其實呢個世界真係唔係幾公平。
好似我咁,前世已經係個靚女,到左今世都係一樣。

五年前出世既時候,我阿媽好似生左我同我細佬之後死左。
而五年後既我,身為一個五歲女仔既我,繼承左阿媽既美貌。
明明只係得五歲,但係已經係成條村最入面果個。
依家既我,同阿爸、婆婆相依為命。

大家都好錫我,可能係因為我好有禮貌啦。
係大家眼中,雖然我得五歲,但係大家既眼中我係一個千金大小姐一樣。


好有禮貌,係個萬人迷。
已經係人生贏家。
真係好唔公平囉。

呢個世界應該係打機既世界,好似係要升LV打怪。
我心諗,點解要咁傻?
攞自己條命去打怪,係咪傻架。
好地地咁生活咪幾好,好似我婆婆咁,咁老,但係1LV都未升過。
LV唔係重點,重點係我點樣生活姐。



錢係重點。
呢個世界最重要既唔係LV,而係錢。
有錢既話,可以要班高LV冒險者黎奶你鞋底都得。
所以,我真係唔明,阿爸咁辛苦出去打怪係為左D咩。

但係,我點諗到,五歲果年發生左一D事,改變左我既一生。

果日,我只係好平凡咁坐係屋企HEA。
本來隔離屋果幾個男仔係咁叫我出去玩,我都拒絕哂。
好辛苦架,比班兵服侍係一件好辛苦既架黎架。


要扮哂乖,班人咁蠢都唔可以鬧佢,又要點又要盛,其實收兵都好辛苦囉。
成日都話做兵慘,有無諗過我仲慘啊,成日都要對著班好憎既人。

只係我無諗到,我以後都見唔到果幾個男仔姐。

如果問我點睇我屋企人,無論係呢個世界定係以前既世界,我都係幾鐘意佢地。
佢地同兵唔同,大概係唯一真心關懷我既人吧。
就算係細佬都好,佢都同其他男仔唔同。
佢唔係因為我靚先同我一齊玩,而係因為我同佢係親人。
最起碼係我心目中,親人同街外人係唔同既。

不過,依家有個好大既問題。
就係我細佬失蹤左。
究竟去左邊?
我真係好擔心佢。


屋企人覺得事情好似有D唔對路,所以唔比我出街,要我拒絕哂其他男人既邀請。
發生咩事呢?
佢地唔講,淨係鎖住我係間房到。

老實講,呢個鎖我一腳就踢得開啦。
但係問題係點解要鎖住我?

阿爸出左去,唔知做咩。
我聽到門外面有把聲,係婆婆把聲。
聽得唔清楚,淨係聽到個「蟲」字。
完全唔明。

究竟發生咩事呢?
我坐係床到,無無聊聊咁望住道門。
我有種不詳既預感。


房門外出現巨響。
有種不安既感覺。
好奇心驅使下踢開道門。

係一隻蟲。
係一隻……一隻巨型既螳螂?唔係唔係,有兩對手既螳螂,下半身同埋個頭係蜘蛛。
佢成身都係血,成口都係血……殺左人?食左人?
究竟……發生咩事?
無理由,會有怪物黎到村入面架!

「你做咩走出黎呀!」
婆婆走過黎護住我。
婆婆……
對面係怪物……
但係我……


爸爸……爸爸係邊?

怪物啊!
怪物係無人性既,見到呢個場景無退後,無放過我地一馬,只係舉高鐮刀。
一刀斬落去婆婆既身上。

婆婆!
我想大叫,但係叫唔出聲。
突然之間有種感覺,咩都無所謂了。

婆婆仲未死,佢抱住怪物隻腳。

「求下你……放過……放過愛麗斯啦……唔好食左佢……要食就食我啦……」
我望住佢。
親人啊……如果係兵既話,應該推左我去食啦。


但係,呢一刻咩都無所謂啦。

我只係見到婆婆係血泊之中抱住怪物隻腳。
然後,怪物用鐮刀插落去婆婆身上。
一刀、兩刀、三刀、每一刀都準備無誤咁刺入婆婆既身體入面。
唔知幾時開始,婆婆已經斷左氣。

我咩都無講,無大叫,無喊,咩都無,只係呆呆既,企係怪物面前。
是但啦。
怪物用鐮刀抬起我塊臉。
係要殺我?
點解要殺哂我地?為左咩?

跟住,就係要食我?

又一次,明明係大好人生,點知無啦啦我既人生又要終結。
食左我啦。

但係,怪物走左。
唔知點解,怪物走左。
留低左我同婆婆既屍體,就咁走左。

當我反應過黎既時候,先發覺成條村,所有人都比佢食哂。
已有 0 人追稿