝦D呀?
洗碗,真係好麻煩。
雖然幻像魔法令到人以為我係一個男人,但係實際上我仲係得個頭同埋四對蜘蛛腳既蛛女呀!!!
我點樣用果對牙籤前腳洗碗呀!洗到斷埋都未洗完一碗啦!

本來我以為白雪會黎救我,會幫我比錢。




唉,世態炎涼,居然唔見左佢。
呢個世界真係黑暗。
真係想一野殺哂呢班人。

正當我陷入左洗碗地獄既六日之後,放監前既一日,居然有人黎搵我。
仲幫我比埋錢找埋數添,多謝你呀,居然趕得切去到六日零二十小時趕到過黎救我,真係多謝你呀。
就係咁,我比佢由果間黑心酒館拉番出大街。

「請問……你係咪小蛛蛛?」
眼前一個叫風騷既女弓手過左黎救我。




我識你架?
唔……咦?
哦,原來你係早排同我、天照組隊既弓手。
仲差D比你個FD戰士殺左既果個弓手。
但係,點解你會發現到我係小蛛蛛?

「原來……原來真係你。我本來都有少少猶豫,但係名同性別都完全唔同。但係我感覺到你有小蛛蛛既氣息,所以……呀!放心啦!我唔會同人講你有女裝癖架。」
真係想一巴車埋去,然後大聲咁鬧佢賤人。
感應到?係咩意思?
[精靈特有的特殊技能:氣息感應]




[氣息感應:可以感應到指定對像的氣息,無視隱身狀態]
特殊技能呀?
如果我無估錯,呢個世界有三種唔同技能。
一係普通既技能,好似蜘蛛毒牙、蜘蛛結界咁。
二係被動技能,好似金屬體質、毒素免疫咁
三係特殊技能,如空間魔法、情報掌握

「係啦……之前,好多謝你救左我。」
哦。
「仲有,你之前果個……雖然冒險者協會果個人係賊黎,但係協會都有比到報酬你。仲有,佢地都有賠償番你既損失。呢到係你既,五百銅幣。」
咦?呢個咪係我兩段人生入面既第一桶金?!
哇!好耶!
五百銅幣可以買到D咩?
[一塊麵包]
痴線,打生打死先得一塊麵包?




呢個世界點樣生存呀!
唔怪得咁多人無去升LV打怪,而係去開鋪頭賣野啦。

可惡呀……
「係啦。請你……跟我去一去,精靈國家。」
精靈國家?
「唔?你唔知咩?人類聯盟分左五個國家,三個由人類統治,一個係矮人,一個係精靈。你係大賢者既徒弟,精靈王想得到你既力量,請你助精靈一臂之力。」
吓……
「實不相瞞,其實我係精靈王既私生女。」
吓……
一時間情報量太多,整理唔切。
簡易黎講,佢係精靈王個女,要帶我去精靈國家。
唔制,我要去打果個假魔王喎。
我先唔會去囉。





「我有個問題想問,點解精靈王唔去搵大賢者,而係搵我,佢既徒弟?」
佢嚇左一跳。
「呀……無,只係估唔到你會講野,嚇親我姐。」
呢個女人真係好失禮。
「你唔知咩?依家大賢者幫緊人類聯盟最大既果個國家,幫緊所羅門王做野喎。你都知所羅門王同精靈王幾唔鐘意對方架啦。所以,精靈王咪要搵人幫手抗衡佢囉。大賢者不嬲都唔收徒弟,佢收得你,你一定有咁上下水準。」

聯盟內戰,你撐邊隊?
#TeamEIF請比LIKE #TeamHUMAN請比心心
我真係擔心人類聯盟既前景。
依家仲鬼打鬼,邊個最開心?
唔洗審,假魔王最開心。
我唔得閒幫你到鬼打鬼,我都係去打魔王。

「精靈王一定唔會待薄你,呢到係你既酬勞,如果你肯擔任我地既宮廷魔法師,會有更多報酬!」
有幾多呀?




五百金幣。
咦?
[一金幣=一百銀幣=一萬銅幣]
「好,我應承你。」

「呀!原來你係到!」
呢把聲,係白雪!
「請你務必要成為我既同伴,我地要去拯救呢個世界!」
去死。
之前拋棄左我,依家先黎搵我。
「咦?你係勇者?」風騷問。
「呀!幸會!你好,你係佢朋友?我係勇者白雪。」
點解你可以厚面皮到周圍同人講你係勇者呀呀呀呀呀!
「勇者……唔好意思,佢應承左我,要去精靈國到幫手。」
「吓?唔得!呢個世界一定要靠佢黎拯救。癡線蜘蛛D蜘蛛絲癡住枝樹枝先生,你一日唔幫我手,我一日都唔會走,都會跟住你。」




去死。

去死去死去死去死去死。
好煩呀!!!