【苦】《英雄聯盟》 - 一件次世代既愛情工具: 《承諾》－前傳終
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
機場二號客運大樓。
呢日我一日就起左身，呀唔係，正確啲黎講…應該話係無訓過。
除左係因為我每次合埋眼都見到當晚既事之外，更重要既一個原因係…
我唔知係離別既時候…應該同詩娜講啲咩好…
於是，我就諗左成晚，但結果…都係諗唔到。
一係我就怕瘀，怕無面；假如我謬謬然表白既話…萬一詩娜根本就無鍾意我既…我咪好柒？
我知，大家一定會話：任天堂你咁撚無用架？鍾意人咪出聲囉！
喂，大佬，你估打RANK咁易呀？唔係咁易架葉師傅。
其實我已經準備左好多開場白，其中有幾個我覺得都唔錯，例如；
「詩娜，」然後我就用誠懇既眼神望住佢：「其實…我一直都鍾意左你好耐，唔知你可唔可以同我拍拖呢？」
屌！呢個雖然好老土，而且好柒，但勝在咩呀？夠真心丫嘛！
不過…諗深一層…唉，都係唔掂。
又或者……
「詩娜！！」我激動力一手搭住詩娜雪白既膊頭：「其實我好鍾意你！唔好走！留係我身邊好嘛！！我愛你！」
嘩嘩嘩，頂你個嘴，真係諗下都覺得滾動骨痺喇！
但呢類偶像劇既情節，出現係現實既話…只有一個可能。
就係吸引左周圍既觀眾，然後詩娜被我嚇怕左即刻走人，連最後一句拜拜都唔洗講。
就算，真係比我成功左喇，咁又點！？
我每個月搵得果萬零蚊，照顧到佢咩？遠走高飛？話咁易呀！？
呢樣又唔得，果樣又唔掂…
到最後…我決定左用一個最普通…最真誠…最平凡…最內斂既方法。
假設係咁…
『詩娜…』我在她準備踏入禁區的一剎：『我有啲野想同你講…』
『嗯～？』詩娜撥著耳邊的秀髮，回眸道：『做咩啊任天衡？』
『啊無……』我鼓起勇氣：『其實…我好唔捨得你…』
『唔捨得…我？』詩娜此時應該目瞪口呆。
『嗯嗯，』我點著頭走近攬住她的嬌軀，然後在她耳邊細說：『我會等你返黎，無論係你離開呢段期間，有幾多女仔接近我都好，我都會一一拒絕…咁等你返黎。』
『傻…』詩娜被我一時的擁抱嚇到花枝亂顫，不斷拍打著我：『傻左咩！任天衡你…！』
『詩娜…』我慢慢把她鬆開，深情的對望著：『我一直都好鍾意你…！就算你要去讀書…我都會一直等你！…直到你返黎…我地…我地就拍拖…好冇？』
『任天衡……』
然後，詩娜便感動到哭成淚人般似的投到我懷抱，萬分不捨地離別。
好！一於就決定咁做！一定…一定可以成功架！
真係諗下都————
『任天衡！！』
忽然，有一把熟悉的聲線在我背後傳來。
「下…？」
我係人山人海既機場等候左好耐，終於等到詩娜黎到既一刻。
今日既詩娜…明明同平時既打扮無咩分別咁，但係我眼中……唔知點解，顯得佢格外迷人…
簡約既細身白色Tee 恤，秉承左佢一貫喜歡露出小蠻腰既可愛風格，加上迷你熱褲…一雙白滑長腿表露無遺，配上一對平底既vans鞋…清純中帶幾分mk…mk中又帶幾分可愛，更重要佢有一把長長既深啡秀髮，令人視線不禁停留係她身上。
不知不覺間…唔係講笑，真係硬左。
『哼！你到左都唔打比人架！』詩娜拖住個銀色行李箱走過來，嘟起嘴說：『人地搵左你好耐啦…！激死人！』
「Sorry呀…」我立即道歉：「琴晚我地咪約好左係coffee shop等囉…？你唔記得左喇？」
『任先生～』她皺著眉，語帶嘲諷的道：『你知唔知機場有幾多個coffee shop啊？』
「下…」我尷尬的道：「唔知呀…我以為等一兩個…」
『哼…算啦！』詩娜用小手輕輕搥著大腿：『任天衡…你幫我拎呀…個gip好重啊…』
「嗯…」我當然樂意幫忙，接過行李箱後：「咁…我地而家去邊…？」
『唔………』詩娜蹙眉細想，稚氣地道：『不如～～我地去周圍影下相呀～？』
「影相…？」我呆了呆立即答應：「好…好呀！」
『嗱…』詩娜忽然拿出自拍神器，臉紅紅的說：『你唔好誤會啊…我只係…岩岩買左部神器…想試下，試下部機咋！』
雖然詩娜並無直接向我明示，但我亦感到一陣幸福的感覺。
「好好好，我明白～」
答應了詩娜後，我便拖住行李箱陪詩娜係機場四處逛街。
今日既天氣…真係好好，陽光就好似我既心情一樣咁燦爛奔放，無論去到邊影相，詩娜都會自拍幾次，到轉地點前先勉勉強強同我影一張。
而我就好似一個服侍大小姐既隨從咁，拎住行李陪佢走來走去，但…即使係咁，我都無絲毫既不滿，反而覺得好開心、好快樂。
每一張照片入面，都有我…同詩娜既合照。
老實講，我稱唔上係咩靚仔，更加唔識對鏡頭擺pose，同詩娜係同一張合照入面，我就顯得份外格格不入。
不過…詩娜係照片入面所流露既表情，並無嫌棄我，反而…仲笑得好開心，好傻。
回想起過去半年，無論詩娜每一次點詆毀我，點笑我，點打我都好…可能當下我會黑面，會難受，會痛……但有一點好重要既係…我…並無介意。
半年多以黎既相處，除左返工，打機之外…同我傾得最多心事既…就係詩娜。
無論佢有咩唔開心，都會第一時間同我講；儘管詩娜最後永遠都會話：咁岩朋友訓哂先搵我傾訴。
而我比詩娜既印象，只係一個一事無成既男仔，就算打LOL都好，詩娜都唔會係佢朋友面前介紹我，因為自從第一次用客人ACC同詩娜玩後…我甚至用自己個菁英帳號換左客人個銀牌ACC去陪佢。
可能亦係因為咁，詩娜覺得我打機並唔係想像中咁犀利，因為佢身邊既…全部都係白金、鑽石、大師以上既朋友，試問又點會敢邀請一個銀牌仔呢？
但係，詩娜雖然無帶我去同佢既朋友玩，但詩娜都無離開我…
反而…詩娜寧願離開佢果班朋友，就算四缺一都好，詩娜只要見到我上線，就一定會Keep住online…等我邀請佢。
詩娜同我所識既其他女仔唔同，並不喜歡打積分，而係喜歡可以打LOL時同我傾訴一整日下來既生活鎖碎事……利用LOL作為一個渠道…可以一邊打機…一邊傾心事。
我地每晚…都會打到凌晨…甚至傾到唔捨得訓都試過。
詩娜對於我黎講，已經唔係一個愛上既人咁簡單…詩娜已經慢慢成為我既習慣…成為我生活既一部份。
我不敢想像，無左詩娜後……係夜深人靜既晚上，我真係唔知應該要點樣過…
而且係我放假既時候，再無人叫我起身；係我打機既時候…再無人叫我全名；
甚至…唔會再有人對我呼呼喝喝、唔會再有人打我、唔會再有人扮好嬲咁同我講…「關你咩事」。
詩娜去左英國讀書後，一定…會識到好多比我條件好既男仔。
而我…只係一個曾經出現過係佢生命中既普通男仔。
然後…詩娜會識到男朋友…會忘記我，忘記我地曾經相處既一段日子。
一諗到呢點…我就…
『一…二……嘻～』詩娜按下相機的快門，然後拿到自己面前細看：『任天衡…』
「嗯…？」我不以為意的道。
『做咩啊你…』詩娜看著相機皺著眉，抬起頭說：『你睇下你…苦口苦面～～苦瓜乾咁既～？』
「詩娜……」
呢一刻…明明我早已準備好一切想講既野，但…當我一望住詩娜對眼…
我就咩都唔記得哂…腦海一片空白。
『做咩啊～？』詩娜側頭問。
「無…」我有點忍不住淚水，望向別處：「係呢…你幾點機～？」
『唔……』詩娜看了看時間：『差唔多喇…』
「哦……」
我真係好無用，係最後一刻，我都仍然無動於衷…
我全身僵硬哂，個腦都實哂…完全唔知呢一刻應該要做啲咩！
明明…我好唔捨得詩娜，明明…我有好多想同佢講，但點解…點解要離開我…
『任天衡。』
「吓？」
『我要走喇…』
「哦…咁…」我仍找不到半句話：「咁…一路順風…」
呢句…絕對係我人生中講過最廢既廢話。
『哦，』詩娜一手接過我手中的行李：『咁我走架喇！』
「嗯…好…」
詩娜瞪大雙眼，佯怒地盯著我：『我—真—係—走—架—喇。』
「保重…」我的淚水不停在眼珠打轉。
『任天衡！』詩娜大聲地喊著：『你真係無野同我講！？』
「有…有呀…！」
我呆呆的望住詩娜…望左足足成分鐘…望到入哂迷…到最後只拋下一句…
「去到…記住…打比我…」
『任—天—衡—！！！』
詩娜一邊叫著我個名…一邊非常大力地打我，就好似…想打醒我咁。
『拎隻手畀我！』詩娜伸出手說。
「拿…」我仍然痴痴呆呆咁，伸出手：「比隻手你…做咩……？」
我講到一半既時候——
「啊！！！」
詩娜雙手捉住我隻手臂，然後張大嘴巴，狠狠地一下咬落黎！
突然間，我好似醒左咁，好似一個迷失左係夢境入面既人…被詩娜叫醒一樣。
我不自覺地因痛楚而大叫左一聲，回過神來，只見到詩娜…流著淚咁咬我手臂。
雖然…我被詩娜咬住…但…我彷彿感受到詩娜個心好似比我仲要痛一樣…
「詩娜……」
『嗚…嗚嗚…』
呢一刻…我只係知道…要攬住佢。
詩娜係我懷中不斷喊…而我…終於都忍唔住淚水…
小時候既我曾經講過，唔會再係人面前…流一滴眼淚；
過左十幾年後，詩娜…係唯一一個令我流淚既人。
「詩娜…對唔住…對唔住…對唔住！」我撫著她的臉：「我好無用…但…我真係好唔捨得你…好唔想你走…！」
『嗚…嗚…咽咽…』
「但…詩娜你記住…我任天衡，一定…一定會等你返黎！」
『嗚嗚…』詩娜不斷地拍打我的胸膛：『衰人…衰人任天衡！』
「傻婆…」我雙手撫著詩娜的臉，抹去她的眼淚：「仲記得嘛…？」
『嗯…？』詩娜哭成淚人兒的凝望著我。
「我講過…永遠…唔會離開你架嘛…係咪？」
『嗚嗚…！！』
終於…我都將自己心聲表達左比詩娜聽。
呢一刻我終於知道，最重要既並唔係表白，更加唔係去確定兩個人既關係…
最重要既…反而係一個承諾。
一個等待既承諾。
「傻婆…乖啦，唔好喊喇…」
『任天衡…你要等我啊！』詩娜泣不成聲的說：『你…你唔準識其他女仔架…嗚…你要等我返黎…一定要…』
「我會，」我攬住詩娜，輕撫她的玉背：「我一定會等您。」
『嘎…』詩娜萬分不捨地離開我的懷抱：『咁…我要走喇…』
詩娜拖著行李箱，慢慢走到禁區入閘處。
「記得食多啲野呀…！」我忍著淚，向詩娜的背影大叫：「咪掛住減肥而唔食野呀！…如果你唔肥肥白白咁返黎，我就去識女仔架喇！！」
『哼…！！』詩娜回過頭來，又哭又笑地叫嚷道：『任天衡…！！你試下！！』
「仲有…唔好冷親呀！」
詩娜流著淚拋下最後一句：『知喇…！長氣～！關你咩事喎～～！』
望住詩娜嬌小既身影…向住閘口愈走愈遠…，我想了一想…
詩娜今日一個人去坐飛機…恐怕係為左比我送機而同屋企人爭取返黎既原因。
我到呢一刻先知道…原來詩娜為左我…犧牲左咁多…
唔單止係朋友…就連家人……詩娜都可以為左我而………
「卞詩娜！！！！！！」
我用盡畢生最大既聲音向住閘口處大叫，旁邊四方八面既人都被我既聲線所吸引。
整個機場熱鬧既氣氛，彷彿都被我的一喝而凝結下來。
四周變得一片寂靜。
『又點啊！任天衡！！』詩娜用稚氣的聲線大叫著。
「冇～～～」
我將雙手放在嘴旁，深深地吸一口氣。
「我愛你呀！！！！！！！！！」
…………
………
……
『你都要等我呀！知唔知啊！！』
我的淚線終於崩潰，沙啞的聲線發不出半點聲音，只能拼命地點頭回應詩娜。
詩娜伴隨著淚水之下…亦展露了一個最甜美的微笑，然後向我揮了手後…
便進到入閘處…消失於我的視線之中。
終於…詩娜都離開左我。
我呆企左係原地，腦海中…仍不斷重播著昔日的片段。
「揀李星啦。」
『李星…』少女發了呆般看著電腦：『李星都唔勁……』
「你咁緊張…係咪升緊鑽石？」
『鑽石…我…暫時未升到……不過！我升返上銀…升返上銀牌就好快升到上去架啦！』
「哦～？」我回過頭，細聲的說道：「原來你叫卡詩娜？」
『喂！』詩娜用力的一下拍落黎：『你知道左我個名…你都要講返你個名比我知啊！』
「任天衡…」我死死地氣自我介紹：「我叫任天衡……」
『任天衡…？』
「做咩呀…？你…喊黎…？」
『冇…！你盲左呀～？你邊隻眼見到人地喊啊！？』
『你…咩態度啊你…！你可以陪住我…你執到啦…！身在福中不知福！』
「我身在福中？咁真係多謝哂喎。」
「你想食啲咩？」
『我…我…果啲紅卜卜既…咩黎架？』
「其實…你都笑得幾靚呀…」
『嗯…？你…』
「拿，你咪諗住又打我呀。」
『哼…人地先無咁得閒打你囉！』詩娜小嘴不屑地一蹶。
「喂！？卞小姐你去左邊呀？！對唔住呀…我錯喇！我好擔心你呀…唔好玩喇…如果你平安既話快啲打返比我啦！……就黎一點喇…咁夜好危險架…你知唔知———詩娜！」
『任天衡…哼，你唔係走左架咩？仲返黎做咩喎。』
「仲好講…你又話搵第二個陪你？做咩又係度篤魚蛋呀？」
『我有呀！～咪呢班伯伯陪我囉！』
「你真係……」
『我未飲過酒…』
「下…？成廿歲人都未飲過酒？唔係嘛你？」
『關…關你咩事！仲有…！人地先十八歲咋！岩岩成年未飲過酒…好出奇咩！』
「哈哈…等哥哥教你飲啦。」
『任天衡…！唔準你係我面前扮大個…！』
『任天衡……不如…你講故仔比我聽呀…？』
「講故仔…！？仲細咩？…講咩故仔啊…」
『我唔理呀…！我要聽故仔……』
『任天衡…！我唔會要你隻戒指架…！仲有…仲有…無我批准…你唔準死呀…！』
「傻瓜…咪話左係故仔黎囉…？傻左咩…？」
『我唔理呀…任天衡你無我批准…唔準死…唔準離開我…知唔知…！』
…
『任天衡…你會唔會…唔記得我架…？』
「唔記得你…？傻…我點會唔記得你…」
『萬一……有一日我唔係度呢…？』
……
『任天衡……你愛唔愛我…？』
「愛…我愛你…」
………
我一個人走到機場外租行李車既地方，係果度…有一個可以飽覽整個機場既位置；可以望到每一班升降落既飛機。
到左呢一刻，我仍然未接受到詩娜佢…已經離開左我。
甚至…只要我一合上眼，彷彿就好似聽到佢親切地叫著我全名，然後淘氣地打我一樣。
我望住手上既牙齒印…淚水…不停地落下。
原來曾經有一個我很愛的人…每日都用她的方法去表達愛我，而我卻懵然不知。
反而…我卻不斷地糟蹋，覺得一切都是理所當然，到詩娜離去後…才明白什麼叫身在福中不知福。
或者你可能會問，為什麼不嘗試把她留下？
我只能答你…我當然想把她留下。
但，我能忍心嗎？
詩娜為了我…曾經和家人吵架而徹夜未歸，為的…只是想在臨別前多見我幾面。
詩娜為了我離棄了她的朋友，為的…只是想和我相處多一點。
在僅僅的半年間，我們創造了不少難忘的回憶、難忘的笑容。
到了今天…我才知道詩娜為了我…曾放棄家人、朋友，試問…我還怎能要她犧牲學業？
我能做的…只有等待詩娜回來…然後…再珍惜和她相處的日子。
即使…到最後我都係變返自己一個，但最起碼我知道…我心入面最在乎、最重視既人…到底係邊個。
詩娜，謝謝您…讓我學會了愛。