唔係掛！原來真係有鬼！－現代捉鬼故事: 第六章－起步－1

「經理，我想做埋呢個月唔做喇。」

9點鐘既返工時間，每一日都早15分鐘返工。
今日我比平時再做多10分鐘，為既就係o係廁所練習呢句說話。

畢業之後我一直都係做part time 過日子，大約一年之前，
朋友介紹左我入去一間出板公司度做marketing。
美其名係marketing，實際上係同身邊唔同既公司打好交道，
互相揼心口，鬥抓爛塊面去搵折頭。





好運既係，依家呢一個世代，所有野都係用電腦，
就算同其他公司溝通都係用e-mail 同skype，
所以就算我好似我呢種不善辭令既鍵盤戰士，都能夠可以o係一年之內，
由一個小小既Marketing assistant，升做marketing executive。

我將預先準備既辭職信入好信封，
「答....答....答....」掛牆時鐘時秒針正式同 鐘面最高點重疊。
「好啦，開波。」我企起身，離開呢個我已經坐左一年既坐位。
一步一步行向緊緊關住門既經理室





「踫！」我一腳將經理房門踢開。

我一直認為佢係乖乖女既秘書Sindy突然於經理檯下探頭而出，
一早被弄花既唇妝、解開左既褲頭令我唔需要言語都知道呢一對男女o係度做緊乜。
「你...你做乜呀！阿俊你傻＿左呀？」經理一面茫然，同時帶上半點恐懼而對殺氣騰騰既我。我狠狠咁望住呢個肥頭耷耳既大叔，再望望呢個將我相信「呢個世界上仲有處女秘書」希望粉碎既八婆，我從西裝褸袋入面拎出我既辭職信，並將封信一野掉落肥經理既面。

「我依家唔__做喇契弟！收皮啦你！唔係你炒我呀！係我炒你呀！」
我將經理檯用力一抽，成張檯反轉。我冇理會Sindy同肥經理既慘叫，有型地步出經理房。
之後再閂埋門由佢地o係入面自生自滅。





我拍一拍心口，同自己講一切已經完。

「啪，啪。」我既手同心口，除左比手上既衣服阻隔外，仲有一封信。
冇錯，呢封係我頭先幻想將會掉落肥經理面上面既o個封辭職信。

「咯咯咯。」敲門聲取代左計畫入面原來既踢門。

「Come in。」 我緩緩打開房門，門罅傳來陣陣沙嗲牛肉麵既香味。
冇女秘書，更加冇18禁既場面。

「咩事呀阿俊？」肥經理一面食住早餐一面問。
我同經理既關係其實都唔差，久唔久都會兩條友出去食下飯，
全靠佢既提攜，我先可以平步青雲。

我閂埋房門，行埋經理檯。





「喂，查實呢...」

「喂查實呢，你覺得新黎個秘書點？」經理見我已經閂埋房門，冇理我既提問，即時開展我地間既男性話題。
「ok丫，算係啦，又做得，又睇得。」我唔意思咁講。

「係幾睇得既，不過唔係咁做得，我諗緊延唔延長佢試用。」老老實實，其實經理都幾信我，呢一刻我對自己辭職都真係有些少內疚。或者時日夠長，我都真係可以坐到經理呢個位。
可惜既係，呢度真係唔多野做。再者，相比起我黎緊要做既工作，呢一份工，實在太無挑戰性。

「經理，我想做埋呢個月唔做喇。」我冇回答經理既提問，直接將辭職信同我入房既目的，簡單用一句說明。

跟住落黎既15分鐘，我不停去解釋唔係公司對我唔好，亦唔係工作環境唔夠爽。
作為一個文員仔，每星期有高達30小時既JTV時間已經令我相當難堪，如果好似經理開出既新條件，再減我工作量我就真係悶死都似。

既然去意已決，經理都冇點為難我。




甚至o係我Last Day o個日，仲請左我同公司幾位同事去食自助餐。

不過通知期既一個月入面，我既JTV 時間由一星期30小時，變到50小時。
星期一到五，每日返工睇10個鐘JTV之後放工，我敢講，呢一個月係我人生最漫長既一個月。