火龍王走左之後,魔王城得番半棟。
好似話係因為主要幹道比火龍王破壞哂既關係,各大領主都番唔到去自己既領地到。
佢地全部人都要留守係魔王城到。

依家既我冒充緊巨人族領主,無所事事咁係街上面流連。
成鬼日都開埋哂D唔知咩會,好無聊,所以我就走左出黎唔理佢地。

魔界同聯盟其實都係一樣,有分咩冒險者協會,仲有佢地都有信神。
信仰唔同,佢地唔係信女神,而係信軍神。
唔洗審,果個應該係奧丁。



除此之外,所有野都同聯盟一模一樣。

「咪走呀!」
後巷入面突然出現左把聲音。

咩事?
行入後巷睇下先。

一個黑色既人,拎住把刀追殺兩個細路。


蜘蛛結界,捉住個黑衣人先。
兩個細路都係哥布林種,一男一女,應該係兄妹,大約只有6、7歲。
最奇怪既,明明只係6、7歲,居然有成30LV。

「發生咩事?」黑衣人驚訝咁問。

我捉住佢,然後問:
「發生咩事……應該我問先岩。」

「係……巨人領主?」黑衣人驚訝咁講。


「點解,點解你要追殺果兩個細路。」
「哼。我勸你精精地就放左我,如果唔係既話……」
「暗影長槍」

一槍打穿佢個肚。
哇,已經殘血。

「你……」

我一腳踩落佢到,殺死左佢。
明明隻腳係蜘蛛腳,但係居然可以一下踩死左佢……
真係好脆弱。

「發生咩事?」
我問果兩個細路。



果兩個細路好明顯唔信我。
好,殺埋佢地。
講笑。

「唔係掛,你要殺死佢地?」
背後有把聲音。
我另轉頭一望,又係天照。

「你去左邊,做咩依家先出現?」我問。
「出左少少事姐。」佢笑一笑,然後又消失左。
奇奇怪怪咁。

「放心啦,我唔會害你地架,話比我知究竟發生左咩事?」我問。



「死……死啦!」
個男仔用舊石掟我。
好痛。
然後,果兩個人又走左。

「可惡呀,咪跑呀!」我追住佢地。

「等等!企係到!你係咩人!做咩追殺佢地!」突然間,後面有個人喝住我。
唔係掛,居然以為我係追殺緊佢地?
我另轉頭。
又係天照,佢對住我傻笑。
好煩。
唔理佢。

不過,佢地跑得唔夠我快。


話咁快就追到佢地。

「發生咩事?講比我聽啦,等姐姐黎幫你……唔係喎,我依家係男人LOOK,應該叫哥哥先岩……」
個女仔望住我,有D不知所措。

「真係……真係幫到我地?」
個男仔問。

之後,佢地兩個帶到我去郊外一個地方。
一片森林。
我地匿埋左係草叢入面。
面前既係一間屋。

農怪。
佢地話比我知,呢班人係到農怪。


成班細路,成幾百個細路,甚至有岩岩出世既BB,係到集體打怪升LV。
呢個唔係問題,最大問題係……

去到30LV既時候,佢地既武裝會被沒收,然後就有一個人走過黎殺哂呢班30LV既細路。

請一大班人,搞咁多野黎升LV。
用錢買人命,用人命黎換EXP。

我吸左一口氣。
然後,企左係身,衝入去。
已有 0 人追稿