【苦】《英雄聯盟》 - 一件次世代既愛情工具: 《迷霧》

唦唦唦———

花灑噴出黎既水無停過，但我既呼吸就好似停頓左一樣。


「唔係嘛…」


我難以置信地摸一摸個牙齒印，傷口唔係一般咁深，而且…仲有血塊凝固左既跡象。



「嘩屌…痛到…」

當我一觸碰傷口位置，一陣刺痛感立即從膊頭襲向我腦際之間。

毫無疑問，呢個傷口一定係詩娜所造成；因為詩娜既嘴好細…所以牙齒印就只有兩厘米左右。

但…點解佢會咬我？…


回想起琴晚發既夢，明明係夢境，但不知為何我卻感到非常真實。



甚至…連係漆黑中所呈現…詩娜既軀體仍然歷歷在目，而且…仲有果種少女既香氣…

唔通琴晚唔係發夢？唔通我真係搞左詩娜！？

「唔…唔會掛…！」

我內心不斷翻起無數波濤，我立即關上水掣，抹乾身體後衝到床邊。

望住前面呢張床；呢張我同詩娜曾經纏綿過既白色床舖，好似係。



我深深地吸一口氣，然後執起一角的被褥，合上雙眼…

用力一翻！

「求神拜佛……求神拜佛……」我合上雙眼不斷地默念著。

祈禱完一番後，我緩緩張開雙眼，從朦朧間集中視線，望住眼前既床單。

冇…

冇血。

「呼……」



我立即鬆一口氣。

但輕鬆左無幾秒，我腦海又不禁浮現出好多問題出黎。

啲人成日話破處會有血…但到底，係咪真既？

如果張床無血，即係我琴晚並無對詩娜做過啲咩啦？

如果係咁既話，我膊頭上面既牙齒印傷口係點黎架呢？


回憶中…

我記得係詩娜琴晚叫我比佢攬住訓…



我係咪係果時開始…已經開始發緊夢？

唉，我唔知，我淨係記得我飲左好多酒。


但岩岩詩娜打黎叫我起身…卻又話我係霸左張床阻住佢…到底邊樣先係真…

為求真相，最直接既方法當然係打多次比佢問清楚。


嘟——嘟嘟———


「喂？」我光著身子拿起手機道：「詩娜？」



『唔～？』電話傳來詩娜咀嚼的聲音：『做咩～？』

弊…我應該點問好呢？完全無組織過添！

「啊無……」我不停左思右想：「琴晚…我地…Er…」

『咩啊？』詩娜語帶不耐煩的說：『你想講咩呀任天衡？』

「即係…係呢…即係呢——」

『你想問我地琴晚有冇咩～咩～咩～？』詩娜用可愛的聲線一句打斷。

我立時目瞪口呆，尷尬地說：「係……」

『作死你呀～！任天衡！』



「吓…？」

『你咁都唔記得～！？』

「即係…」我面露難以置信的表情：「我地有…？」

『有你個頭啊！』詩娜聲線高亢的說：『你琴晚醉醺醺咁爬上黎張床喎…！咁我咪打你囉～』

「打我…？」我聽得一頭霧水。

『哼！』詩娜嬌嗔一聲：『點知你個醉酒鬼打極都無反應…仲一下撲埋添…！』

「之後呢…？」我彷彿不敢再聽下去，但卻忍不住繼續追問。

『之後…』詩娜想了想，續道：『之後我咪一野咬鬼你囉～！』

「哦…」我終於舒一口氣：「哈…哈哈，原來…原來係咁既！」

『唔係你以為咩啊～？』詩娜依舊擺出一副高傲的姿態：『你唔係以為我會蝕底比你嘛～？』

「無…點敢…」

『哼，梗係！』詩娜一輪嘴的說：『你咁樣衰～又唔細心～又生到成碌竹咁…我點會比你佔到便宜喎！』

「哦…」

『無野喇嘛～？』

「啊…有啊…」我想了想：「都係無……拜拜…」

嘟————


雖然聽到詩娜呢一番說話，我內心的確安寧下來，好彩，我琴晚無做錯事姐…

不過唔知點解，我覺得我同詩娜既關係…亦因為佢呢次澄清…而搞到好似停滯不前咁。

一切又回復到原點。


有時候，我係度諗，若果琴晚夢境所發生既事係真既…你話幾好。

可能…我地都只係差勇氣去踏出果一步。

雖然我知道自己個心到底係點諗，但…我卻無勇氣去……


＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

直到當晚。


嘟嘟—嘟嘟—嘟——

一段熟悉既Skype鈴聲又再次響起。

『喂？打咩路。』逸朗一黎就單刀直入。

「打……」我從紊亂的思緒中回過神來：「打TOP…」

『咁呀～我FILL啦。』逸朗想了想：『我去拎杯咖啡先。』

「嗯……」

隔了一會後。

『做咩呀你？』逸朗戴上耳機，語氣一轉：『心不在弦咁既？』

「我？」我反問道：「有咩…？」

『梗係有啦屌你！』逸朗一句怒喝：『用Taric打TOP，你係咪忽大左呀？』

「下…？」我回望電腦螢光幕：「Taric…？！」


果然，係我同逸朗幫客人打積分Duo rank時，雖然我早就係頻道上申請左打咩位置。

但一去到揀英時…我腦海入面仍未回過神來，遲遲都未揀英…隻手只係下意識咁隨便撳左一下。

點知好衰唔衰，揀左隻基佬塔里克去打上路，試問一條咁MAN，咁真男人既路…除左傻仔之外…仲有咩人會用佢去打？

於是，頻道既人都開始粗口橫飛…

「唉…」我無奈歎了一口氣。

『有心事？』逸朗追問。

「唔………」我猶豫了一下，決定坦白：「都算係…」

『點呀？又係上次果條女呀？』逸朗一語道破。

「上次？」我百般好奇地問道：「我有同你講過咩？」

『挑～你丫…』逸朗輕挑的說：『上次咪話左你認真架囉～！仲唔係為左女咩？竟然肯連自己job既錢都比埋我。』

「呀…係喎。」我回想起逸朗代替我幫阿晴一事：「咁果次阿晴點？」

『阿晴？』逸朗滿腹狐疑地問我：『原來你上次個客叫阿晴？』

仆街，大檸樂。

「Er……係…」我只能坦白。

『你唔係話果個係客人黎架咩？』逸朗接著說：『係要幫代打既客，應該工作室既agent先會知客人個名架喎，我地不嬲都淨係接acc去代打，你點知個客叫咩名？』

唉，紙始終都係包唔住火。

「逸朗…唔怕同你講…其實果條女…係我啲朋友黎。」

『朋友？』逸朗語帶嘲諷的問：『朋友定炮友呀？』

「你…」頓時間，我找不到半句籍口：「你明架啦……唉…」

『估到你啦死仔，』逸朗想了想後，不解的問：『不過我又唔明，明明係女黎丫…即係Friend with benefit啦？你幫佢打牌位，佢同你扑野，但點解你要彈比我？』

「屌…我唔同你…我搞野都要睇feel既，只係…我到最尾先知原來佢有男朋友。」

結果，我搵左另一個籍口，無將詩娜既事話比逸朗聽。

因為……我實在太熟悉逸朗呢個人，萬一比佢見到詩娜…分分鐘比佢食左都似。

點解我咁講呢？其實有原因。

因為逸朗不單止打機同我不相伯仲，佢現實生活上既家景都非常富裕。

除左有錢，佢外表仲相當討好，經常比女叫男神，每次落Club總有一堆女仔向佢投懷送抱。

佢當每一個女仔都係女朋友咁對待，萬一比佢見到詩娜既話…後果真係不堪設想。

『有男朋友～！？』逸朗大叫大嚷。

「係……所以…你明啦…」

『屌你！』逸朗忽然亢奮起來：『正呀喂！人妻我未食過呀！』

「下…？」我好奇的問：「咁佢又未結婚既……」

『喂，老老實實，』逸朗即時展露獸性：『條女幾歲先？身材點？Technique掂唔掂先？』

「好似…十八…九歲囉…」我不斷地回想：「身材OK啦…都有B既…不過最正係條腰同對腳囉。技術就——」

『肯定勁到仆街呢！？』逸朗一句撻埋黎。

「你又知…？」我不禁好奇地問。

『挑～～所以話你丫，』逸朗自信滿滿地解釋：『呢類有男朋友既半人妻就最撚正，擔得抬得不突止，吹蕭功夫一流就不在話下啦，你仲要話佢有條水蛇腰同長腿添…嘩屌你，真係諗下都扯扯地呀。』

「………」霎時間，我唔知比咩反應。

『喂，』逸朗從性幻想中回到現實：『兄弟——』

「閘住！我同你做兄弟咋，唔係襟兄弟呀。」

『唔洗咁呀～？』逸朗徐徐道：『有好野都唔益下自己友入兩球，話哂都拍檔左咁耐丫？』

「唉…」我不禁概歎：「你鍾意咪上囉…」

『拿，係咪架？！』逸朗喜上眉梢的說。

「嗯……」我分析了一下：「不過下星期既JOB錢我收返架喇。」

『超，有咩所謂！job錢之嘛，』逸朗毫不在意的說：『我地兄弟計呢啲野架咩？』

「隨便你啦…不過你唔好話識我就得喇…自己去add佢ID啦。」

『得，梗係識做啦。』逸朗意淫地說：『喂衡仔我問你，條女把嘴係咪好勁？』

「嘴…？」我尷尬地回想阿晴當晚…：「係…幾…幾好既。」

『肯定正到暈呀！』逸朗難掩其興奮：『我話你知丫衡仔，一條女如果識吹既話，把口分分鐘仲爽過下面呀！』

其實，好多人都會以為男人圍埋一齊一定係講女仔，呢點我唔否認。

不過私生活既事，當然有好似逸朗一樣，咩都拎哂出黎同朋友講既男人；

亦有好似我呢類咁收收埋埋，只係識得和應而唔表達自己意見既人。

因為…我總係覺得，做愛永遠都係兩個人既事，唔應該拎出黎同大家分享。


而係逸朗講到眉飛色舞既時候，我忽然間諗起一個問題…


『所以話呢，一條女張嘴掂唔掂，好睇佢既———』

「喂…逸朗，」我打斷了他：「我想問下你一個問題…」

『咩問題？』

「拿…係咁既…」我想了想：「你咁多經驗……」

『不敢當、不敢當。』逸朗扮哂謙虛地說。

「咁…」我鼓起勇氣問道：「你有冇食過處女…？」

『食人隻豬！？』逸朗聽後不禁大叫：『有就有既，不過……做咩咁問？』

「無…」我尷尬地笑了笑：「你知我無呢啲經驗架嘛，我想問下呢…處女第一次係咪一定有血…？」

『血？唔……』逸朗回想著：『唔一定架喎。』

「下？」我頓時目瞪口呆。

『係啊，』逸朗逐漸解釋：『就算條女係第一次做…都可能無血架。』

「點……點解既！？」

『哦，因為…』逸朗經驗豐富的說：『其實有好多原因既，有時可能做吓運動、踩下單車就穿左，有時可能塊膜生得太入，又或者生偏左…咁囉。』

「咁…脆弱…架咩…？」

『挑…唔係你估？』逸朗語調一轉：『做咩啊？想食邊條女隻豬呢？』

「………」我看著螢光幕：「開波啦…咁多野講。」


係短短五分鐘既揀英閒談期間，逸朗將自己既經驗同我分享哂…

我在意既…並唔係同逸朗做老襟呢件事，而係…詩娜琴晚到底有冇同我……

本身聽完詩娜講後，我都放低左少少，但聽埋逸朗既口供…我就覺得詩娜好似唔係咁簡單…


呢個時候，我腦海出現左幾個想法。


有可能詩娜係知道大家酒後亂性…為保清白…驚我會唔負責任，所以就扮無事唔講。

又有可能係…詩娜知道自己要離開香港，如果真係發生左既話…到時即使我願意負責任都好，我地都必須要異地戀…果陣時大家都會好辛苦…

仲有一個可能…係詩娜根本唔愛我，只係被我酒後亂性，強行將佢………

唉！屌！

天呀！好撚煩呀！


＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

之後果幾日，詩娜都無主動咁搵我，而我搵詩娜時…

大家都係一句起、兩句止，果種關係…就好似忽然多左一重隔膜一樣。

而且，經過左最近發生既事，詩娜都好似刻意同我保持距離咁。

但我呢？

我每日無論係返工，定係幫客打RANK，我腦海入面都會浮現出果日果個夢境…


『任天衡……你愛唔愛我…？』

 「愛…我愛你…」


當我合上雙眼時，無時無刻都會見到當晚…

詩娜一絲不掛、害羞地躺在我面前，然後…我烏低身…含情脈脈地望住詩娜既雙眼…

用畢生最溫柔既聲音…輕聲說出果一句……

成個畫面，就好似個Jungle地圖一樣，深深咁刻左係我腦海之中。

到底係夢境，定係現實，我已經分唔清楚。


直到一星期後…我同詩娜相約送機果日，我決定將所有事都搞清楚。

無論係當晚既事，定抑或我同詩娜既關係都好。

或者只要我…