【苦】《英雄聯盟》 - 一件次世代既愛情工具: 《驚濤》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
一個月後。
馬鞍山的超市內。
「喂…！」我把聲音壓低：「整鬼你咩…！上幾包奶上貨架都可以訓著都有既！？」
『唔…？』
依雯和平常一樣，收起了及肩的秀髮，戴上了一個短短的假髮去扮男仔。
再加上我地員工既制服，一貫都係無分男女，只係POLO衫加牛仔褲…
乍看之下，依雯同一個普通讀緊書既男仔無分別。
「一陣比你老豆見……」我頓了頓續道：「呀，唔係…係經理見到你係度訓著左…一定鬧你死呀！」
『妖…』依雯在放置鮮奶的凍櫃前蹲著，揉了揉雙眼說道：『呵欠……你知我琴日有SHOW出嘛…』
「咁又點？！」我板著臉道：「每個人都有佢既責任架，邊可以好似你咁返工都無厘精神架？」
『煩…』依雯站起來：『醒喇醒喇而家…得未啊…！』
我一見到依雯發悔氣果個樣，其實…我都可以體諒佢既…
畢竟，佢又係學生，又要表演，為左理想…又要為左父親既指示，我知依雯佢都好努力架喇。
「唉，怕左你。」我走到她身旁，接過那些貨物道：「入倉抖陣喇，記住咪比人見到呀。」
『唔？～』依雯瞪大眼睛：『真係既！？』
「係呀係呀…」我百般無奈地說：「入去訓啦懶鬼。」
『哈哈～～』依雯彷彿滿身輕盈地說：『多謝哂喎傻仔衡～！』
「喂…！」我緊張地四處張望：「咪咁叫我…！話哂我都係…！」
『知喇。』依雯淘氣地伸了伸舌頭：『主任哥哥丫嘛～？』
「嗯。」我立即擺起個款：「行啦懶訓鬼。」
依雯冇大冇細咁向我不辭而別之後，我便開始手頭上既工作。
我一邊專心整理貨物，一邊回想起…原來唔經唔覺…已經過左一個月時間。
起初果一個星期…
我都仍未習慣詩娜已經同我斷絕來往，無時無刻一起身…我都會想起佢。
或者係因為已經失去，果種思念既感覺…真係比死更難受。
雖然我不斷咁嘗試打探詩娜既消息，但好可惜…所有既努力都係一無所獲。
詩娜日常用既社交媒體，無論係Facebook，wtsapp，instagram，甚至係LOL等等；
所有有關佢既帳號都被刪除，詩娜佢……都好似人間蒸發左一樣。
無奈地，詩娜根本無咩朋友，就算我想搵佢身邊既人…都根本無處可尋。
你問我有冇盡力去搵過？當然有。
我甚至嘗試過，鼓起勇氣去搵佢果班既LOL男性朋友。
但佢地每一個…一係就話唔知；一係就話佢忙學業同拍拖，所以無時間點玩。
雖然…雖然我聽到之後…個心係有啲痛。
果種痛…係好似揪住揪住…心酸既感覺；但另一面睇…其實…我應該值得開心至係。
當你知道你最愛既人得到幸福，就算……果個唔係自己都好，只要有人代替自己比到幸福佢，打聽到佢生活一切安好，無再好似以前為自己咁傷心……
咁…唔係最好既結局咩？
愛一個人，如果佢快樂，我都會同樣快樂。
話分兩頭，如果我同你講…我無唔開心，就係呃你既…
起初果個禮拜我都係垂頭喪氣，做咩都提唔起勁，終日行屍走肉咁樣。
但……呢段時間一直陪住我既……反而係好似唔關事既依雯。
無論係返工，定係去睇佢表演都好，依雯不知不覺間…已經做左好多幫我既事。
雖然依雯唔察覺…但…其實我真係好感激佢。
有時候返工…我見到依雯經常會有狼狽既樣，我都會將自己本來留比詩娜既關心……去嘗試下關心其他既人。
而依雯亦都會鼓勵……呀唔係，亦都會惡言相向咁屌鳩我，想我清醒唔好再沈淪落去。
經過左兩星期左右既時間洗禮…我既心終於稍稍放鬆下來，雖然仍未完全好返，但……已經可以再次專注事業，唔再係行屍酒肉既樣子。
分手之後既生活規劃，其實真係好重要。
我同好多人一樣，都嘗試將工作時間填滿自己。
我甚至願意唔收錢，返足全日營業時間，做到全身肌肉酸軟…返到屋企大覺訓。
而經理都知道我既事，見到我咁樣……經理反而更開心。（梗係啦，唔收錢OT多個人幫手！）
直到上星期，經理將一份店舖營業概況交比我溫習，預備幾日後既升職試。
而好慶幸，我不負大家既期望…終於做到主任呢個職位。
「好…搞掂。」我弄好貨物後，便站起來整理新的主任制服。
不過回想返轉頭，詩娜教識我既事…其實真係好多…好多。
除左教識我點去愛一個人，更重要既…係點樣去將心比己，點去坦白誠實。
而且，我知道愛情對於一個正常人黎講，絕對唔可以成個世界都係得對方。
要將事業、友情、家庭、愛人……等等都保持到平衡，先算係一段成功既戀愛。
而家有好多少男少女…都係將愛情睇得比生命更加重要，但其實…當你有一日好似我咁回想返轉頭，你就會知道…自己當初係幾咁傻。
唔係話叫你唔好咁愛佢，而係希望大家係愛一個人既同時…唔好忽略左其他重要既事。
假如對方係愛你……都唔會想你既世界只得佢一個。
愛一個上一課…或者就係呢個意思。
『阿衡。』忽然身後傳來經理的聲音。
「經理？」我回過頭來：「請問有咩事？叫我衡仔咪得囉…」
『哈哈。』經理親切地笑了笑後：『你已經係主任黎架喇，仲叫衡仔？大個人喇你。』
「呃……」我尷尬地摸摸後腦：「邊係呢……」
『講返正題，』經理叮囑道：『今日你知唔知返夜有幾多人？』
「知…」我果斷地回答：「有兩個收銀、四個店員、一個Parttime。」
『嗯。』經理點點頭後，便從西裝衣履中取出籲匙：『拎住佢。』
「呢條係…？」我接過經理的鎖匙問道。
『咪講左囉？』經理轉身而去：『今日我收早，收舖既事今晚就交比你。』
「我負責收舖…？」
『有問題？』
「哦…哦…！無…！」我打醒精神：「知道經理！」
經理轉身離去後，我站在原地，心情久久不能平伏…！
原來係事業上得到上司既重視，果種感覺係可以咁好！
而且…經理離開公司後，成間超市最大果個人…就係我。
雖然仲有一名副經理…但佢無返工，呢度就係我打骰啦！
係事業上得到成就……果種感覺…真係既緊張又興奮，簡直就好似岩岩表白成功左一樣…！
我到呢一刻先發覺，原來人生…仲有咁多精彩既事係我未曾嘗試過……
未幾，經歷完一晚辛勞後，便到達左超市關門，埋數收鋪既階段。
咯咯咯———
咔嚓——
「喂。」我拍一拍伏係檯上訓到死豬咁既依雯：「夠鐘放工喇。」
『嗯…？』依雯輕揉著眼：『幾點啊…？』
「撞鬼你咩，」我不厭其煩的說道：「如果我係經理第一時間炒左你呀…」
『哼…你試下～？』依雯不服地回望著我。
「起身換衫走啦。」我拿著鎖匙：「大家都走哂，得返你同我咋。」
『哦………』依雯站起來後，抖擻了一下精神便道：『咦，咁你今晚去唔去happy hour～？』
「飲酒…？」我想了想後：「唔喇，聽日仲要返工，我唔想令經理失望。」
『唓……洗唔洗啊。』依雯嘴翹翹的道：『工作還工作嘛～～有時唔識放鬆個人會好似橡筋咁拉斷架～！』
「學你咁放鬆到成條蛇咁咩？」我不禁揶揄了她一番。
『哎吖……你條pk丫！』依雯佯怒地仇視著我。
「講笑咋。」我終認輸地說：「得喇，怕左你。」
『哈哈…咁咪乖仔囉！』依雯裝作大人：『當慶祝你升職……比次機會你請埋我喇～！』
「行啦，懶訓鬼。」我冷笑道：「咁多野講。」
其實最近呢個星期，我為左升職既事都忙到頭昏腦脹，每日放工根本無咩時間去飲酒，又或者係聽依雯演出。
不過，適逢今日係禮拜六，依雯既樂隊係果間酒吧都必定會有show，而且…我都已經升左職，就算放鬆下都無壞姐？依雯都講得岩，若果將自己繃得太緊，恐怕…會弄巧反拙。
其實…我好感激有依雯係我身邊。
佢就好似一面鏡子咁，總會將我睇唔到既事物話比我知，以免我行差踏錯。
明明佢先係一個中學生…留意到我小事…居然比我更多。
未幾，我地便甫出地鐵站。
「喂……係呢……」我邊走邊問：「今晚有咩人？」
『唔……』依雯嘟起嘴想了想：『都係果啲啦～！去到你咪知囉～！』
「問下啫……」我沒趣的道。
『呀～～～！』依雯忽然想起：『今日係家豪生日啊！』
「家豪？」我立即停下腳步。
『係啊係啊…！』依雯立即緊張起來：『死啦…？我未準備禮物添…！』
「但…」我望一望手錶：「而家都咁夜…咩舖都收哂啦………」
『唉…點算啊…？』依雯不斷可憐地看著我求救。
「呢層………」
正當我地兩個苦無頭緒時———
啪—
『喂～～！』我感到背後被人拍一下後，一道女聲突然傳來：『衰人～！你係度既？』
衰人…？
我見到依雯望住我身後露出一副疑惑的表情。
於是我便立即回過頭來，豈料眼前竟出現一個意想不到既人。
「你……」頃刻之間我腦海不斷尋找回憶：「阿晴…？」
『嘻嘻！』阿晴鬼馬地笑了笑後，便道：『又會咁岩撞到你既？』
「哦無……」我尷尬地回望依雯：「同朋友去飲野之嘛…你呢？」
『喔喔～～』阿晴一身性感的打扮，托著雙乳說道：『我都係喎～～我阿哥生日～一陣去後面果間吧飲野～』
語畢，阿晴便指著後方……
但後方卻係…？！
「你都去果間吧？」我追問。
『係啊～～你黎唔黎？』阿晴建議道：『未決定去邊飲野～不如一齊呀～？』
「唔係……」我澄清：「我地咁岩…都係去呢間……而且…都係……」
咪住先…！
「阿晴！」我立即焦急地問：「你頭先話…邊個生日話！？」
『咩啊～』阿晴擺著一副猶豫的臉孔：『我阿哥囉…做咩？』
此時，身後的依雯便走上前問道。
『嗨，』依雯笑著說：『你係咪叫家晴？』
『你係…？』阿晴望住依雯：『喔！你就係我阿哥成日提果個阿蚊～？』
突然之間，我雙腳只能呆站在原地，四肢忽然動彈不得。
雙眼瞪得前所未有咁大，個口張大得個洞…整個人呆立當場。
仆街…呢個世界…會唔會太細…