【苦】《英雄聯盟》 - 一件次世代既愛情工具: 《幻境》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
時間，已經唔知過左幾耐。
我淨係知道…係我失去知覺之前，我飲左好多酒，耳邊不斷迴響起我電話鈴聲果首歌——「傳聞」。
係咪我手機響呢…？唔係。我聽得出係有人唱出黎…
果把聲…既陌生又熟悉…好似詩娜咁溫柔、又好似詩娜咁冷漠。
呢種冷淡與熱情之間既感覺，應該就只有詩娜先會比得到我…。
唔係，應該話係你愛上一個人時，你就會感受到佢帶比你既所有感覺。
咁講好似好抽象？當你死心蹋地咁去愛一個人…你就會明白我講緊咩。
即使係好細微、好細微既舉動，都足以令你內心翻起無數波瀾；
佢既一顰一笑，都會令到你既世界…上一秒風和日麗，下一刻雷電交加。
對於詩娜黎講，我只係佢世界入面既其中一個人；但對於我黎講，詩娜就係我既全世界。
沒了她，我如同世界末日。
『嘻～你好叻呀～！』
『洗乜講啊？梗係啦。』
係邊個…？
我認得係詩娜把聲！而且…而且仲有逸朗…
係邊…？我而家係邊…？
詩娜係幾時返左黎香港…？
我身處在一個房間中，不停地四處張望，試圖搵出聲音既來源…
當我愈行愈近，果兩把聲音既交談聲就愈來愈大。
『你咁叻～～可唔可以陪我Duo rank～？』
『得就得…不過……』
『嗯～？』
詩娜…！我見到詩娜！
佢就坐左係一張電腦椅上面，我認得…我認得呢個場景…係網吧！
而詩娜旁邊既…係…一個黑影…？
『嘿嘿，』黑影人的臉上意淫地笑著：『你要識做架喎…』
『咦呀…好衰架…！』詩娜撒嬌地回應著。
唔好…唔好呀詩娜！
此刻我不禁揉了揉眼睛，當我看清楚詩娜身旁的人時…
我唔敢相信…果個竟然係逸朗。
『唔肯呀～？』逸朗翹著嘴道：『咁你搵返個廢柴囉。』
『唔制呀……』詩娜著緊地攬住逸朗：『佢同我都係白金之嘛…咁鬼無用…你犀利好多囉…！』
『嘿嘿。』逸朗滿意地擁著詩娜。
「仆街！你個二五仔！！」我不斷聲嘶力竭地叫著：「放開你隻手啊！！！」
『咦？』逸朗問道：『詩娜你聽唔聽到呀？好似有人叫咁？』
『咩啊～』詩娜依偎著逸朗的臂膀：『聽唔到啵…』
『哈哈，咁我地不如……』
「唔好呀！！詩娜！！係我啊！！你聽唔聽到啊…！」
我望住佢地二人不斷叫喊，可惜…詩娜都好似聽唔到我講野咁。
逸朗唔單止對詩娜上下其手，而且仲開始脫去詩娜身上既衣服…
我好想阻止…！
但無論我點叫，點阻止都好…我雙腳都係郁唔到…！
我不斷拍打雙腿，可惜…都係毫無效用。
但…無論我點唔想去睇，點緊閉著雙眼都好，一幕又一幕不堪入目既畫面…都好似影片一樣傳入我腦海。
我見到…逸朗抱住詩娜…，將詩娜放係床上面…然後…佢地就開始纏綿…
而我…就正正企係佢地隔離…望住逸朗伸出魔爪…而自己卻咩都做唔到…！
「走呀！！詩娜！！快啲醒呀！！！！佢唔係好人黎架！！」
我不斷大叫…怒吼，可惜…詩娜都好似聽唔到我講野咁，一臉陶醉地係逸朗既懷抱之中。
但…逸朗呢個時候竟然一邊錫詩娜，一邊望住我展露著勝利者既眼神。
「你個仆街！！！」我咬牙切齒地嘶吼著：「我叫你停手呀！屌你老母！！！」
『停手？』逸朗一臉泰然地停下來問我，而詩娜…卻把視線停留在他身上。
「你…！你聽到我講野！？」
『我唔止聽到。』逸朗將手放在詩娜雪白的軀體上遊走，從腰肢…到股間…再滑落到大腿：『我仲要比你睇到。』
「你！！」我像發了瘋似的叫嚷：「我要殺…殺左你！！！」
『殺我？』逸朗回望著臉頰通紅的詩娜：『有人話要殺我喎，詩娜。』
『嗯…？』詩娜一臉痴迷的看著逸朗：『邊個啊…』
『企係果度果個人。』逸朗忽然指著我。
『唔？』詩娜終於察覺到我的存在。
「詩娜……」我流著淚的呆站著：「係我啊…你認唔認得我啊…」
『你……』她遲疑地看著我。
「我係任天衡啊…！」
『任…天…衡…？』
「係！…」雖然臉上不斷滑過淚水，但我仍強充起一副親切的笑臉：「我係果個好愛你既任天衡，你記得嘛…？詩娜！」
『任天衡…』詩娜側著頭回想：『我記得…任天衡嘛…』
「真係既…！？」我破涕為笑：「你真係記得我？！」
『嗯…我記得你……』
詩娜點著頭：『我最討厭既人。』
「詩…娜…？」
我雙眼突然失去焦點…
『聽到未。』逸朗站在赤裸的詩娜旁邊：『佢話好憎你，你仲要纏住佢？』
「唔係…唔係咁…」
『咩唔係？』逸朗獰笑著：『你親耳聽到係詩娜親口講討厭你架！傻仔！』
「唔係…」我不斷地搖著頭否認：「係你…！所有野都係你搞出黎！！！！」
『係呀，吹呀？』
「你個仆街…！」
『哈哈哈，我好驚呀。』逸朗不斷地挑釁：『就算係我做咁又點呀？詩娜鍾意既人係我，唔係你呀，傻仔！』
「你亂講！！」我激動不已：「詩娜愛果個…係我呀！！」
『係咩？』逸朗橫了詩娜一眼，輕撫著她的稚臉：『詩娜，你講下…你有冇愛過呢個人？』
詩娜只呆呆地站在逸朗的身旁沒有說話，只是默不作聲的搖搖頭。
「詩…詩娜…」此時，我已不支心力，迷茫的跪在地上。
『睇到未呀！』逸朗高高在上的嘲笑著：『佢話唔鍾意你呀！醒下啦柒頭！』
「唔會…」
『面對現實啦！』
忽然，逸朗的身後慢慢亮出數個高大雄壯的黑影。
『衡仔呀，』逸朗緩緩走近，掐著我頭髮：『你睇清楚！呢班先係詩娜愛既人呀！！』
我的視線被淚水掩蓋，看不清眼前的事物…
只係見到…詩娜被數個雄壯既男人所包圍著，而係詩娜臉上…卻沒有半點厭惡的表情。
『仲有我，』逸朗不停在我耳邊說：『我只係識左你個詩娜幾日咋！你連我都比唔上呀！懵撚！』
「你…」我緊握雙拳，猛力揮向逸朗的臉上：「你收聲啊！！」
逸朗目瞪口呆，被我一拳擊中後倒在地上痛掩傷口。
『哈…打我？』逸朗回望著詩娜：『詩娜，你睇，果條友打我呀。佢最叻就係打人架啦。』
「唔係…」我立即向著詩娜澄清：「唔係呀！係…係佢挑釁我在先架咋！」
『任天衡！』詩娜怒斥著：『點解你又要出手打人？』
「唔係…唔係…」
『我真係對你好失望呀！』
「唔係呀！詩娜…對唔住呀…！你原諒我啦！」
『原諒你…？你知道自己錯啲咩咩？』
「我知！我知呀！」
『你根本就唔知…』
「詩娜！！！」
逸朗慢慢走回詩娜身旁，然後…詩娜便擺著一副失望的表情，看著跪在地上的我歎氣搖頭。
我見到佢地既身影…開始愈走…愈遠…
無論我點起身跑去追，點伸手去捉住…詩娜都離我愈來愈遠。
甚至去到最後，詩娜被一群來歷不明既男人所包圍，消失係人海之中。
「詩娜！！！！！」
我不斷痛哭著叫喊，可惜…仍然徒勞無功。
現在剩低既就只有無數既冷眼旁觀者。
每一個都高高在上地展露兇獰的目光批判著我，每一個都話我出手打人，每一個都話對我失望。
不論我點努力去澄清，始終都係無人相信我。
我就好似被世界唾棄一樣，做錯一件事…就被一沈百踩。
就連我最愛既詩娜…都同佢地一樣。
『我以後…都唔想再見到你……』
四周不斷迴響著詩娜的最後一句說話。
我腦海亦浮現出詩娜果張失望至極既臉孔……
「詩娜…唔好走……」
詩娜的聲音愈來愈細…周遭的空間亦漸漸化成碎片。
「詩娜…詩娜…唔好走啊！！」
「我求下你…！唔好走…唔好拋低我一個人啊…！」
「我只係…得返你一個…」
最後，詩娜轉身離去前流了一滴淚，便如輕煙消散在空氣中……
「詩娜！！」
我竭力地大叫一聲後猛然張開雙眼。
「嘎…嘎…嘎……」我摸摸額角的汗水：「係…發夢…？」
原來頭先只係發夢…嚇死我…簡直真實到好似現實發生一樣…
唔係，清醒後我回想起…詩娜的確已經離開左我。
點解…我仲會係呢個世界上？
張開雙眼後，我稍稍坐起身，然後打量了四周一下。
「呢度係…」我喃喃地說著。
我記得係我失去知覺前，我明明係係尖沙咀海旁飲緊酒，
然後我飲到爛醉如泥後，就訓左係一張石凳上面…臨訓前…仲好似聽到街頭藝人既歌聲。
之後一訓醒…點解會身處呢個地方？
呢度周圍都好黑媽媽，簡直好似伸手不見五指一樣。
唯一既光線來源，就係貼滿係天花板上既螢光星星貼紙……
而我…卻身處係一張床上面…？
咯—咯咯———
咔嚓———
忽然間，房間內的木門緩緩打開，透出微黃的光線。
隱約中還感受到一個身影…呢個時候我不禁吞了吞口水，驚恐地瞪大眼睛望住大門外。
未幾，一個熟悉既身影便出現係我眼前。
『哦？』一把女聲說道：『訓醒喇？』
「你……」
我從下而上地掃視了眼前人一番，可惜剎那間我仍想不起她到底是誰。
『呵欠，』女生一伸懶腰後便走到床旁邊的梳妝台，從手中放下一碗東西：『飲左佢啦，我阿媽煲架。』
「呃…」我尷尬地謝過好意：「唔該……」
『薑茶黎架。』女生爽直地說：『飲完同我講啦，我拎隻碗去洗。』
「哦……」
女生放下一碗薑茶後便轉身準備離去。
「呀…」我叫停了她，支支吾吾地開口：「唔好意思…你係……？同埋…我點解會係度既…？」
『唔？』女生回眸怒瞪著我：『我你都唔認得？！』
「欸……」我吞吞吐吐地說：「可能呢度唔夠光…請問…你係…？」
『唉，煩。』
女生沒有回答我的問題，只是從梳妝的抽屜中取出一樣黑漆漆的東西，然後戴在頭上………
「係…係你…！！？」
『妖。』女生一臉嫌棄地把頭上的假髮放下：『洗唔洗咁大反應啊！』
「呃…無…」我萬分尷尬：「我估唔到係你姐…依雯……」
『喂！』依雯佯怒道。
「啊……阿蚊……係嘛…？」
雖然氣氛一片尷尬，但不知為何我的心…總比剛剛安定下來。
可能係床上既溫暖，可能係房內既呢陣令人心境平和既香氣…令到我心情放緩落黎都未定。
咪住先…
床…
房…
呢度…
呢度係依雯間房！！！！？