【苦】《英雄聯盟》 - 一件次世代既愛情工具: 《理性》
「我話……」我裝作若無其事的傻笑著：「哈哈…其…其實都冇咩野丫？反正我要升職…調鋪都係遲早既事呀。況且…唔會有人永遠留係一個地方一世架嘛……哈…哈哈…」
我一邊傻笑邊抓後腦勺的說道，將呢一切發生既事都變得自然。
而係我講我自己既理由時，我竟然唔敢望住依雯雙眼去講…只係…不斷逃避。
呢個時候…氣氛已經變得非常僵硬…甚至我可以感受到依雯既生氣……
於是，我便借機向著進門的客人說道：「早晨你好，歡迎光臨。」
『任天衡。』依雯在我的身後叫停了我。
「…………」
我就好似被點穴一樣，明明被呼喚的我卻不敢轉身面對著她…
『點解。』從依雯的聲線中，我聽得出她心底的那種心灰意冷的感覺。
「咩…咩點解。」我背著她，顫抖道。
『係咪因為我同家豪拍拖，』依雯敞開心扉，終說著：『你就唔想見到我？』
「……………」
『係咪因為男同女之間一定無純友誼！？』依雯聲嘶力竭地叫嚷。
「你冷靜……」我無奈地面向著她：「而家上班時間…一陣食飯先傾好冇？」
『唔好！』依雯驀地鬧著彆扭：『我唔鍾意轉彎抹角！有咩就講清楚佢！』
「…………」
此時幸好四周仍無什麼人流，只係得幾個自顧自的客人，不然的話…依雯所發出的聲音…
必然會吸引人圍觀…到時驚動左經理…恐怕我水洗都唔清。
話分兩頭，呢一刻既我真係尷尬至極……
依雯同普通女仔唔同，做咩事都要直截了當，絕對唔會好似詩娜咁收埋自己…
呢點本身係好…但萬一好似而家咁爭執起上黎…就會變成鬧劇。
再加上佢年輕尚輕……我應該點做……
『出聲呀！』依雯咬著唇怒眸相視著我：『你唔係有野想講架咩！而家講哂佢…！』
「我唔明你點解要咁激動。」我只能迫不得已的說：「其實我唔係你邊個…你唔洗咁嬲掛？再加上…調舖之嘛，又唔係絕交，你咁嬲做乜……」
『……你講多次？』依雯的雙眼靈動著。
「我話…」我心虛的說：「調舖之嘛…又唔係絕交———」
『之前…果句。』
「之前？」我沒意識的回想，並重覆道：「其實我又唔係你邊個………」
『得。』依雯再次打斷了我。
「……？」
『你記住你今日講既野，唔好後悔。』
「…………」
語畢，依雯便向著門口的方向急步而去……
『蚊蚊，』收銀的嬸嬸說道：『你去邊呀？』
『我冇野，出去行下咋！！』依雯邊跑邊回應著。
『喂…～』收銀嬸嬸探頭望了望天色：『洗唔洗帶把遮出去啊～～』
依雯沒有理會，只是自顧自的跑了出去。
『唉…呢個女呢…』收銀的嬸嬸橫了我一眼：『主任，你地頭先咩事啊？』
「無野……」
『咁蚊蚊既事點？』嬸嬸關切的問道。
「嗯……」我分析下後便說：「我一陣會同經理報告。」
『唉…』嬸嬸似是搖頭歎氣著：『呢個傻女成日都咁衝動既……』
「後生嘛…」我裝作老成的說：「係咁架喇…」
『唔……』嬸嬸皺著眉抬頭望天：『個天陰成咁，個風球唔知打唔打得成呢。』
「乜…今日打風咩？」我好奇的問。
『係啊～！』嬸嬸驚醒道：『乜你唔知咩？今朝已經掛左三號波啦。』
「我今朝好早就趕住出門口…」我低頭說著：「無留意…」
依雯無緣無故地走左去，其實大家都見怪不怪。
因為佢平時除左係倉訓覺，周不時都會私自係工作時間去蛇王偷懶，不過因為依雯係唔係度都冇咩影響，同埋佢仲讀緊書，大家都無怪佢。
雖然係有啲於理不合，但因為佢係經理個女，包庇都係無可奈何既事。
但今次…依雯跑走既原因…其實都係由我而起。
『阿…主任…』忽然身旁的收銀嬸嬸叫著我。
「咩事？」我反問道。
『冇…』嬸嬸欲言又止：『你唔諗住出去搵個傻女咩？拎把遮比佢都好呀。』
「你話我…？」我呆了呆。
『係啊…』
「傻啦！…」我不禁冷笑道：「你估拍戲咩？我打份工架咋，一陣無啦啦偷走出去，分分鐘比人炒都似呀…你估我係依雯啲皇馬掛咩？」
『講下姐…哈哈…』嬸嬸尷尬地說：『咁…我想問阿主任…咁你企係個門口發呆做乜野？』
「下？」我望著她。
『你後面好多客人想入黎呀。』
「呃……」我轉頭立即道歉：「歡迎光臨…唔好意思…」
『想搵人…咪搵返人囉…又要扮口硬…』嬸嬸喃喃自語地說。
「幾時有！」我立即澄清：「我…我企係度係等倉車…睇下幾時黎之嘛。」
『哦。』嬸嬸說完便沒趣地繼續收銀的工作。
我望住個天，天上面既烏雲愈來愈多，而且…風勢都好似愈來愈大。
明明正值下午，街道上既人都好似少之有少咁。
本身我都覺得奇怪，明明今日係假日，點解行街既人會咁少…
乍聽之下原來先知道…今日有颱風來襲。
如果你問我……呢一刻想唔想追出去搵依雯？我當然想。
但想，同做係兩回事黎。
依雯教識我…做任何事都要拿捏到平衡，換轉係以前既我…一早就出左去搵佢。
但今時今日…有好多野都已經唔同哂。
我唔再係果個懵懵懂懂既任天衡，我而家已經係一個主任…雖然，唔可以話係咩豐功偉業，但起碼…我做事都唔可以好似以前咁無分寸。
遺憾地，呢一份成熟…卻令我失去左一啲最寶貴既野…
「唉…」我歎了一口氣，轉身回到超市店內。
我一邊處理今日既業務，腦海就一邊擔心著一個人。
可惜，不論在情在理…我都唔應該去搵佢。
家豪，先係佢真正既男朋友，我絕對唔可以做出一啲令依雯越軌既事…
就好似你係街度見到有啲女仔好靚咁，你最多都只係可以視姦佢一番，但你唔會捉佢入後巷強姦架嘛？
每個人都有佢應有既理智…
而我…一定要保持著冷靜。
『阿衡。』經理忽然出現在我面前：『倉車到左未？』
「倉車…」我恍神道：「倉車應該就到架喇…不過如果落雨…可能要等到傍晚。」
『嗯，』經理打量了四周一番：『係呢，個傻女去左邊？』
「呃…」我吞吞吐吐地說：「依雯佢……」
『又出左去？』經理無奈道：『呢個衰女包呢……』
「………」我不好意思說出自己的過錯。
『唉！唔理佢喇。』經理又說：『阿衡，你頭先既Request，我已經批左，而新舖果邊都同意，最快後日就可以調過去。』
「後…後日…？」咁快！？
『係啊，』經理拍了拍我膊頭：『而且果邊係大舖黎，去到你就好好學野喇，知嘛！』
「知…知道…經理……」
經理離去後，就只剩我一個默默的站在原地。
轟隆——————
唦——唦——唦———
一下雷聲響遍天際後，滂沱大雨便應聲降臨下來。
店內既人煙稍少，就只剩小貓三幾隻係度閒逛。
而相對地，倉車亦有機會因天雨關係，怕影響到貨物的完整，而廷遲抵達時間。
換句話說…
「經理…！」我戰戰兢兢地對著經理說。
『咩事？』經理托著眼鏡，回望著我。
「我…有一個請求…！希望…希望你可以批准…！」