[do do do do …..do do do do....]
鬧鐘既響聲迫我由我既龍床上面走出黎。

我望一望鬧鐘上既指針,七點。
自從離開左中學之後,我都冇試過咁早起身。
朝早既空氣唔可以話特別清新,
但我望落街既時候,見到一架架校車黎接小朋友返學。

我有時o係度諗,點解小朋友會好似有無限既精力,
神咁早返學,半夜又可以打機打到兩三點。




 掛牆既月曆上面,寧寧舍舍今日o個格有紅色筆圈住今日既日期。
因為今日係我自己既一個大日子,最起碼我覺得係。

我比平時用多左15分鐘去刷牙洗面剃鬚,再拎番zip左落櫃底既洗面泡泡出黎洗面,始終今日都係一個新既開始,我唔想比到壞印象我既新同事。
我走入廚房,為自己準備左一個最完美既早餐:
兩包營多同一隻燶邊蛋。將自己放o係最好既狀態,之後再出發。

食完早餐,換好平時出街著既tee 同牛仔褲,當然唔少得我既幾千蚊既 『加料外套』,就係時候出門口喇。
而今日既目的地,係朗豪坊。





地鐵上面滿佈住返工既西裝友,
對比起自己既tee 同牛仔褲,我稱唔上有型,
不過呢個場盒之下,我明顯變得格格不入。

地鐵上既大家,有d就撳電話,
有d未訓醒既就繼續訓。
望住呢一班人,就好似望番以前既自己一樣。
返工、放工。有時返到連自己做緊乜都唔知。
人生有乜目標?買樓?買車?又一或其他?
我唔知。





好好運,又或者叫我好唔好彩,比我搵到一條特別既路。
呢一條路唔係人人可以行,就算你有天賦,你亦未必夠膽行。

不過呢一刻我都想學Chi lam ,望住夕陽,講一句,我守護既,係60億人。

我拎出電話,撳著whatsapp 既icon。

「喂!仲訓緊呀?我返工喇!今日返新工我好緊張!」
按下傳送後,message 好快以Smoky 為目標就send 左出去。
但係message 右邊既tick 號,久久也只有一個。

我望望Smoky 既最後上線時候,係前日既上午11時30分。
可能佢只係電話無電冇去叉,又或者,佢係想刻意避開我。





都o岩既,鬼同天師永遠都係不兩立。
或者,由我決定行呢條路開始,就注定我地兩個以後會變成陌路人。