【苦】《英雄聯盟》 - 一件次世代既愛情工具: 《過去》
『點呢～』阿Sam坐在我身旁，邊打拍子邊說：『係咪覺得阿蚊同你平時認識果個好唔同呢？』
我一臉陶醉，看著依雯表演看得目眩神迷：「係…完全…兩個人黎…」
『哈，』阿Sam冷笑了一下，看著舞台回想：『起初蚊蚊佢都唔係咁架……』
「起初…」我喃喃先語一番後便問：「你同依雯……即係阿蚊…識左好耐架喇？」
阿Sam沒有回答我，只是把食指放在嘴上，示意我安靜地觀看依雯的演出。
我把視線重新放到酒吧中央既依雯身上，只見依雯所散發果股氣質、同神采…都同我平日所認識佢既唔同。
試想下，依雯平日返工就係一個喬裝既男仔頭，唔單止無女仔應有既飄逸長髮，果把死人聲更加係粗聲粗氣，而且仲成日郁手郁腳，絕對唔係受男仔歡迎果類型。
但而家，係舞台上、係酒吧內，係日常既依雯，卻係一個歡到大家喜愛既女仔…
雖然，依雯既頭髮只長及肩處，但佢爽朗既語調，年輕活潑既打扮，加埋佢果一份能夠輕易同人打成一片既性格…實在好惹人討喜。
最重要一點，試問有邊個會估到…一個咁粗魯既女仔…竟然有著一把溫柔惋若，幾近可以撫慰人們心靈既甜美聲線…？
[啪啪啪———]音樂完結，掌聲如雷的響起來。
演出完呢首歌後，樂隊的眾人便開始調轉位置，家豪作主唱，依雯退到結他手的崗位。
然而，阿Sam亦開始跟我聊起往事上來。
『你係咪想知阿蚊以前既事？』阿Sam忽然開聲說。
「唔係…」我澄清道：「我想問你係咪識左佢好耐———」
『其實阿蚊佢以前一直都係好似舞台上既佢咁。』阿Sam打斷了我。
「舞台上…既佢？」我不意識地回望著彈結他的依雯。
『嗯嗯。』阿Sam微笑地回想：『自從果個人同佢分左手之後，阿蚊就一直都收埋自己。』
「果個…係咩人？」我好奇地追問。
『……』阿Sam沈默了一下，便直視著我說：『一個同你一樣，叫佢做依雯既人。』
「………？」我展露著一頭霧水既表情。
『其實我同蚊蚊，係幾年之前就已經認識。』阿Sam又說：『果個男仔，亦係我介紹比佢。』
「係你介紹既…？」
我望住眼前人，實在意想不到依雯既故事…竟然咁峰迴路轉。
『嗯…』阿Sam姿悠地摸著酒杯：『果個男仔本來都係玩音樂既人，阿蚊一開始認識佢，就係祟拜佢彈結他時既氣質，而且我同果個男仔都識左好耐，我知道佢都係一個好男仔黎，所以…就介紹左比阿蚊認識。』
「之…之後呢…？」我迫不及待地追問。
『之後…唉…』阿Sam內疚地歎著氣：『我實在唔知…原來咁做…係害左阿蚊。』
「依雯佢…」
『阿蚊佢無做過啲咩錯事，無出軌、無港女性格、除左粗魯啲之外就無不良嗜好。』阿Sam續道：『錯既只係果個男仔。』
「果個人…」我回想起依雯昨晚的一番說話：「佢對依雯做過啲咩事？」
『我頭先咪話，果個男仔我認識左好耐，知道佢係一個好男仔先介紹比阿蚊既？』
「嗯。」我點點頭說。
『但…』阿Sam煞有介事的皺著眉：『傷害阿蚊既…係果個男仔既另一面。』
「另…一面…？」我一頭霧水的問：「即係…佢私底下既一面？」
雖然我出黎做野既時候唔算耐，但都知道社會上每個人都會有兩面。
第一面就係返工做人處事，必須要圓滑，既不可得罪人，又不可太虛偽，以致好多人都戴上一個假面具去做人。
聽到阿Sam講既另一面…我相信應該就係果個男仔私底下既一面。
豈料到…
『錯。』阿Sam冷冷的說：『唔係私底下一面，我認識左個男仔咁耐，又點會唔知佢私底下係咩人？』
「咁又係…你又講得岩…」我聽罷更感莫明：「咁唔係私底下…咁係邊一面？」
阿Sam聽後神色凝重地望住我…並吐出一句。
『病發既一面。』
我目瞪口呆：「病發…？」
『嗯。』阿Sam回想著往事：『有一次阿蚊喊住咁打黎搵我，佢話果個人好似變左另一個人咁…』
「……變左另一個人…」雖然唔關事，但我亦不禁回想起詩娜。
『我聽到之後就好似你而家咁一頭霧水。』阿Sam侃侃而談地說：『去到事後…果個男仔先同阿蚊解釋話自己有病。』
「係咩病…？」
『係解離症，』阿Sam解釋道：『精神分裂既一種。』
我聽後心底不禁凜了一下：「咁果個男仔做過啲咩事？！」
『毒打、唾罵、侮辱。』阿Sam皺著眉閉上眼後說：『你想像得到殘忍既事…果個男人都有做。』
「下！？」我忍唔住追問：「咁依雯呢！？做咩唔同佢分手！？」
阿Sam苦笑了一下後說：『換轉係你，你會唔會分手？』
「……」我當場無話可說。
如果詩娜真係有精神病，唔需要問都知道…我一定唔會離開佢。
反而…我會更加關心，花更多既精神同時間係詩娜身上。
希望佢可以早日康復，希望佢可以變返以前果個詩娜……
「唔通…！？」我驚醒地說。
『無錯，』阿Sam無奈地搖頭說：『阿蚊佢無論邊個勸告佢都無聽。』
「……但……！」
『我地當時全部人根本咩都做唔到。』阿Sam愁眉不展地說：『可以做既…只有等阿蚊自己清醒…又或者…果個男仔既病會好返。』
「之…之後呢？！」
『之後…』阿Sam把視線看著遠方正專心演出的依雯：『之後，即使阿蚊有幾灰心都好，只要聽到果個男仔既道歉、甜言蜜語後，都會死心塌地咁留係佢身邊……不離不棄。』
「咁我都明白…」換左係我，都會咁做。
『但係！』阿Sam的語氣忽然變得沈重：『阿蚊只係一個女仔咋…試問我地點忍心佢咁比人毒打？當時每次見到佢…身上都會有不同既瘀傷，但阿蚊個傻妹…每次都笑臉迎人…唔想我地擔心。』
「咁…」我思考了一下：「你地有冇去同果個男仔講！？」
『當然有。』
「咁個男仔點做…！？」
無錯！如果換著有病果個係我，即使我控制唔到自己出手傷害詩娜，我都會內疚到死！
更何況係一而再、再而三咁出手！？假如果個男仔對依雯有愛既存在既話…
都一定會自己離開…為既唔係想佢得到幸福，而係唔想再傷害到對方。
如果愛一個人…一定都會咁做。
『佢……』阿Sam言不及意地說著：『佢講左一個…令到我到而家都忘記唔到既理由…』
「咩理由！？」
我實在諗唔到，有咩理由要仲留係依雯身邊。
既然明知道自己會害到愛人，又點會……
『佢話…』
『仲未玩夠。』
我聽到阿Sam講出呢一句時，我同大家既反應都係一樣，目瞪口呆。
「咩未玩夠…？」
『佢一直…』阿Sam萬分自責地說：『都當阿蚊係玩具…』
「下！？」我不禁追問：「佢唔係話自己有病架咩？！」
『唉，』阿Sam歎了一口氣：『我當時既反應同你一樣。』
「所以？」
『其實佢所謂既解離症…只係佢一直以黎既籍口。』
「籍口…？」
『冇錯，』阿Sam點頭解釋：『佢用呢個籍口去掩飾佢果種變態既心理行為。』
「………」
我實在聽到眼都凸埋…
今次我完全唔敢想像到自己變成咁會點…根本一個正常人都唔會做啲咁痴線既事！
傷害一個人已經難，更何況係用籍口留住一個愛自己既人…再去傷害佢！？
我終於明白…
依雯琴晚點解會話「果個人」…一次又一次咁傷害自己…一次又一次用愛去做籍口留住自己…
而且…當依雯聽到我好似「果個人」咁稱呼佢時…依雯竟然會有咁大既反應…
原來依雯…有一段咁苦不堪言既過去…
「咁你地有冇同依雯講！？」我追問道。
『傻既…』阿Sam柔聲細語地說：『我又點會無同蚊蚊講丫…但…你認為佢會聽咩？』
「………」
『係阿蚊既眼中，』阿Sam托著腮苦思著：『直到分手果日…都認為對方係愛自己，對方係迫不得已。』
「點解…依雯會咁傻……」我喃喃自語。
『愛一個人就係咁傻啊。』阿Sam苦笑著：『所以…我都好後悔…好內疚，因為…阿蚊呢一段回憶…都係我比呢個傻妹…』
「其實又唔關你事既，你都唔知架嘛…」我安慰後續問：「咁最後點解分手…？」
『最後…只有一個方法之嘛。』阿Sam向我打了一個眼色。
「你意思係…」我瞇著眼細想後說：「真係等果個人玩厭自己…拋棄自己先識醒！？」
『要令一個身陷迷戀既人清醒，除左被拋棄…根本無第二條路。』Sam回答著。
係…
聽到阿Sam咁講…我內心有把聲音不禁認同佢呢句說話…
我係咪已經被詩娜拋棄？我真係唔知…呢種斷絕來往係拋棄，定係鬧交。
有人話：「鬧交只係比較激烈既溝通方式」，但我唔同意。
因為好似我同詩娜呢種遠距離戀愛…忍耐同包容必需要兩者都有，否則…根本維持唔到落去。
不過…我又怪得邊個…？唔識忍耐同包容先果個…好似係我。
「係呢…」我隨口地說：「點解…你會同我講咁多野既？」
『你真係想知？』阿Sam奸笑地看著我。
「下…？」我回過神來：「有特別原因？」
『嗯。』
阿Sam頓了頓後便吐出一句…
『只有一個叫佢依雯既人，先可以救到阿蚊。』
「依雯…？」