簡單講一下情況。
白雪同埋之前果個細路女(原來係叫愛麗斯)入黎魔王城刺殺我,然後排骨同火龍妹出去迎擊。
誒?我做過D咩要比人刺殺呀?
明明我日日都係到蛇王,無做過魔王要做既野,點解要黎殺我呀?
搞咩呀?
第一日番工就比D咁既野我嘆。
算啦,反正排骨同火龍妹會同我搞惦,我就坐係到食花生啦。

好,講排骨VS愛麗斯先。
愛麗斯好似同排骨有咩深仇大恨咁,吓吓都要攞佢命。



「哦!你就係之前果個妹妹仔!之前無見你一排,估唔到你成熟左咁多!」排骨講。
性騷擾?
愛麗斯唔理佢,然後開技能。
「皇家守護」
地上面出現左兩個LV60既黃金盔甲攻擊排骨。
排骨拆開佢枝杖,抆短劍,迎擊盔甲。

「光束球LV3」
愛麗斯附近出現左三個光球,同時攻擊排骨。


睇黎愛麗斯D技能係煩膠型,叫哂一大堆野出黎攻擊人。

「暗影……」排骨想攻擊,點知即刻比愛麗斯反擊。
「暗影封鎖」愛麗斯開技,唔比排骨用暗影技能。

慘,堂堂LV99既不死族領主比呢個LV60既5歲細路女屌打。
使唔使去幫佢呢?
應該唔使掛,爛船都有三根釘,就算排骨幾咁ON9都好,都唔會輸掛。

反而,要留意既係白雪對火龍妹。


勇者(自稱)鬥惡龍(人)。
擔心既係,火龍妹會唔會殺左佢。
雖然殺左佢都唔係咩問題,反正白雪都無乜用……
不過佢既然自稱係勇者,如果呢個世界無左勇者應該會天下大亂。
姐係制做更多既麻煩比我。
所以,要係火龍妹殺死白雪之前制止佢。

「冰凍射擊」
白雪攻擊。
火龍妹撲左上去,抆劍斬佢。
好明顯,劍術黎講,白雪佔優。
但係技能方面,火龍妹勁好多。
「火球術LV3」
近距離放左個超巨型火球出黎。
大爆炸~


等等呀!你同我拆樓?
之前你老豆差D拆左我魔王城,依家先起番,你又同我拆多次?
火龍果然都係痴線佬!

「爆裂火焰」
超級大爆炸。
果然,火龍妹係好憎我,佢以打白雪為名,拆魔王城為實。
白雪受左重傷,退後。

救命。

火龍妹再指住白雪,然後--
「火流星雨」

「魔法反制」


算啦,屌佢都廢事,直接反制佢開技先,然後走上前。

「排骨,呀唔係,不死、龍人領主,你地同我退後,等我上前了結佢地。」
我無奈咁行左上去。
可惡,我本來想偷懶食下花生算,點知呢個死人火龍妹專登開D咁既技能黎拆我魔王城。
算啦,當係熱下身啦,都好耐未郁過啦。
當然,我唔會放水啦。
蜘蛛女王型態!

排骨同火龍妹都退後,然後白雪同愛麗斯望住我。

我:「好耐無見啦,白雪。」
「你……你想點?」
「你應該知架,我係邊個。」
「咩意思……?」


「黑騎士。」
「……」
「然後就係勇者。」
「……」
「好耐無見啦,自我介紹番,我係痴線蜘蛛D蜘蛛絲癡住枝樹枝。」
「……」
「無錯呀,當日救你果個就係我,魔王。」

「咦咦咦咦咦?咩料呀!等等先,我唔明呀!」排骨係後面鳩叫,我唔理佢。

「唔好比佢迷惑到!白雪!」愛麗斯命令三個光球同時攻擊落我到。
避都懶得避,反正對我黎講都係R痕。

愛麗斯:「佢係怪物呀!無論點都好,佢都係一隻怪物,四圍殺人既怪物呀!」
我:「四圍殺人?好笑。如果唔係你無啦啦打我先,我會殺番你地?仲有,人命就係命,魔物唔係命?你地可以殺魔物,但係唔殺得人?咩心態?」


「收聲呀!」
「點呀!唔夠人講就打人呀?」
「你殺左我既老師呀!Miss Chan呀!點解呀!好似你呢D咁既怪物,點會明呀!」

Miss Chan?
全場靜哂。

「魔王,Miss Chan係咩意思……你殺左佢?」排骨問我。
我殺左Miss Chan?幾時既事……
然後,愛麗斯係轉生者?

「你……你都係轉生者?點會……」愛麗斯問我。

「無錯,好似係你呢D咁既魔物,點會明白人既感情。」白雪一步一步行前,拎劍想攻擊我。
已有 0 人追稿