完全唔知發生緊咩事。
一切都太突然……
個狀況就係,神同埋一條龍落左黎單挑外星怪物。
而果隻外星怪物,好明顯就同之前果D唔同。

強烈既異樣感。

外星怪物係一個湖?
然後,一大堆奇型怪狀既生物係湖到爬出黎。
無手無腳既魚人、地上面蠕動既爛肉以至去到三頭六臂既甲由,總之湖上面既都係詭異既生物。



【不淨之源】 阿布霍斯,呢個就係佢既名。
然後,其他一切既STATUS都出現左亂碼。
根本就係……怪物。
如果話果個男人,黑色盔甲既奧丁係神既話,呢隻野就係魔神、係邪神。

<錯啦,係外神>

佢既聲音直接傳入我個腦入面。
外神?



奧丁突然之間將佢把長槍掟出去,插入湖面,然後大爆炸。
湖上面既生物好多都比爆風炸死。
但係,即使係神都好,都係殺唔死果隻怪物。
GM都搞唔惦既外掛。

阿布霍斯身上伸出左無數既觸手出黎,同時衝去奧丁到。
奧丁個手上面,唔知幾時開始又拎番起自己把長槍,長槍一揮,斬開幾段觸手。

斬開係無意義既,斷開果幾段跌落地之後,又變成奇怪生物,撲上去奧丁到。



蜘蛛結界。

大家都比我突如其來既舉動嚇到。

「你傻左?佢唔係你可以應付到既對手!」
火龍講。

「哦?有趣。」
阿布霍斯停哂所有攻擊動作。

「……」
奧丁完全無反應。

而我,只係企左到,凝視前方。


冷笑幾聲,再笑而不語。

仆街、手殘!
撳錯制呀呀呀呀呀呀!
你地繼續啦,唔洗理我架……

「我話你,你啊,蛛女。你,係咪有少少唔同?」
阿布霍斯說。

放過我啦……
點解要咁對我……

「我以前係咪見過你?你好似有少少唔同。不如咁啦,成為我既僕從!」

「咪聽佢講!成為佢既僕從既話,就會變成果D核突既生物……」火龍即刻駁嘴。



「關你咩事!」
阿布霍斯即刻飛左幾條觸手出黎,將果條龍打到中重傷,如果唔係奧丁護住佢既話,大概已經死左。
「我保證,絕對唔會變成咁,你將會變成最強既舊日支配者,好似係見過既克蘇魯、拉普拉斯之妖咁,唔係,你會比佢地更加強!」

奧丁咩都無講,只係一味衝上前。

「不過,你地都幾做得野喎!奧丁!居然咁快就發現左,如果再過多半日既話,大概已經污染到呢片大陸。」

奧丁把槍開始發光,係黑色既光。

「黎啦,等黑暗污染一切啦!」外神係到鳩叫。

「永恆之槍」奧丁將長槍掟左出去。



大爆炸。
之後係一片閃光。
咩都睇唔到。

如果,我企係外星人果邊既話,我會成為最強既舊日支配者?
我應該點做?

我要--

1.企係外星人果邊
2.企係天照果邊

而當我醒番既時候……
已有 0 人追稿