【苦】《英雄聯盟》 - 一件次世代既愛情工具: 《雨文》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
嗖——嗖———
我同經理表達左訴求，雖然經理猶豫左一陣，但見今日颱風來襲，客流量並不多，再加上倉車將會改期，所以亦都批准左我提早食Lunch，使我有一小時既時間去搵依雯。
我拎住把黑色既遮甫出公司走到大馬路上後，發現街道兩旁的大樹都被狂風吹得沙沙作響，而且風勢伴隨著大雨，令到我即使有雨遮既保護，都難免被雨水沾濕全身。
「依雯…咁大雨你走去邊呀…」我看著昏暗的大街小巷默念著。
『喂！』
忽然周圍傳來幾道慌忙的聲音。
『唔該借借！』『咪企係度阻住哂！』『睇路啊靚仔！』
街道上既行人都爭相躲避著大雨，眾人都想儘快逃到避雨的地方。
唯獨只有我……仍然一個戇居居咁企係路中心。
試問我應該去邊度搵依雯？
雖然…我同依雯相處左好幾年，但都只限於公司之內。
即使係下班時間，我都只係同佢出過幾次聚會，如今要我去搵佢…我實在無從入手。
呆站在路中心既我，此情此景…不禁回想起…當日為詩娜之緊張得東奔西跑既時候……
唉！
無啦啦我點會諗埋呢啲野架！？都過左去啦……
任天衡啊任天衡，而家搵返依雯先係最緊要呀！
嘟——嘟————
依雯的手機接通了後，正當我以為佢會唔聽我電話…又或者係封鎖左我等等，
豈料到，竟然不消幾秒，便有人接聽。
『喂。』
「喂喂？」我摀住一邊耳朵，把聽力集中：「係咪阿蚊呀！？」
『你邊位？』
聽筒的另一端明明是依雯的聲音，但卻又帶著一道毫無情的聲線回應著我。
「喂…咪玩啦阿蚊……」我著急道：「係我啊，任天衡呀。」
『哦，係咩。』依雯冷冷的道：『我唔識你架啵。』
「…發生咩事呀……」我望著四周的雨點愈來愈大，內心不禁擔憂著：「不如你話比我聽你而家係邊呀？就黎掛八跑風球啦…！你又無帶遮又亂跑！」
『係又點啊！？』依雯一句狠狠的說著：『我又唔係你識個，你咁緊張我做乜？』
「………」
我竟然…毫無半句說話反抗得到。
有時候，女仔真係一種好奇怪既生物；
一個發嬲既女仔，就好似一隻齊裝開左盾既＂加里歐＂咁，無論你用咩言語去攻擊佢…都無任何效用，更甚者，佢甚至乎會用返你同佢講過既說話黎反擊你…
如今既我…就係最好既例子。
唦唦唦———轟隆————
「唉…」我只能低聲下氣：「阿蚊呀…唔好嬲喇好嘛？」
『嬲？』依雯反問道：『我冇嬲喎，你又唔係我邊個，我做咩要為左你嬲？』
「Sorry喇…！」我立即道歉：「我知錯喇，我唔應該咁同你講…又無理你既感受…係我唔岩！你話左比我聽你係邊先啦好嘛…」
我一邊拿著手機，一邊在橫風橫雨的街道上漫無目的地奔跑。
由街頭，跑到街尾；由商場，走到室外……不論去到邊…唔好話依雯，就連人影都唔見多一個。
而行人路兩旁的商店亦陸陸續續開始關門。
［天文台於下午一時二十九分宣佈懸掛八號東北烈風訊號———］
當我經過一檔生果檔時，店內的收音機正廣播著這一則消息。
雖然雨勢並沒有加劇，但狂風反而愈來愈大，惡劣的天氣使路面上的雜物橫飛；
就連垃圾桶都被吹到東歪西倒，垃圾散落一地。
我望一望手錶，時間已經漸漸過左二十分鐘，距離我午飯完結時間…就只剩八個字左右。
但我為左搵依雯，我已經唔記得左肚餓既感覺，一心只係想佢可以平安無事…
『做咩同我道歉？』依雯仍未消氣，語帶嘲諷道：『你唔係好忙要返工架咩？仲唔去～？』
「我……」我險些衝口而出，頓了頓後卻修飾說：「阿…經理話叫我出黎搵你……喎…」
『哦，乜係咩。』依雯彷彿看穿了我內心似的：『咁你幫我同阿爸講，我一陣會返屋企架啦。』
「返屋企…？」我反問：「你一陣唔返工咩…？」
『訓醒咩啊你！』依雯生氣說著：『而家八號風球，仲洗返咩！傻仔！』
「八號風球……」
就係我一邊講電話，一邊問依雯既同時，我發覺呢個時候既我…
雖然已經躲在街道上的一角，但我成身既恤衫經已濕到透底，深灰色既褲亦都變成黑色。
而且…我仲要一邊擋雨，一邊拎電話…搞到成個人都狼狽非常。
與此同時，我便察覺到一件事。
「阿蚊…」我擋著大雨，疑問道：「做咩…做咩你果邊…好似咁靜咁既？」
『我？』依雯語調一轉：『係咩？唔知喎。』
「唉…咪玩啦……」我苦苦哀求地說著：「你而家係邊呀，我黎接你啦…！」
『哈，傻仔。』依雯似是心涼的道：『都唔知你衝出黎淋雨做乜～』
「淋雨…？」我被雨點拍打至睜不開雙眼：「你又知…？你見到我咩？！」
『……』
呢個時候我立即不斷四處張望，但周圍都無依雯既身影，僅有既…就只係陸陸續續收舖既商店。
除此之外，成條大街上可謂空無一人，到底依雯係邊度見到我…？
『唉，見你咁慘，』依雯的態度開始軟化下來：『唔玩你喇。』
「下…？咩啊？」風雨聲太大的關係，我只能掩著一邊耳朵，集中的說著：「你頭先講咩…？我聽唔清楚呀…」
『望上黎啦。』依雯清晰地說著。
街道的兩旁除了商店外，其實仲有唔少高樓大廈林立。
我聽從著依雯的指示，緩緩的抬起頭望上去…係眾多的窗戶外，就只有數個單位亮燈。
而係咁昏暗既環境之下，就只有一個單位…比其他單位開揚…，窗外的佈置更為精美。
我把視線集中在一點之上，未幾，便見到一個嬌小的身影，站在那單位的窗前。
「你…」我擦走臉上的雨水，仔細地看著：「你係上面啊…？」
『傻仔！』依雯看到我的樣子忍不住噗一聲的笑起來，並揮著手：『見唔見到我啊？』
「見到…！」我的心突然莫名的舒坦下來：「見到喇…！！」
『煩。』依雯忍著笑意，佯怒道：『上黎啦，仲淋雨。』
「好…即刻到！」
叮咚——叮咚————
我冒著狂風暴雨地走到街道的另一旁，進入商業大廈後便整理濕透的衣服一番。
雖然我而家真係好肚餓同埋好攰，但我亦無理會太多，因為…我知道依雯…或者已經無嬲我。
可能係因為佢爽直既性格啦…有咩都會鍾意拎哂出黎講，唔同一般女仔咁將心事收埋係個心入面。
所以，每逢有任何爭執…依雯都會好快就原諒別人。
而且我知道…依雯係一個…寧願自己痛苦，都唔想去憎恨對方。
咔嚓——
『歡迎光～～～臨。』
我企左係門口，都仲未入到去，一群熱鬧既聲線便向住我而來。
門內不斷散發著柔和既微黃燈光，即使窗外仍然烏雲滿佈，只要入到呢間樓上咖啡廳，都彷彿令人忘記了窗外的惡劣天氣。
唔單止咁，咖啡店內尚設有恆溫的冷氣，再加上一陣又一陣既美食和咖啡香氣…使人不禁心曠神怡起來。
『歡迎光臨先生，』一名樣子甜美的女生走過來：『請問幾位架～？』
「我…」面對著年輕美女，我不禁尷尬起來：「我黎搵人既…我有朋友………」
『喔！』少女體貼地拿著一條毛巾遞過來：『先生抹一抹雨水先啦～！仲有，遮可以放係果度～有需要可以再搵我架～！』
「唔…唔該……」
我整理完一番後，便走過店內的玄關位置，進入客廳之內。
由於今日係颱風日，店內既客人可謂少之又少，約十數張的餐檯，就只有三個客人坐著。
未幾，我便發現了依雯靠在窗旁的身影。
「阿蚊……」我戰戰兢兢地坐下：「你無事就好……」
『我會有咩事？』依雯反問後，立即揶揄著我：『我又唔係你邊個，有事都唔關你事啦，可？』
「唉…」我歎氣道：「你放過我啦…好嘛……」
『唓，』依雯嗔道：『又係你自己講既！叫左你唔好後悔架啦～？』
「對唔住囉……」
『仲有呀！』依雯補上一句：『做咩叫我阿蚊！阿蚊係你叫架咩？』
「………」
我仲記得無幾耐之前，依雯經常都千叮萬囑地叫我唔可以叫佢真名，只可以叫佢「阿蚊」。
但，到左今日…我唔明點解佢無啦啦會將所有野都調轉哂？
「女人心，海底針」呢句真係至理名言黎。
「咁……」我吞吞吐吐地說：「我應該叫你咩…？」
『妖！』依雯不屑地道：『咪好似以前咁叫囉！煩…！』
「哦……」我好似隻馴服了的小狗一樣：「依雯……」
『嗯。』
唦——唦——滴答——
大雨不斷的拍打到玻璃窗上，簷篷上的點水亦不斷地滑下來。
依雯拋下一句後，便一語不發地坐在椅上，並呆呆的望著窗外的雨景。
係沒話題的尷尬氣氛之下，我只能呆呆的望著她…。
雖然…依雯平常聲線粗魯，又無一把女生應有既長長秀髮，更無淑女應有既氣質和談吐。
表現上既依雯…就好似咩優點都無咁。
但，唔知點解…我望住佢既側面，係不知不覺間…我竟然望到入迷…
依雯用手輕輕的拌著檯上的飲料，另一手托著泛紅的腮子，遠眺著一望無際的景色。
係呢間古色古香既咖啡廳內，依雯係我眼中，就好似同周圍形成左一幅圖畫般醉人。
明明佢唔係我鍾意果類形，明明…我愛既根本就唔係佢；
明明…依雯已經有男朋友，明明…我根本就唔係佢邊個。
但點解…點解我會有種唔想失去佢既感覺？
其實…我已經被自己既心搞到非常混亂不清。
我同依雯而家呢種感覺，我知道…我對佢既感情，絕對唔止係朋友咁簡單。
但，我既心明明就係詩娜度，我愛既，亦都係詩娜。
所以我好清楚愛一個人既感覺，到底係點。
但係依雯身上出現既…卻又係另一種截然不同既感情。
依雯對我黎講…到底有幾重要…？
我真係…唔知…我只係知道…我唔想…失去佢。
『喂。』依雯忽然開聲。
「做咩…？」我心底滿是緊張。
『無啊，』依雯侃侃而談地說：『想問你做咩唔叫野食之嘛？』
「我？」我想了想，便說：「唔啦…我無咩胃口……」
『哦。』依雯冷冷的道：『咁埋單啦。』
「埋單…？」我望著窗外的大雨：「咁快走？」
『你唔想咩？』依雯反問：『你都係幫阿爸搵我返去之嘛？況且你又係LUNCH時間，既然你又唔食野，咪費事影響到你遲到囉。』
「哦……」
『同埋～』依雯狡笑道：『其實我叫你上黎係諗住你幫我埋單架咋～！因為～我～無～帶～錢～』
語畢，依雯便擺著一個嘰笑的表情。
「哦…」我摸摸褲袋說：「唔緊要……」
忽然間。
『你做咩啊？』依雯好奇的望著我：『塊面青哂咁既？』
「………………」
『喂…！』依雯擔憂的問道：『唔好嚇我喎你…！係咪餓得制啊？』
「唔…唔係…」
『咁做咩？』
「我…」我尷尬地回望著她：「無帶銀包………」