【苦】《英雄聯盟》 - 一件次世代既愛情工具: 《憐憫》

咔——咔嚓——

當天晚上，我放工返到屋企後，二話不說就衝入房間。

阿媽見到我就開口問：『阿仔食幾多碗飯呀～？』

『唔洗喇，』我臨入房前拋下一句：『頭先同同事食左。』


當然，我梗係未食飯啦，只不過…我約左條女呢個鐘數，為免佢話我淆底，都只好硬著頭皮餓住肚咁應戰。



我邊打開電腦，邊係度諗；Cacilla竟然夠膽下戰書挑戰我，唔單止係我，而係約戰五打五既私鬥，果刻我真係覺得佢不識天高地厚。

我按平常輸入密碼同帳號登入後，便將記憶中Cacilla既ID加為好友，因為佢個名實在太易記，係遊戲中既ID同佢真名差唔多，叫「亞絲娜」。

加完好友入房，兩隊各自邀齊人滿左十個人後，我就用SKYPE打比我一個好拍擋。

嘟—嘟嘟———

一段熟悉既SKYPE音樂響起。



「喂？」我戴上耳機，調整支咪說道：「聽唔聽到？」

『收到，』聽筒另一邊傳來男聲：『做咩咁急搵我呀～？』

「朗神如果唔係緊要野都唔敢麻煩你啦。」我客氣地說。

『屌，講呢啲，』他淺笑一下後：『點呀，登入緊啦，想打咩路。』

「喂等等～！」我立即喝止：「用個廢ACC入黎啦，唔好用正身。」



『點解？』

「因為我想比個教訓一個人。」

『哦～？聽落…衡仔你好似有新目標咁喎？咩人黎架，我識唔識？』

「妖…多事喇你。」


而家同我傾緊SKYPE呢個人，佢叫張逸朗，係一個讀緊書既IVE仔。

佢同我一樣，都係打機既高手，而且係食女呢一方面既造藝可以話與我有過之而無不及。

而我同佢唯一既分別就係：我同女仔搞野係要睇心情、睇外表、睇樣貌、仲睇少少感覺。



但逸朗兄佢就唔同，由我識佢到而家佢已經係不論好醜，但求就手既人黎。

上至女神，下至豬西佢都一網打盡，只要有塊西、有對波、唔理係十八定三十八，佢都照樣大膽去上。所以佢食女既經驗都比我豐富得多。


我能夠識到佢…都係基於呢個遊戲。


呢個時候有人可能會問：喂，你打機咁勁，做咩唔去參加啲戰隊去打比賽？羸左會有獎金喎！

而我就可以果斷咁答你，想發明星夢，貪虛榮感先會去參加果啲戰隊。

點解？



好簡單，試問作為一個戰隊既專業級玩家，本身既職業已經唔可以做，每日只能係戰隊入面參加訓練，同打比賽。

再者，入左戰隊就會有比賽直播，同時知名度都會大大增加。

試問到時候…我仲點可以靠住呢隻GAME去周圍識女仔？而且我可以話你知，英雄聯盟呢個圈子好細，分分鐘係網吧打緊機既都係你朋友既朋友。

所以，為免被女仔點相，我同一班朋友雖然已達菁英級，但都會將自己既身分隱藏起來，咁樣做既話，我地得到既唔單止女更多，錢都會更多。

無錯，就係錢。

我認識張逸朗既另一個原因，就係我地係一間英雄聯盟「代練」工作室入面做野。

呢個工作室所接既客人，每個月所分到既錢，幾乎比我返超市份工作仲要多！

有錢收、有女溝，試問咁圓滿既人生仲夫復何求？




『咁呀……』逸朗猶豫了一下道：『我用個銅牌去玩囉。』

「咁又唔好…」我立即解釋：「用個銀牌既客人ACC去玩得啦，驚嚇親人就唔好啦，哈。」

『收到。』


我地兩個一邊傾SKYPE一邊連同另外三個隨便邀請既好友一齊開始遊戲。

我選擇左可以周圍幫既李星打野，而逸朗就選擇左一個打全場既汎去做ADC。

出現LOADING畫面後，就留意到另一邊廂既Cacilla就叫左一班白金至鑽石既朋友去幫拖。



『嘩，鑽石好驚喎。』逸朗輕挑的道。

「鑽石級你話人定勁……」我皺著眉，苦笑道：「咁我地中、韓、美、台四服菁英叫咩？」

『話唔定人地有女在場會有神級表現呢？』逸朗繼續輕浮的回答。

「喂，」我留意到下路，便說：「一陣唔好殺果個娜美support。」

『下？～』逸朗驚訝的道：『你叫ADC唔好殺人？即係叫我有女唔食架姐……』

「食食食，成日掛住食女，食死你呀。」我開了開玩笑。


戰鬥開始左之後，我地二人就收起嘻笑怒罵既心情，換上一貫專業、認真既作風去應戰。

好多人打機都會邊傾邊打，我地唔同，我地除左必要既提示之外，都唔會特別出聲，以免影響判斷。

同一般專業玩家唔同既係，我地既工作作風比佢地嚴肅得多。

因為如果幫客人代練，輸一場就即係浪費自己多一個鐘既時間。

試問呢個世界上有咩人鍾意返工OT？我可以答你一個都無。

『喂，你黎唔黎架，唔黎我殺架啦。』逸朗問道。

「隨便你啦。」

『哈，班友真係唔識玩架喎。』

「廢話唔多講，喇喇聲收佢地皮。」我將對Cacilla既不滿發洩哂係呢場對戰入面。


十八分鐘過後，下路既優勢已經雪球效應地愈滾愈大，而中上路有我既幫忙，亦都得到成果。

我地食埋小龍之後，唔打算再浪費時間，我主動ping敵方下路，然後大家收完兵線，回城買裝，之後便從敵方睇唔到既視野直接偷下路既塔。

而對面見地圖上無哂人，竟然全部去哂巴龍位置，仲傻傻地以為自己可以偷到巴龍。

當佢地打到巴龍一半之時，我地既兵線剛剛好到達敵方高地水晶兵營，然後我地便魚貫而出，將敵方兵營堡壘拆掉，再乘著兵線拆去雙塔。

雖然佢地都有所行動，但可惜仍趕不及同時回到城內，被我方逐個擊破，拿下呢場勝利。

[Victory！]


『超……咁就玩完。』逸朗歎一口氣說。

「喂…唔該哂你。」

『傻既咩，講呢啲，仲黎唔黎多場呀？』

「唔喇…下次再傾。」

『好～898。』

收左線之後，我便望住電腦螢光幕上，雙方既得分數字發呆。

因為我既指示，令到呢場敵方可謂潰不成軍，除左一個人。

Cacilla。

雖然佢呢場其實無咩作為，只不過係我有意無意地放水既情況下，佢竟然比佢班朋友取得更高既KDA分數。

[殺1死0助攻7]

而佢既鑽石朋友…全部都死左超過五次以上，簡直係天壤之別。

就係我自滿地發呆時……

嘟——嘟———嘟————


一個陌生既來電。

「喂？」

『喂喂。』

「喂？」我加大聲線：「邊位？聽唔聽到。」

『聽到啊……』耳機中傳來一把女聲。

「哦。」我不禁好奇的問：「你點解有我SKYPE既？」

『你個ID同你SKYPE名一樣嘛，咁我咪試下搵囉…』她語氣一轉：『做咩姐？而家唔打得比你咩？』

「哦哦～」我淺笑一下：「唔係…只係有啲意外姐。」

『哼，算你啦。』

「點啊你？」我故意輕挑地揶揄道：「頭先果場知道我既實力啦？」

『車！』Cacilla用高八度的稚氣聲線說：『你都殺唔到我～！』

「………」

原來佢真係以為自己打得好所以唔洗死，更加睇唔出我有放水比佢。

呢個女仔…真係天真得可以。


「咁你啲Friend點啊？」我轉移話題：「佢地個個都比你死得多喎。」

『咪係！咪係囉！』Cacilla忽然雀躍起來：『我都話我唔止銅牌實力架啦～你而家知我無講大話啦？係啲豬隊友拖累我…我先會跌左落去之嘛！』

一個女仔既自我感覺良好到咁既地步，完全唔覺得自己有錯，我真係服左佢。


「係喇係喇。」我苦笑著和應：「下次你搵過第二班我地再打過囉。」

『哼，無喇啵。』Cacilla驕傲地說：『我身邊都無咩打機勁既朋友既，最勁呢班架喇。』

「哦？咁慘呀你。」我敷衍著。

『你都覺呢～？嘻。』Cacilla像小孩般滿足地笑著：『拿，我而家比機會你，下次比你同我一齊打啦，見你都係得銀牌，我見你既實力……應該上到金既～～』


呢次，都係我第一次被人分析自己既實力。

而且仲要係一個身處係遊戲谷底既玩家去評估自己，果一種感受…

真係百感交雜。


「嘩…真係謝主隆恩喎………」我仍然苦笑著。


係同詩娜傾談間既短短十幾分鐘，唔知點解，我有一種好奇怪既感覺。

由早上第一次見面…明明我對呢種有錢人無咩好感，甚至佢對我作出既行為…我都會有討厭既感覺。

即使係直到呢一刻都好啦，我仍然覺得呢個女仔好乞人憎…好惹人討厭。

但唔知點解，我卻唔識反抗佢，而且仲要經常被佢羞辱，詆毀，鄙視等等……我都一一忍受得到。

係因為佢生得靚？又唔係丫…佢係皮膚白啲姐…以我閱女無數既經驗，呢類眼大鼻高嘴細既女，一街都係啦，年中更食唔少，我又點會比佢吸引到。

論身材又唔係特別標青、論聲線更係我最討厭果把未戒奶既娃娃音。

或者…我唯一諗到既原因，就係覺得佢好可憐。

明明佢咩都有，但唔知點解我就係覺得Cacilla既心底…隱隱約約好似流露一股可憐既氣息咁。

或者就係因為呢一點…係呢半年間…


我都無離開過佢。