是咁的。

我地一出門口,即刻比外神伏擊。
今次既外神係一粒圓石,類似係一粒有眼既彗星,個叫好似係叫【先兆】格赫羅斯。
無論係火龍妹,定係我,排骨都好,都比佢兩下打到重傷。
外神都光明正大出黎攻擊人,睇黎天照佢地真係搞唔惦。

外神同普通既生物係唔同。
佢地係脫離左STATUS系統,而活係STATUS之內既我地,所有既攻擊都只會減少到敵人既HP,換句話講,我地既攻擊係對外神唔同。
外神既攻擊唔係普通既攻擊,係對靈魂既攻擊。


依家既我,雖然係滿血,但係實際上已經身受重傷。

明明望到自己係滿血,但係感覺到自己就黎死既感覺真係好可怕。
明明以前既世界都係咁,都睇唔到自己仲有幾耐命。
只係,無得用數字黎量化既感覺真係好得人驚。

好大命咁,死唔去。
不過,我就同排骨、火龍妹失散左。
我走左入去個森林入面。
暫時安全,不過好辛苦。



呢到係?
魔界入面既一個巨型森林。
好陰森,天空永遠係黑色。
[魔境森林:傳說中的森林,有種魔力吸引著冒險者走進去深處,然後森林的主人就會審判冒險者的罪行,進行處刑。]

好似好勁咁。
不過,匿係呢到先啦,我諗外神唔會追到黎。
唔知天照佢有無事呢。
好難講。


不過,依家唔係擔心佢既時候,我都無必要去擔心佢。
佢係神黎,顧惦自己先啦。

係怪物!
突然間攻擊我!

森林棕熊 LV43

HP:5116
MP:4374

力量:564  敏捷:567
防禦:647  魔力:310

好弱……


係我太強定係佢太弱呢?

用人型態都打得贏啦。
不過,出黎測試下呢個新BODY都好。

棕熊撲過黎,我彎低身,一個日字衝拳打中佢心口。
好快!自己既速度比想像中快。
同前世相比,依家呢個人型身體速度真係好快!
我既拳頭打中左佢,壓後左佢幾步。
哇!根本唔合乎物理常識。
我呢個身體係個170左右,身材高瘦既女人,但係個拳頭可以打傷隻三米幾既熊。

技能呢?
如果係人型態,仲用唔用到技能?



蜘蛛魔眼!
仲用到!
隻熊即刻仲左猛毒。

蜘蛛結界都仲用到。
睇黎無乜問題……

如果係物理性既技能呢?
我有一招技能叫做死亡踐踏,本來係用蜘蛛腳瘋狂踩人。
咁,如果係人類身體仲用唔用到呢?

試下先,反正隻熊都比我用蜘蛛結界綁起左,試下用腳踩佢先。
死亡踩踏!
我係咁用右腳踩佢。
800幾傷害,人型態係用番人型態既STATUS,所以傷害唔高。


不過,我發覺呢隻真係好正,踩人既感覺真係好正……
死,我鐘意左呢招添。
唔惦。
用蜘蛛絲吊起佢,再係咁踩佢真係……
死啦,我上左癮添。
好想瘋狂踩人。

暗影長槍。
1000左右傷害。
1000其實都唔差架啦,之前排骨同白雪打果陣,1000點已經係好高。
不過,有少少唔係幾慣。

然後,突然間出現左好多怪物圍住我。
因為我係人型態?
怪物係會主動攻擊冒險者。


轉番做蜘蛛女王型態先。

黑暗飛彈。
5粒飛彈,每發飛彈做成1200點傷害。
比想像中高。

開幾炮就清哂場。
呢個型態用暗影長槍既話,可以打到10000點。

唔!
好勁。
雖然係自己讚自己。
技能呢樣野其實都幾正。

好!我係呢個森林到休養下先,順便磨練下自己技能。
不過,黎黎去去都係果D技能,真係麻煩,無得升技能真係ON9。

[要打開技能樹頁面?]

85LV既我,依家先發覺原來呢隻GAME係有技能樹……
等我仲玩得咁辛苦……
已有 0 人追稿